Donald Trump Greenland Plan: ’اب وقت آ گیا ہے کہ روسی خطرے کو دور کیا جائے‘، گرین لینڈ پر ٹرمپ کی نئی وارننگ

امریکہ کے صدر ڈونالڈ ٹرمپ نے گرین لینڈ کو لے کر ایک بار پھر سخت موقف اختیار کرتے ہوئے نئی وارننگ جاری کی ہے۔ امریکہ طویل عرصے سے اس اسٹریٹجک خطے پر کنٹرول حاصل کرنے کی خواہش رکھتا ہے اور ٹرمپ کے دوسرے صدارتی دور میں اس سمت میں سرگرمیاں تیز ہو گئی ہیں۔ اسی وجہ سے امریکہ اور یورپ، بالخصوص امریکہ اور ڈنمارک کے درمیان کشیدگی کی فضا پیدا ہو گئی ہے۔ صدر ٹرمپ نے اپنے سوشل میڈیا پلیٹ فارم ’’ٹروتھ سوشل‘‘ پر ایک پوسٹ میں لکھا کہ نیٹو گزشتہ 20 برسوں سے ڈنمارک سے کہہ رہا ہے کہ اسے گرین لینڈ سے روسی خطرے کو ختم کرنا ہوگا، لیکن بدقسمتی سے ڈنمارک اس معاملے میں ناکام رہا ہے۔ ٹرمپ نے مزید کہا کہ اب وقت آ گیا ہے کہ اس خطرے کو ختم کیا جائے اور یہ کام کیا جائے گا۔ ان کے اس بیان کو گرین لینڈ پر امریکی دعوے کے طور پر دیکھا جا رہا ہے۔

ٹرمپ کا یہ بیان ایسے وقت میں سامنے آیا ہے جب امریکہ اور یورپی یونین کے درمیان تجارتی محاذ پر بھی تناؤ بڑھتا جا رہا ہے۔ اس سے قبل امریکی صدر نے یورپی یونین کے 8 ممالک پر نئے ٹیرف لگانے کا اعلان کیا تھا، جس کے جواب میں یورپی یونین نے بھی امریکہ کے خلاف سخت موقف اختیار کرنے کے اشارے دیے ہیں۔ رپورٹس کے مطابق یورپی یونین امریکہ پر 93 ارب یورو تک کے جوابی ٹیرف عائد کرنے پر غور کر رہا ہے، تاہم اس کی سرکاری تصدیق تاحال نہیں ہو سکی ہے۔ خبر رساں ایجنسی سنہوا کے مطابق یورپی یونین ایک ایسے قانون کے استعمال پر بھی غور کر رہا ہے جس کے تحت امریکی کمپنیوں کی یورپی منڈیوں تک رسائی محدود کی جا سکتی ہے۔ یہ قدم امریکہ کے دباؤ کے جواب میں ایک مضبوط حکمت عملی کے طور پر دیکھا جا رہا ہے۔

ادھر صدر ٹرمپ نے حال ہی میں سوشل میڈیا کے ذریعے اعلان کیا کہ یکم فروری سے 8 یورپی ممالک، جن میں ڈنمارک، فن لینڈ، فرانس، جرمنی، نیدرلینڈ، ناروے، سویڈن اور برطانیہ شامل ہیں، سے آنے والی اشیا پر 10 فیصد ٹیرف عائد کیا جائے گا۔ انہوں نے خبردار کیا کہ یکم جون سے یہ شرح بڑھا کر 25 فیصد کر دی جائے گی اور یہ اس وقت تک نافذ رہے گی جب تک گرین لینڈ کی ’’مکمل خریداری‘‘ پر کوئی معاہدہ نہیں ہو جاتا۔

ان آٹھوں یورپی ممالک نے ایک مشترکہ بیان جاری کرتے ہوئے ڈنمارک اور گرین لینڈ کے ساتھ مکمل یکجہتی کا اظہار کیا ہے۔ صدر ٹرمپ کا مؤقف ہے کہ اگر امریکہ نے گرین لینڈ پر کنٹرول حاصل نہ کیا تو چین یا روس میں سے کوئی ایک طاقت ایسا کر سکتی ہے، جو براہ راست امریکی سلامتی کے لیے خطرہ بن جائے گا۔ ان بیانات کے بعد عالمی سیاست میں ایک نئی بحث اور بے چینی پیدا ہو گئی ہے۔

بھارت ایکسپریس اردو