More than 200 former Afghan officials and security forces killed: طالبان نے سابق حکومتی اہلکاروں اور سکیورٹی فورسزکو نہیں کیا معاف،یواین کی رپورٹ میں بڑا انکشاف

منگل کو جاری ہونے والی اقوام متحدہ کی ایک رپورٹ کے مطابق، دو سال قبل طالبان کے ملک پر قبضے کے بعد سے سابق افغان حکومتی اہلکاروں اور سکیورٹی فورسز کے 200 سے زیادہ ماورائے عدالت قتل ہو چکے ہیں۔افغانستان میں اقوام متحدہ کے اسسٹنس مشن کے مطابق، طالبان کی طرف سے جن گروپوں کو سب سے زیادہ نشانہ بنایا گیا ہے وہ سابقہ فوج، پولیس اور انٹیلی جنس فورسز رہے ہیں۔یو این اے ایم اے نے 15 اگست 2021، جب طالبان نے اقتدار پردوبارہ  قبضہ کیا، اور جون 2023 کے آخر کے درمیان افغان حکومت کے سابق اہلکاروں اور سیکیورٹی فورسز کے خلاف کم از کم 800 انسانی حقوق کی خلاف ورزیوں کی دستاویز جمع کی ہے۔ دو دہائیوں کی جنگ کے بعد جب امریکی اور نیٹو فوجی ملک سے انخلاء کے آخری ہفتوں میں تھے تو طالبان نے پورے افغانستان میں قبضہ کر لیا۔ امریکہ کی تربیت یافتہ اور حمایت یافتہ افغان افواج طالبان کی پیش قدمی کے سامنے ڈھیر ہوگئیں اور سابق افغان صدر اشرف غنی ملک چھوڑ کر فرار ہوگئے۔

رپورٹ کے مطابق ان تما م افراد کو پہلے ڈی فیکٹو (طالبان) سیکیورٹی فورسز نے حراست میں لیا، بہت مختصر وقت تک حراست میں رکھنے کے بعد انہیں  گولی مار دی گئی ۔مارے جانے سے پہلے کچھ کو حراستی مراکز میں بھی لے جایا گیا اور دوران حراست قتل کیا گیا، بہت سارے ایسے بھی افراد تھے جن کو نامعلوم مقامات پر لے جا کر قتل کر دیا گیا، ان کی لاشوں کو یا تو پھینک دیا گیا یا خاندان کے افراد کے حوالے کر دیا گیا۔اقوام متحدہ کے ہائی کمشنر برائے انسانی حقوق وولکر ترک نے رپورٹ کے ساتھ جاری کردہ ایک پریس ریلیز میں کہا کہ یہ “سابق حکومت اور سیکورٹی فورسز سے وابستہ افراد کے ساتھ سلوک کی ایک سنجیدہ تصویر پیش کرتا ہے۔ وولکر ترک نے کہا کہ اس سے بھی بڑھ کر، جب کہ انہیں یقین دہانی کرائی گئی کہ انہیں نشانہ نہیں بنایا جائے گا، یہ لوگوں کے اعتماد کے ساتھ خیانت ہے۔ انہوں نے افغانستان کے طالبان حکمرانوں پر زور دیا کہ  ملک کے “ڈی فیکٹو حکام”مزید خلاف ورزیوں کو روک کر اور مجرموں کا محاسبہ کرتے ہوئے “بین الاقوامی انسانی حقوق کے قانون کے تحت اپنی ذمہ داریوں کو پورا کریں۔

