India-Norway Agreement: وزیر اعظم مودی کے دورہ ناروے کے دوران 12 اہم معاہدوں پر اتفاق، ”ڈیجیٹل انڈیا“ مشن کو عالمی سطح پر فروغ دینے پر زور

وزیر اعظم نریندر مودی کے تاریخی دورہ ناروے کے دوران بھارت اور ناروے کے درمیان باہمی تعاون کو نئی بلندیوں تک پہنچانے کے لیے 12 اہم شعبوں میں معاہدوں اور مشترکہ منصوبوں پر اتفاق کیا گیا۔ اس دورے کے دوران دونوں ممالک نے گرین اسٹریٹجک پارٹنرشپ، ڈیجیٹل انفراسٹرکچر، اوشن انرجی، صحت، سائنس اور جدید ٹیکنالوجی جیسے شعبوں میں اشتراک بڑھانے کا عزم ظاہر کیا۔ وزیر اعظم مودی کو ناروے کے اعلیٰ ترین اعزاز سے بھی نوازا گیا، جسے دونوں ممالک کے مضبوط تعلقات کی علامت قرار دیا جا رہا ہے۔ سب سے اہم پیش رفت بھارت اور ناروے کے تعلقات کو “گرین اسٹریٹجک پارٹنرشپ” تک وسعت دینے کا فیصلہ ہے۔ اس شراکت داری کے تحت ماحولیاتی تحفظ، گرین انڈسٹری، سرکلر اکانومی، کلائمیٹ فنانسنگ اور صاف توانائی کے منصوبوں پر مشترکہ طور پر کام کیا جائے گا۔ اس تعاون سے ناروے کی جدید ٹیکنالوجی اور بھارت کی مینوفیکچرنگ صلاحیت کو یکجا کرنے کی کوشش کی جائے گی۔

دورے کے دوران ناروے نے ہند-بحرالکاہل اوشین انیشی ایٹو میں شمولیت اختیار کرنے پر بھی اتفاق کیا۔ اس فیصلے سے سمندری سلامتی، آزاد بحری راستوں اور ہند-بحرالکاہل خطے میں امن و استحکام کو فروغ ملنے کی امید ظاہر کی جا رہی ہے۔ دونوں ممالک نے “نور شپنگ 2027” میں بھارت کی شمولیت پر بھی اتفاق کیا، جہاں انڈیا پویلین قائم کیا جائے گا۔ اس اقدام سے بلیو اکانومی، گرین شپنگ، شپ بلڈنگ اور بندرگاہی انفراسٹرکچر کے شعبوں میں تجربات اور معلومات کے تبادلے کو فروغ ملے گا۔ بھارت اور ناروے کے درمیان ڈیجیٹل پبلک انفراسٹرکچر اور ڈیجیٹل پبلک گڈز کے شعبے میں تعاون کے لیے بھی ایک نیا فریم ورک تیار کیا جائے گا۔ اس کے ذریعے بھارت کے “ڈیجیٹل انڈیا” مشن کو عالمی سطح پر فروغ دینے اور گلوبل ساؤتھ ممالک تک جدید ڈیجیٹل سہولیات پہنچانے میں مدد ملے گی۔

صحت کے شعبے میں بھی اہم معاہدہ طے پایا، جس کے تحت دونوں ممالک کے طبی اور تحقیقی ادارے مشترکہ منصوبوں، تحقیق اور معلومات کے تبادلے پر کام کریں گے۔ اس کے علاوہ سڑکوں، سرنگوں اور ہائی وے انفراسٹرکچر سے متعلق خصوصی معاہدہ بھی کیا گیا، جس میں ٹنل کنسٹرکشن، ڈھلان کے استحکام، جیوتکنیکی پروجیکٹس، سیفٹی آڈٹ اور مشترکہ بولی جیسے امور شامل ہیں۔ سائنسی اور تکنیکی تعاون کو فروغ دینے کے لیے بھی کئی اہم فیصلے کیے گئے۔ دونوں ممالک نے صاف توانائی، ماحولیاتی تبدیلی، ہیلتھ کیئر اور بلیو اکانومی کے شعبوں میں مشترکہ تحقیق اور ماہرین کے تبادلے پر زور دیا۔

سی ایس آئی آر اور ناروے کے معروف تحقیقی ادارے سنٹیف کے درمیان ہونے والے معاہدے کے تحت بایو بیسڈ میٹریلز، اوشن انرجی، کاربن کیپچر اور سرکلر اکانومی سے متعلق منصوبوں کو تیز رفتار ترقی دی جائے گی۔ اسی طرح اوشن انرجی پروگرام کے تحت آف شور ونڈ اور ویو انرجی ٹیکنالوجی پر مشترکہ تحقیق اور اختراع کو فروغ دیا جائے گا، جس سے گہرے سمندری علاقوں میں قابل تجدید توانائی کے نئے امکانات پیدا ہوں گے۔ “گرین شفٹ” کے عنوان سے سائنس، ٹیکنالوجی اور انوویشن پروگرام کے تحت طلبہ، محققین اور فیکلٹی ممبران کے تبادلے کو فروغ دیا جائے گا تاکہ پائیدار ترقی اور سائنسی تحقیق کو مزید مضبوط بنایا جا سکے۔ اس کے علاوہ سی ایس آئی آر-این جی آر آئی اور ایمرلڈ جیوموڈلنگ کے درمیان جیوسائنس اور بڑے انفراسٹرکچر منصوبوں میں اشتراک کے لیے بھی معاہدہ طے پایا۔ اس تعاون کے ذریعے جدید جیوسائنسی حل استعمال کرتے ہوئے بہتر منصوبہ بندی اور فیصلہ سازی کو ممکن بنایا جائے گا۔

بھارت ایکسپریس اردو۔