Elon Musk agrees: امریکہ کی ترقی میں بھارتیوں کا اہم کردار، H1-B ویزا پر ایلون مسک کا بڑا بیان

امریکی صدر ڈونالڈ ٹرمپ کی جانب سے H1-B ورک ویزا پروگرام پر سختی کے بعد سب سے زیادہ متاثر بھارتی پروفیشنلز ہوئے ہیں۔ ویزا فیس میں کئی گنا اضافہ کیے جانے کے بعد، ارب پتی صنعتکار اور اسپیس ایکس کے سی ای او ایلون مسک نے بھارتی ٹیلنٹ کی تعریف کرتے ہوئے اس پروگرام کو جاری رکھنے کی مضبوط وکالت کی ہے۔

ایلون مسک نے کہا کہ امریکہ نے بھارت سے آئے باصلاحیت افراد سے بہت فائدہ اٹھایا ہے اور اگر H1-B ویزا بند کر دیا گیا تو یہ امریکہ کے لیے انتہائی نقصان دہ ثابت ہوگا۔ ان کا کہنا تھا کہ امریکہ کو بھارتی ورک فورس کی آج پہلے سے زیادہ ضرورت ہے۔

مسک نے اعتراف کیا کہ کچھ آؤٹ سورسنگ کمپنیاں اس سسٹم کا غلط استعمال کرتی ہیں، لیکن اس کے لیے ویزا بند کرنا حل نہیں ہے۔ انہوں نے کہا کہ غلط استعمال کو روکنے کے لیے اصلاحات ضروری ہیں، مگر پالیسی کو ختم کرنا دانشمندی نہیں ہوگی۔

یہ بیان مسک نے نکھل کامت کے پوڈکاسٹ “People by WTF” میں انٹرویو کے دوران دیا۔ مسک نے کہا:“امریکہ، بھارت کی ٹیلنٹ سے بہت زیادہ فائدہ اٹھا چکا ہے… اور یہ حقیقت ہے کہ ہم خوش نصیب ہیں کہ وہ یہاں آئے۔”

H1-B ویزا پر بات کرتے ہوئے انہوں نے کہا کہ: “کچھ لوگ، خاص طور پر دائیں بازو کی سوچ رکھنے والے، اسے بند کرنے کی حمایت کرتے ہیں، لیکن میرا ماننا ہے کہ یہ انتہائی برا فیصلہ ہوگا۔”

یہ بیان ایسے وقت میں آیا ہے جب امریکہ نے H1-B کے غلط استعمال کے خلاف بڑے پیمانے پر سخت کارروائی شروع کی ہے۔ بھارت کے ٹیکنالوجی ماہرین، ڈاکٹرز اور آئی ٹی پروفیشنلز اس ویزا کے سب سے بڑے استفادہ کنندگان میں شامل ہیں۔

آخری حصے میں ایلون مسک نے بھارت کے نوجوان انٹرپرینیورز کو مشورہ دیتے ہوئے کہا:“جو قدر آپ حاصل کرنا چاہتے ہیں، اس سے زیادہ دنیا کو واپس دیں۔ اگر آپ مفید مصنوعات اور خدمات بنانے میں کامیاب ہو گئے، تو پیسہ خود ہی پیچھے آئے گا۔”

بھارت ایکسپریس اردو