Imran Khan will shifted Adiala Jail to Shifa Hospital: جیل سے شفٹ ہوں گے عمران خان، شفا انٹرنیشنل کے باہر سیکورٹی سخت، آرمی نے کنٹرول میں لیا اسپتال

پاکستان کے سابق وزیراعظم عمران خان کوسپریم کورٹ کے حکم کے بعد 20 اگست کی رات 12 بجے تک اڈیالہ جیل سے اسلام آباد کے شفا انٹرنیشنل اسپتال منتقل کیا جانا ہے۔ عمران خان کی منتقلی کی تیاریوں کے درمیان شفا انٹرنیشنل اسپتال کے باہرسیکورٹی میں اضافہ کردیا گیا ہے۔ پاکستانی فوج اوراسلام آباد پولیس نے اسپتال کواپنی سیکورٹی تحویل میں لے لیا ہے۔

عمران خان سے متعلق سپریم کورٹ کا حکم

پاکستان کی سپریم کورٹ نے عمران خان کوبہترعلاج کے لئے اسلام آباد کے شفا انٹرنیشنل اسپتال میں داخل کرانے کا حکم دیا تھا۔ عدالت نے کہا تھا کہ یہ فیصلہ عمران خان کی صحت، زندگی کے حق اورطبی سہولیات تک رسائی کی آئینی ضمانت کو مدنظررکھتے ہوئے لیا گیا ہے۔ عدالت نے حکام کوعمران خان اوران کے اہل خانہ کے درمیان ہرہفتے ملاقات کا انتظام کرنے کی بھی ہدایت دی ہے۔ اس کے علاوہ ایک میڈیکل بورڈ تشکیل دینے کا حکم دیا گیا ہے، جس میں عمران خان کے نجی ڈاکٹراوران کی بہن عظمیٰ خان کوبھی شامل کیا جائے گا۔

عمران خان کے معاملے میں پاکستانی حکومت کو جھٹکا

سپریم کورٹ کے فیصلے کے خلاف پاکستانی حکومت نے نظرثانی کی درخواست دائر کی تھی، تاہم سپریم کورٹ کے رجسٹراردفترنے نامکمل دستاویزات اورپیپربک کا حوالہ دیتے ہوئے درخواست واپس کردی۔ شہبازشریف حکومت نے بدھ، 19 اگست 2026 کو سپریم کورٹ سے رجوع کرتے ہوئے فیصلے پرنظرثانی اورعمران خان کواسپتال منتقل کرنے کے حکم کو واپس لینے کی درخواست کی تھی۔ حکومت نے اپنی درخواست میں موقف اختیارکیا تھا کہ یہ حکم جیل کے قوانین اورانصاف کے اصولوں کی خلاف ورزی ہے اورعمران خان کے معاملے میں امتیازی سلوک کے مترادف ہے۔ حکومت کا کہنا تھا کہ اگرعدالت نے متعلقہ قانونی شقوں پرغورکیا ہوتا تو سابق وزیراعظم کواڈیالہ جیل سے اسلام آباد کے پرائیویٹ اسپتال منتقل کرنے کا حکم نہ دیا جاتا۔

پی ٹی آئی نے بھی لگائے الزامات

عمران خان کی سیاسی جماعت پاکستان تحریک انصاف (پی ٹی آئی) نے بھی حکومت پرالزامات عائد کئے ہیں۔ پارٹی کے رکن پارلیمنٹ اورخیبرپختونخوا میں پی ٹی آئی کے سربراہ جنید اکبر نے دعویٰ کیا ہے کہ عمران خان کو جیل سے اسپتال منتقل کرنے کے لئے شہبازشریف کی جماعت پاکستان مسلم لیگ (ن) پوری طرح تیارہے۔ تاہم، جنید اکبرکا الزام ہے کہ نوازشریف کی بیٹی اورپنجاب کی وزیراعلیٰ مریم نوازعمران خان کواسپتال منتقل نہیں ہونے دینا چاہتی ہیں۔ ان کے مطابق، اسی وجہ سے سپریم کورٹ کے حکم کے باوجود اب تک عمران خان کواسپتال منتقل نہیں کیا جاسکا ہے۔ اس دوران عمران خان کی اسپتال منتقلی کے پیش نظرشفا انٹرنیشنل اسپتال کے اطراف سیکورٹی کے سخت انتظامات کئے گئے ہیں اورسیکورٹی فورسیزکی اضافی نفری تعینات کردی گئی ہے۔

بھارت ایکسپریس اردو۔