Israel Hamas War: گزشتہ 24 گھنٹوں کے دوران غزہ پر بمباری ہوئی تیز، مسجد پر اسرائیلی حملے میں دو افراد ہلاک، ریو کیفے پر ہوئے حملے میں 11 فلسطینی جاں بحق

مقبوضہ مغربی کنارے کے جنین میں مسجد پر حملے کے بعد کشیدہ صورتحال ہے۔ اسرائیل کا کہنا ہے کہ مسجد حماس یا اسلامی جہاد کے ارکان استعمال کرتے تھے۔  وہیں، فلسطینی حکام کا کہنا ہے کہ حملے میں کم از کم دو افراد ہلاک اور تین زخمی ہوئے ہیں۔ دوسری جانب حوارہ میں ایک نئے آباد کاروں کے حملے کی بھی اطلاع ملی ہے، جسے اسرائیلی فورسز نے مقبوضہ مغربی کنارے کے باقی حصوں سے منقطع کر دیا ہے۔ مقبوضہ مغربی کنارے میں چھاپوں اور حراستوں کی تعداد دن بہ دن بڑھتی ہی جا رہی ہے اور گزشتہ دو ہفتوں میں اسرائیلی فورسز نے 1,000 سے زیادہ افراد کو حراست میں لیا ہے۔

ریو کیفے کو اسرائیلی فضائیہ نے بم سے اڑایا

غزہ پٹی پر اسرائیلی فضائی حملے جاری ہیں۔ ان میں سے بدترین فضائی حملے گزشتہ شب کیے گئے۔ خان یونس کے جلال اسٹریٹ پر واقع ریو کیفے کو اسرائیلی فضائیہ نے بم سے اڑا دیا۔ وفا نیوز ایجنسی کے مطابق، غزہ پٹی کے جنوب میں خان یونس میں ایک کیفے پر اسرائیلی حملے میں کم از کم 11 فلسطینی ہلاک اور درجنوں زخمی ہو گئے ہیں۔ الجزیرہ کے مطابق جائے وقوعہ کی ویڈیو اتنی بھیانک ہے کہ وہ نشر کرنے یا شیئر کرنے کے لائق نہیں ہے۔ خان یونس وہ جگہ ہے جہاں شمالی غزہ سے بے گھر ہونے والے لوگ اپنے گھر تباہ ہونے کے بعد پناہ لے رہے ہیں۔ وہیں ہلچل والے بازار کے علاقے میں ایک ریسٹورنٹ میں جب لوگ کھانا خرید رہے تھے، اسی وقت اسرائیلی فضائیہ نے بمباری کر دی جس میں کئی افراد جاں بحق ہو گئے۔

غزہ پر اسرائیلی بمباری میں آئی شدت

گزشتہ 24 گھنٹوں کے دوران بمباری میں شدت آئی ہے۔ ہلاک ہونے والوں اور زخمیوں کی اکثریت، جن کو اسپتالوں میں لایا گیا، عام شہریوں کی ہے، جن میں بڑی تعداد بچوں اور خواتین کی ہے۔ انسانی صورتحال ابتر ہوتی جا رہی ہے۔ غزہ کو کل 20 ٹرک امداد موصول ہوئی، تاہم، واضح رہے کہ اسرائیل کی جنگ سے پہلے غزہ کو اپنی انسانی ضروریات کو پورا کرنے کے لیے 500 سے زائد ٹرکوں کی ضرورت تھی۔

دمشق کے ہوائی اڈے پر اسرائیلی فضائی حملہ

خبر رساں ادارے روئٹرز نے شام کے جنرل ڈائریکٹوریٹ آف میٹرولوجی کا حوالہ دیتے ہوئے اطلاع دی ہے کہ صبح کے وقت شام کے دمشق ہوائی اڈے کو نشانہ بنانے والی اسرائیلی بمباری کے نتیجے میں کم از کم دو کارکن مارے گئے۔

بھارت ایکسپریس۔