Israeli Lawmakers Line Up To Meet PM Modi: اسرائیلی پارلیمنٹ کنیسٹ سے تاریخی خطاب کے بعد ارکان پارلیمنٹ کی وزیر اعظم مودی سے ملاقات اور سیلفی لینے کے لیے مچی ہوڑ

یروشلم: وزیر اعظم نریندر مودی کے اسرائیلی پارلیمنٹ کنیسٹ سے تاریخی خطاب کے بعد ایک غیر معمولی منظر دیکھنے میں آیا، جب اسرائیلی ارکان پارلیمنٹ ان سے ملاقات اور یادگاری سیلفی لینے کے لیے قطاروں میں کھڑے ہو گئے۔ وزیر اعظم مودی کے خطاب کے فوراً بعد پیش آنے والا یہ لمحہ سوشل میڈیا پر تیزی سے وائرل ہوگیا اور دونوں ممالک کے قریبی تعلقات کی علامت قرار دیا جا رہا ہے۔ وزیر اعظم مودی بدھ کے روز دو روزہ سرکاری دورے پر اسرائیل پہنچے تھے، جہاں انہوں نے اسرائیلی پارلیمنٹ کنیسٹ کے خصوصی اجلاس سے خطاب کیا۔ یہ پہلا موقع تھا جب کسی بھارتی وزیر اعظم نے اسرائیلی پارلیمنٹ سے خطاب کیا، جسے سفارتی سطح پر ایک تاریخی پیش رفت تصور کیا جا رہا ہے۔

اپنے خطاب میں وزیر اعظم مودی نے بھارت اور اسرائیل کے درمیان مضبوط جمہوری اقدار، باہمی اعتماد اور اسٹریٹجک شراکت داری کو اجاگر کیا۔ انہوں نے کہا کہ دونوں ممالک نہ صرف ٹیکنالوجی، دفاع اور تجارت کے میدان میں ایک دوسرے کے قابل اعتماد شراکت دار ہیں بلکہ عالمی امن اور ترقی کے مشترکہ وژن کے حامل بھی ہیں۔ مودی نے اپنے خطاب کے دوران 7 اکتوبر 2023 کو ہونے والے حماس حملے پر اسرائیلی عوام سے اظہارِ تعزیت کرتے ہوئے کہا کہ بھارت مشکل کی اس گھڑی میں اسرائیل کے ساتھ مضبوطی سے کھڑا ہے۔ انہوں نے کہا کہ شہریوں کا قتل کسی بھی صورت میں جائز قرار نہیں دیا جا سکتا اور دہشت گردی انسانیت کے خلاف جرم ہے۔

انہوں نے ممبئی کے 26/11 دہشت گرد حملوں کا حوالہ دیتے ہوئے کہا کہ بھارت بھی طویل عرصے سے دہشت گردی کا شکار رہا ہے اور دونوں ممالک دہشت گردی کے خلاف زیرو ٹالرنس پالیسی پر یقین رکھتے ہیں، جس میں کسی قسم کا دوہرا معیار قبول نہیں کیا جا سکتا۔ خطاب کے بعد اسرائیلی ارکان پارلیمنٹ نے وزیر اعظم مودی سے مصافحہ کیا، گفتگو کی اور ان کے ساتھ تصاویر بنوائیں۔ اس دوران پارلیمنٹ ہال میں گرمجوشی اور دوستانہ ماحول نمایاں رہا، جسے بھارت۔اسرائیل تعلقات کی مضبوطی کی عملی مثال قرار دیا گیا۔

اسی موقع پر کنیسٹ کے اسپیکر نے وزیر اعظم مودی کو ’’اسپیکر آف دی کنیسٹ میڈل‘‘ سے نوازا، جو اسرائیلی پارلیمنٹ کا اعلیٰ ترین اعزاز سمجھا جاتا ہے۔ یہ اعزاز بھارت اور اسرائیل کے درمیان اسٹریٹجک تعلقات کو نئی بلندیوں تک پہنچانے میں ان کی نمایاں خدمات کے اعتراف میں دیا گیا۔ سفارتی مبصرین کے مطابق مودی کا یہ دورہ دونوں ممالک کے تعلقات میں ایک نئے باب کا آغاز ثابت ہو سکتا ہے، جس سے دفاعی، اقتصادی اور سیاسی تعاون مزید مضبوط ہونے کی توقع ہے۔

بھارت ایکسپریس اردو۔