Over 400 killed in Pakistan’s Airstrike: پاکستان نے کابل کے ریہیب سینٹر پر کیا فضائی حملہ، 400 سے زائد افراد کی گئی جان

کابل: پاکستان اور افغانستان کے درمیان کشیدگی برقرار ہے۔ طالبان حکام اور مقامی میڈیا کے مطابق کابل میں ایک بڑے نشہ بحالی مرکز پر پاکستانی فضائی حملے میں 400 سے زائد افراد ہلاک جبکہ کم از کم 250 زخمی ہو گئے ہیں۔ طالبان حکومت کے مطابق یہ حملہ رات تقریباً 9 بجے کابل میں واقع 2,000 بستروں پر مشتمل ’امید‘ نشہ بحالی اسپتال پر کیا گیا۔ طالبان کے نائب ترجمان ملا حمداللہ فطرت نے کہا کہ اس حملے سے اسپتال کو شدید نقصان پہنچا اور بڑی تباہی ہوئی۔

بھاری جانی نقصان کا دعویٰ

فطرت نے سوشل میڈیا پلیٹ فارم ایکس پر لکھا، ’’پاکستانی فوجی حکومت نے 2,000 بستروں والے اسپتال پر بمباری کی، جس سے اس کا بڑا حصہ تباہ ہو گیا اور ہلاکتوں کی تعداد اندازے سے کہیں زیادہ ہو سکتی ہے۔‘‘ انہوں نے بتایا کہ مرنے والوں کی تعداد تقریباً 400 تک پہنچ گئی ہے جبکہ 250 سے زیادہ افراد زخمی ہیں۔ طالبان حکومت کے ترجمان ذبیح اللہ مجاہد نے بھی اس حملے کی مذمت کرتے ہوئے کہا کہ ہلاک ہونے والوں میں زیادہ تر بے گناہ شہری اور نشے کے عادی افراد شامل ہیں۔

مزید ہلاکتوں کا خدشہ

افغان وزارت صحت کے حکام کے مطابق ایمرجنسی ٹیمیں رات بھر جائے وقوعہ پر مصروف رہیں اور ملبے میں دبے افراد کو نکالنے کی کوشش جاری ہے۔ وزارت صحت کے ترجمان شراف زمان نے بتایا کہ کم از کم 170 زخمیوں کو فوری طور پر قریبی اسپتالوں میں منتقل کیا گیا۔ انہوں نے کہا کہ ریسکیو آپریشن ابھی جاری ہے اور ہلاکتوں کی تعداد میں مزید اضافہ ہو سکتا ہے کیونکہ اسپتال کے کئی حصے مکمل طور پر تباہ ہو چکے ہیں۔ مقامی میڈیا کے مطابق امدادی ٹیمیں آگ بجھانے اور ملبے سے لاشیں نکالنے میں مصروف ہیں۔

بین الاقوامی ردعمل

رپورٹس کے مطابق یہ حالیہ برسوں میں کابل کے خطرناک ترین حملوں میں سے ایک قرار دیا جا رہا ہے۔ رچرڈ بینیٹ نے شہری ہلاکتوں پر تشویش کا اظہار کرتے ہوئے کابل اور اسلام آباد سے تحمل کی اپیل کی۔

مذاکرات پر زور

افغان امن مذاکرات کے سابق نمائندے عبداللہ عبداللہ نے بھی اس حملے کی مذمت کرتے ہوئے اسے بین الاقوامی قوانین کی خلاف ورزی قرار دیا اور کہا کہ مسائل کو بات چیت کے ذریعے حل کیا جانا چاہیے۔ امریکہ کے سابق خصوصی نمائندے زلمے خلیل زاد نے بھی عام شہریوں کی ہلاکت پر افسوس کا اظہار کرتے ہوئے متاثرین کے لیے انسانی امداد فراہم کرنے کی اپیل کی۔

بھارت ایکسپریس۔