Iran vs US-Israel Conflict: ایران پر برسوں سے عائد اقتصادی اور سیاسی پابندیاں جلد ختم ہوں گی، ملک میں تعمیر نو کا عمل تیزی سے جاری: نائب صدر محمد رضا عارف

تہران: امریکہ اور ایران کے درمیان دو ہفتوں کی جنگ بندی کے بعد ایک بار پھر خطے میں کشیدگی بڑھ گئی ہے۔ آبنائے ہرمز کے اطراف دونوں ممالک کے درمیان مبینہ حملوں کی اطلاعات سامنے آ رہی ہیں، جس کے بعد مشرق وسطیٰ کی صورتحال مزید پیچیدہ ہو گئی ہے۔ اسی دوران ایران کے پہلے نائب صدر محمد رضا عارف نے دعویٰ کیا ہے کہ ایرانی عوام جلد ہی امریکہ اور اسرائیل کے خلاف اس جدوجہد میں بڑی جیت کا جشن منائیں گے۔ بین الاقوامی میڈیا ادارے ”اسلام ٹائمز“ کے مطابق نائب صدر عارف نے جمعرات کے روز ملک میں صحت کے نظام، صنعتی اداروں اور بنیادی ڈھانچے کو پہنچنے والے نقصان کا جائزہ لیتے ہوئے کہا کہ ایران جلد ایک اہم کامیابی حاصل کرے گا۔ ان کے مطابق آبنائے ہرمز ایران کے لیے ایک انتہائی اسٹریٹجک خطہ ہے اور اس پر ایران کا کنٹرول قومی خودمختاری کا حصہ ہے۔

انہوں نے نیشنل پیٹرو کیمیکل کمپنی، اسلامی جمہوریہ ایران کی شپنگ لائنز اور فوڈ اینڈ ڈرگ ایڈمنسٹریشن کے دورے کے دوران کہا کہ ملک میں تعمیر نو کا عمل تیزی سے جاری ہے اور ایرانی عوام کی قربانیوں کے نتیجے میں جلد ہی پابندیاں ختم ہو جائیں گی۔ ان کا کہنا تھا کہ ایران پر برسوں سے عائد اقتصادی اور سیاسی پابندیاں جلد اپنے اختتام کو پہنچیں گی۔ محمد رضا عارف نے کہا کہ ”ہم جلد اپنی جیت کا جشن منائیں گے اور وہ تمام پابندیاں اور دباؤ ختم ہو جائیں گے جو برسوں سے ہمارے ملک پر مسلط ہیں“۔ انہوں نے دعویٰ کیا کہ ایران اپنی معیشت کو دوبارہ مستحکم کرنے کے لیے مختلف شعبوں میں اصلاحات کر رہا ہے اور قومی سطح پر خود انحصاری کی پالیسی پر عمل پیرا ہے۔

آبنائے ہرمز کے انتظام سے متعلق بات کرتے ہوئے انہوں نے کہا کہ ایران اس اہم آبی گزرگاہ کے تحفظ کے لیے مکمل طور پر پرعزم ہے۔ ان کے مطابق یہ علاقہ صرف ایران ہی نہیں بلکہ پورے خطے کے لیے اہمیت رکھتا ہے اور ایرانی کنٹرول میں یہ آبی راستہ محفوظ اور مستحکم رہے گا۔ انہوں نے کہا کہ ایران خطے میں غلبہ نہیں بلکہ تعاون کا خواہاں ہے تاکہ اس خطے کو ایک بڑے اقتصادی مرکز میں تبدیل کیا جا سکے۔ دوسری جانب امریکہ کے صدر ڈونلڈ ٹرمپ نے کہا ہے کہ آبنائے ہرمز کے قریب نئی فوجی جھڑپوں کے باوجود ایران کے ساتھ جنگ بندی بدستور قائم ہے۔ واشنگٹن میں ایک تقریب کے دوران میڈیا سے گفتگو کرتے ہوئے انہوں نے کہا کہ اگر جنگ بندی برقرار نہ ہوتی تو صورتحال فوراً واضح ہو جاتی اور بڑے پیمانے پر کشیدگی سامنے آتی۔

ٹرمپ نے یہ بھی کہا کہ ایران کے ساتھ تنازعہ ختم کرنے کے لیے امریکہ کی جانب سے پیش کیا گیا منصوبہ محض ایک صفحے پر مشتمل نہیں بلکہ ایک وسیع اور جامع معاہدہ ہے۔ ان کے مطابق اس معاہدے میں ایران کو جوہری ہتھیاروں سے مکمل طور پر دور رکھنے کی شرط شامل ہے۔ انہوں نے کہا کہ ایران کو ایسی تمام سرگرمیوں سے دستبردار ہونا ہوگا جو عالمی سلامتی کے لیے خطرہ بن سکتی ہیں۔ اس کے بدلے میں ممکنہ طور پر بعض پابندیوں میں نرمی پر غور کیا جا سکتا ہے۔ ادھر تہران نے امریکی تجویز کا جائزہ پاکستان کے ذریعے ملنے والے سفارتی پیغام کے بعد شروع کر دیا ہے، تاہم ابھی تک ایران کی جانب سے باضابطہ ردعمل سامنے نہیں آیا۔

بھارت ایکسپریس اردو۔