Middle East Crisis: کویت ایئرپورٹ حملے میں بھارتی شہری ہلاک، متعدد افراد زخمی، بھارت نے کیا سخت تشویش کا اظہار، عوامی تنصیبات کو نشانہ نہ بنانے کی اپیل

مغربی ایشیا میں جاری کشیدگی ایک بار پھر خطرناک رخ اختیار کرتی دکھائی دے رہی ہے۔ بدھ کے روز کویت انٹرنیشنل ایئرپورٹ پر ہونے والے حملے میں ایک بھارتی شہری ہلاک جبکہ متعدد افراد زخمی ہو گئے۔ واقعے کے بعد بھارت نے سخت تشویش کا اظہار کرتے ہوئے تنازعہ میں شامل تمام فریقوں سے شہری علاقوں اور عوامی تنصیبات کو نشانہ نہ بنانے کی اپیل کی ہے۔ کویتی حکام کے مطابق حملے میں مجموعی طور پر 63 افراد زخمی ہوئے، جبکہ ایئرپورٹ کی بعض تنصیبات کو بھی نقصان پہنچا ہے۔ کویت میں موجود بھارتی سفارت خانے نے ایک بیان جاری کرتے ہوئے تصدیق کی کہ حملے میں ایک بھارتی شہری جان کی بازی ہار گیا ہے۔ سفارت خانے کے مطابق چند دیگر افراد بھی شدید زخمی ہوئے ہیں اور انہیں مختلف اسپتالوں میں طبی امداد فراہم کی جا رہی ہے۔ سفارت خانے نے کہا کہ وہ کویتی حکام کے ساتھ مسلسل رابطے میں ہے اور متاثرہ بھارتی شہریوں کو ہر ممکن مدد فراہم کی جا رہی ہے۔

حملے کے بعد بھارتی وزارتِ خارجہ نے بھی باضابطہ ردعمل دیتے ہوئے اس واقعے پر افسوس کا اظہار کیا۔ وزارت کی جانب سے جاری بیان میں کہا گیا کہ بھارت شروع سے ہی مغربی ایشیا میں جاری تنازعہ کے دوران رہائشی علاقوں، عوامی مقامات اور شہری بنیادی ڈھانچے کو نشانہ بنانے کی مخالفت کرتا آیا ہے۔ وزارت نے تمام متعلقہ فریقوں پر زور دیا کہ وہ ایسے اقدامات سے گریز کریں جو عام شہریوں کی جانوں کو خطرے میں ڈالیں اور خطے میں عدم استحکام کو مزید بڑھا دیں۔ وزارتِ خارجہ کے بیان میں کہا گیا کہ شہری تنصیبات، ہوائی اڈے، تجارتی مراکز اور سفارتی مقامات کسی بھی تنازعہ کا ہدف نہیں بننے چاہئیں۔ بھارت نے ایک بار پھر کشیدگی کم کرنے، تحمل کا مظاہرہ کرنے اور سفارتی ذرائع سے مسائل کے حل کی ضرورت پر زور دیا ہے۔

واقعے کے بعد کویت میں بھارتی سفارت خانے نے وہاں مقیم بھارتی شہریوں کے لیے ایڈوائزری بھی جاری کی ہے۔ سفارت خانے نے تمام بھارتیوں کو چوکس رہنے، مقامی حکام کی ہدایات پر عمل کرنے اور غیر ضروری سفر سے گریز کرنے کا مشورہ دیا ہے۔ ذرائع کے مطابق حملے میں ہلاک ہونے والا بھارتی شہری کویت انٹرنیشنل ایئرپورٹ پر ملازمت کرتا تھا۔ کویت میں تقریباً دس لاکھ بھارتی شہری مقیم ہیں، جو ملک کی سب سے بڑی تارکینِ وطن برادری سمجھی جاتی ہے۔ دوسری جانب کویت کی وزارتِ خارجہ نے حملے کی سخت مذمت کرتے ہوئے کہا ہے کہ اس سے نہ صرف ایئرپورٹ بلکہ بعض سفارتی مشنز اور دیگر بنیادی ڈھانچے کو بھی نقصان پہنچا۔ وزارت کے مطابق ایک شخص ہلاک اور 63 افراد زخمی ہوئے ہیں۔ حفاظتی وجوہات کے پیشِ نظر متعدد پروازیں منسوخ یا مؤخر کر دی گئی ہیں جبکہ سیکیورٹی انتظامات مزید سخت کر دیے گئے ہیں۔

ایرانی حکام کی جانب سے کہا گیا ہے کہ یہ کارروائی آبنائے ہرمز میں واقع قشم جزیرے پر ہونے والے امریکی حملے کے ردعمل میں کی گئی۔ ایران پہلے بھی خبردار کر چکا تھا کہ اگر اس پر حملے کیے گئے تو وہ خطے میں موجود امریکہ کے اتحادی ممالک کو نشانہ بنا سکتا ہے۔ اسی تناظر میں اس حملے کو مغربی ایشیا میں بڑھتی ہوئی کشیدگی کا ایک اور خطرناک مرحلہ قرار دیا جا رہا ہے۔ یاد رہے کہ 28 فروری کو امریکہ اور اسرائیل کی جانب سے ایران پر حملوں کے بعد شروع ہونے والے علاقائی تنازعہ میں اب تک آٹھ بھارتی شہری مختلف واقعات میں ہلاک ہو چکے ہیں۔ اس دوران درجنوں بھارتی زخمی بھی ہوئے ہیں۔ مارچ میں متحدہ عرب امارات میں ایک میزائل حملے اور مئی میں آبنائے ہرمز کے قریب ایک بحری جہاز میں آتشزدگی کے واقعات میں بھی بھارتی شہری جان سے ہاتھ دھو بیٹھے تھے۔ مسلسل بڑھتے ہوئے ان واقعات نے خطے میں کام کرنے والے لاکھوں غیر ملکی کارکنوں، خصوصاً بھارتی برادری، کے تحفظ کے حوالے سے تشویش میں اضافہ کر دیا ہے۔

بھارت ایکسپریس اردو۔