Middle East Crisis: مشرق وسطیٰ میں کشیدگی کے درمیان متحدہ عرب امارات سے 90 سے زائد پروازیں بھارت آنے کی امید

نئی دہلی: مشرق وسطیٰ میں جاری کشیدگی کے درمیان، پیر کو متحدہ عرب امارات (یو اے ای) سے بھارت کے لیے تقریباً 95 پروازیں آنے کی توقع ہے۔ ایک سرکاری بیان کے مطابق، اس خطے سے محدود تعداد میں خصوصی (نان شیڈیول) پروازیں بھی جاری ہیں، جبکہ سعودی عرب اور عمان سے بھارت کے لیے فلائٹس معمول کے مطابق چل رہی ہیں۔ قطر کا فضائی راستہ جزوی طور پر کھلا ہوا ہے اور قطر ایئر ویز پیر کو بھارت کے لیے 8 سے 10 خصوصی پروازیں آپریٹ کرنے والی ہے۔ اس دوران کویت اور بحرین کا فضائی راستہ ابھی بند ہے، تاہم کویت کی جزیرا ایئر ویز سعودی عرب کے ایئر پورٹ سے بھارت کے لیے پروازیں چل رہی ہیں۔ اسی طرح بحرین کی گلف ایئر سعودی عرب کے دمام ایئر پورٹ سے خصوصی پروازیں آپریٹ کر رہی ہے۔

کویت، بحرین اور عراق میں پھنسے بھارتی شہریوں کو سعودی عرب کے راستے بھارت لایا جا رہا ہے۔ جبکہ ایران میں موجود بھارتیوں کو آرمینیا اور آذربائیجان کے راستوں کے ذریعے محفوظ طور پر واپس لانے میں مدد دی جا رہی ہے۔ اب تک 1,031 بھارتی شہری، جن میں 707 طالب علم شامل ہیں، ان راستوں سے نکالے جا چکے ہیں۔ ایران کے تہران، اصفہان اور شیراز میں موجود بھارتی طلباء کو ملک کے اندر محفوظ مقامات پر منتقل کیا گیا ہے۔ اس دوران اسرائیل میں موجود بھارتیوں کو اردن کے راستے بھارت بھیجنے کی کارروائی جاری ہے۔

اس دوران، وزیر اعظم نریندر مودی مسلسل دنیا کے دیگر لیڈروں سے بات چیت کر رہے ہیں۔ انہوں نے ایران کے صدر مسعود پزشکیان سے بات کر کے عید اور نوروز کی مبارکباد دی اور امید ظاہر کی کہ یہ تہوار خطے میں امن اور استحکام لے کر آئے گا۔ وزیر اعظم نے خطے میں اہم بنیادی ڈھانچے پر ہونے والے حملوں کی شدید مذمت کی اور کہا کہ اس سے عالمی سپلائی چین متاثر ہوتی ہے۔ انہوں نے سمندری راستوں کو محفوظ اور کھلا رکھنے کی ضرورت پر بھی زور دیا۔

وزارت خارجہ (ایم ای اے) مڈل ایسٹ کی صورتحال پر مسلسل نظر رکھے ہوئے ہے اور بھارتی شہریوں کی حفاظت کو اولین ترجیح دی جا رہی ہے۔ اس مقصد کے لیے 24 گھنٹے کنٹرول روم فعال ہے اور ریاستوں و مرکز کے زیر انتظام علاقوں کے ساتھ مسلسل رابطہ رکھا جا رہا ہے۔ اس کے ساتھ ہی بیرون ملک موجود بھارتی سفارت خانہ جات اور مشنز بھی 24 گھنٹے کام کر رہے ہیں۔ وہ ہیلپ لائن کے ذریعے بھارتی کمیونٹی سے رابطے میں ہیں اور ضرورت کے مطابق رہنمائی اور مدد فراہم کر رہے ہیں۔ 28 فروری سے اب تک تقریباً 3.75 لاکھ مسافر اس خطے سے بھارت واپس پہنچ چکے ہیں اور فلائٹ آپریشن کی صورتحال بتدریج بہتر ہو رہی ہے۔

بھارت ایکسپریس اردو۔