بتادیں کہ اپنے اقتدار پر قبضے کے بعد سے، طالبان کو کسی خاص مخالفت کا سامنا نہیں کرنا پڑا اور انہوں نے اندرونی تقسیم سے گریز کیا۔ طالبان کی زیر قیادت افغان وزارت خارجہ نے اس رپورٹ کو مسترد کرتے ہوئے کہا کہ وہ طالبان کے اہلکاروں یا ملازمین کی طرف سے انسانی حقوق کی خلاف ورزیوں کے کسی بھی معاملے سے لاعلم ہے۔ایک بیان میں کہا گیا ہے کہ امارت اسلامیہ کے سیکورٹی اداروں کے ملازمین کی طرف سے سابق حکومت کے ملازمین اور سیکورٹی فورسز کے خلاف بغیر مقدمہ قتل، من مانی گرفتاری، حراست، تشدد اور انسانی حقوق کے خلاف دیگر کارروائیوں کی اطلاع نہیں دی گئی ہے۔ رپورٹ میں کہا گیا ہے کہ سابق افغان فوجیوں کو انسانی حقوق کی خلاف ورزیوں کا سب سے زیادہ خطرہ تھا، اس کے بعد پولیس اور انٹیلی جنس اہلکار آتے ہیں۔ تمام 34 صوبوں میں خلاف ورزیاں ریکارڈ کی گئیں، جن میں سب سے زیادہ تعداد کابل، قندھار اور بلخ صوبوں میں ریکارڈ کی گئی۔

زیادہ تر خلاف ورزیاں طالبان کے قبضے کے بعد چار مہینوں میں ہوئیں،یواین اے ایم اے نے اس عرصے کے دوران سابق سرکاری اہلکاروں اور افغان سیکورٹی فورسز کی تمام ماورائے عدالت ہلاکتوں کا نصف ریکارڈ کیا۔ لیکن اس کے بعد بھی حقوق کی خلاف ورزیاں جاری رہیں، 2022 میں 70 ماورائے عدالت قتل ریکارڈ کیے گئے۔رپورٹ میں جنوبی صوبہ قندھار میں سابق پولیس افسران کے خلاف انسانی حقوق کی کم از کم 33 خلاف ورزیوں کی دستاویز جمع کی گئی ہے، جو ملک بھر میں سابق پولیس ارکان کے خلاف ہونے والی انسانی حقوق کی خلاف ورزیوں کا ایک چوتھائی حصہ ہے۔دواکتوبر 2021 کو مغربی صوبہ ہرات میں خواتین کی جیل کی سابق سربراہ عالیہ عزیزی کام سے گھر واپس نہیں آئیں اور ان کا ٹھکانہ نامعلوم ہے۔ رپورٹ میں کہا گیا کہ مبینہ طور پر اس کی گمشدگی کی تحقیقات شروع کرنے کے باوجود، طالبان نے اس کے ٹھکانے کے بارے میں کوئی معلومات جاری نہیں کیں۔

اقوام متحدہ نے 424 سے زائد سابق حکومتی اہلکاروں اور افغان سکیورٹی فورسز کے ارکان کی من مانی گرفتاریوں اور حراستوں کی دستاویز پیش کی ہے جبکہ رپورٹ میں تشدد اور ناروا سلوک کے 144 سے زائد واقعات کو ریکارڈ کیا گیا ہے۔ حالانکہ طالبان نے ابتدائی طور پر سابق حکومت اور بین الاقوامی افواج سے منسلک افراد کے لیے عام معافی کا وعدہ کیا تھا، لیکن ان وعدوں کو برقرار نہیں رکھا گیا۔افغانستان میں اقوام متحدہ کے مشن کی سربراہ روزا اوتن بائیفا نے کہا کہ اگرچہ اگست 2021 میں طالبان کی طرف سے عام معافی کا اعلان “ایک خوش آئند قدم تھا، لیکن انسانی حقوق کی خلاف ورزیوں سے استثنیٰ کے ساتھ، اسے مکمل طور پر برقرار نہیں رکھا جا رہا ہے۔انہوں نے طالبان پر زور دیا کہ وہ “عام معافی کے لیے حقیقی وابستگی کا مظاہرہ کریں۔ یہ افغانستان میں انصاف، مفاہمت اور دیرپا امن کے حقیقی امکانات کو یقینی بنانے کے لیے ایک اہم قدم ہے۔

بھارت ایکسپریس۔