MadraIslandAccident: انڈونیشیا کے مدورا جزیرے کے قریب مسافر بردار جہاز میں لگی آگ، 5 افراد ہلاک، 41 لاپتا

نئی دہلی : انڈونیشیا کے مدورا جزیرے کے قریب ایک مسافر بردار جہاز میں اچانک آگ لگنے سے کم از کم پانچ افراد ہلاک جبکہ 41 افراد لاپتا ہو گئے ہیں۔ حکام کے مطابق حادثے کے بعد بڑے پیمانے پر امدادی اور ریسکیو آپریشن جاری ہے، جبکہ سیکڑوں مسافروں کو محفوظ نکال لیا گیا ہے۔انڈونیشیا کی قومی ریسکیو ایجنسی کے مطابق آگ لگنے کے وقت جہاز میں 271 مسافر اور عملے کے ارکان سوار تھے۔ اتوار کی دوپہر تک کم از کم 225 افراد کو بحفاظت بچا لیا گیا تھا، جب کہ لاپتا افراد کی تلاش کے لیے سمندر میں سرچ آپریشن تیزی سے جاری ہے۔حکام کے مطابق یہ مسافر بردار جہاز مشرقی جاوا کے شہر سورابایا سے جنوبی سولاویسی کے شہر مکاسر جا رہا تھا۔ سفر کے دوران جاوا کے شمال مشرقی ساحل کے قریب مدورا جزیرے کے نزدیک جہاز میں اچانک آگ بھڑک اٹھی، جس سے مسافروں میں شدید خوف و ہراس پھیل گیا۔ریسکیو کارروائی کے لیے متعدد امدادی جہاز اور دیگر وسائل تعینات کیے گئے ہیں۔ امدادی ٹیمیں اطراف کے سمندری علاقے میں لاپتا افراد کی تلاش میں مصروف ہیں اور پانی میں موجود ممکنہ متاثرین کو بچانے کی کوششیں جاری رکھے ہوئے ہیں۔

تاحال آگ لگنے کی اصل وجہ معلوم نہیں ہو سکی ہے۔ حکام نے واقعے کی تحقیقات شروع کر دی ہیں تاکہ حادثے کے اسباب کا تعین کیا جا سکے۔یہ واقعہ ایسے وقت پیش آیا ہے جب گزشتہ سال بھی انڈونیشیا میں ایک مسافر بردار جہاز میں اسی نوعیت کی ہولناک آتش زدگی کا واقعہ پیش آیا تھا۔ جولائی 2025 میں شمالی سولاویسی صوبے کے قریب کے ایم بارسلونا 5 نامی جہاز میں آگ لگنے سے تین افراد جان کی بازی ہار گئے تھے، جبکہ تقریباً 150 مسافروں کو بحفاظت بچا لیا گیا تھا۔ اس جہاز میں مجموعی طور پر 280 افراد سوار تھے اور حادثہ 19 جولائی کو دارالحکومت منادو کے قریب پیش آیا تھا۔

اس سے قبل 2021 میں بھی کے ایم کاریا انداہ نامی جہاز میں مولُکّا سمندر میں آگ لگ گئی تھی۔ اس حادثے کے دوران مسافروں اور عملے کو جان بچانے کے لیے سمندر میں چھلانگ لگانی پڑی تھی۔ بعد ازاں ریسکیو ٹیموں اور مقامی ماہی گیروں کی کشتیوں کی مدد سے 22 بچوں اور 14 عملے کے ارکان سمیت 181 افراد کو محفوظ نکال لیا گیا تھا۔واضح رہے کہ انڈونیشیا دنیا کا سب سے بڑا جزائر پر مشتمل ملک ہے، جہاں 17 ہزار سے زائد جزائر موجود ہیں۔ سمندری سفر یہاں آمد و رفت کا اہم ذریعہ ہے، تاہم حفاظتی انتظامات میں خامیوں کے باعث اس نوعیت کے بحری حادثات وقتاً فوقتاً پیش آتے رہتے ہیں۔

بھارت ایکسپریس اردو