US-Iran Peace Talks: امریکہ-ایران جنگ بندی معاہدہ اگلے 24 گھنٹوں میں طے پانے کا امکان، پاکستانی وزیراعظم شہباز شریف کا بڑا دعویٰ

اسلام آباد: پاکستان کے وزیر اعظم شہباز شریف نے دعویٰ کیا ہے کہ امریکہ اور ایران کے درمیان مجوزہ امن معاہدہ اپنی تکمیل کے انتہائی قریب پہنچ چکا ہے اور امکان ہے کہ آئندہ 24 گھنٹوں کے اندر اسے حتمی شکل دے دی جائے گی۔ سوشل میڈیا پلیٹ فارم ایکس پر جاری اپنے بیان میں شہباز شریف نے کہا کہ دونوں ممالک کے درمیان مذاکرات میں نمایاں پیش رفت ہوئی ہے اور پاکستان معاہدے کے الیکٹرانک دستخط کے لیے بھی تیاری کر رہا ہے۔ انہوں نے امریکہ اور ایران کی قیادت کے ساتھ ساتھ خطے کے دیگر ممالک کا بھی شکریہ ادا کرتے ہوئے امید ظاہر کی کہ یہ تاریخی معاہدہ دیرپا امن کی مضبوط بنیاد ثابت ہوگا۔

We are closer to a peace deal than ever before. With finalisation likely expected in the next 24 hours, Pakistan is preparing for the electronic signing of the peace deal immediately after, followed by technical level talks next week.

We would like to thank United States of…

— Shehbaz Sharif (@CMShehbaz) June 13, 2026

پاکستان اور سوئٹزرلینڈ کا خیرمقدم

دریں اثنا پاکستان کے نائب وزیراعظم اور وزیر خارجہ اسحاق ڈار نے اگنازیو کاسیس سے ٹیلی فون پر بات چیت کی۔ گفتگو کے دوران دونوں رہنماؤں نے امریکہ اور ایران کے درمیان مفاہمت کی جانب بڑھتی پیش رفت کا خیرمقدم کیا اور امید ظاہر کی کہ جاری سفارتی کوششیں خطے میں امن اور استحکام کو فروغ دیں گی۔ دونوں ممالک نے مستقبل میں بھی قریبی رابطہ برقرار رکھنے پر اتفاق کیا۔

جوہری ہتھیاروں سے دستبرداری اور پابندیوں میں نرمی

ادھر امریکی انتظامیہ کے ایک سینئر عہدیدار نے بتایا کہ مجوزہ معاہدے کے تحت ایران نے اس بات کا عہد کیا ہے کہ وہ نہ تو جوہری ہتھیار تیار کرے گا اور نہ ہی حاصل کرے گا۔ عہدیدار کے مطابق ایران پر عائد پابندیوں میں کسی بھی نرمی کو سخت نگرانی، تصدیقی عمل اور بین الاقوامی معائنوں سے مشروط رکھا جائے گا۔ انہوں نے یہ بھی کہا کہ اس مجوزہ معاہدے کو خطے کے اہم شراکت داروں بشمول اسرائیل اور خلیجی ممالک کی حمایت حاصل ہے۔

خطے میں امن کی نئی امید

امریکی عہدیدار نے کہا کہ اگر ایران معاہدے کی شرائط پر عمل کرتا ہے تو یہ مشرقِ وسطیٰ میں کشیدگی کم کرنے کی جانب ایک اہم قدم ہوگا۔ تاہم اگر معاہدے کی خلاف ورزی ہوئی تو متعلقہ ممالک اپنے دفاع کے حق سے دستبردار نہیں ہوں گے۔ امریکہ اور ایران کے درمیان ممکنہ سمجھوتے کو خطے میں استحکام کے لیے ایک اہم سفارتی پیش رفت کے طور پر دیکھا جا رہا ہے، جبکہ عالمی برادری کی نظریں آئندہ 24 گھنٹوں میں ہونے والی پیش رفت پر مرکوز ہیں۔

بھارت ایکسپریس اردو۔