Iran-US Ceasefire: ’’آبنائے ہرمز نہیں کھولا تو کریں گے بڑا حملہ‘‘، اسلام آباد میں جنگ بندی میٹنگ سے پہلے ڈونلڈ ٹرمپ کا ایران کو سخت انتباہ

جنگ بندی سے متعلق تعطل کے درمیان امریکی صدرڈونلڈ ٹرمپ نے ایران کوایک بارپھردھمکی دی ہے۔ انہوں نے کہا کہ اگرجنگ بندی نہ کی گئی توایران کومزید سنگین حملے کا سامنا کرنا پڑے گا۔ ڈونلڈ ٹرمپ نے کہا کہ ان کے فوجی اس وقت ایران کے ارد گرد آرام کررہے ہیں۔ انہوں نے کہا کہ جب ہم محسوس کریں گے کہ ایران ہماری بات نہیں سن رہا ہے تو ہم حملہ کریں گے۔ امریکی صدرکا انتباہ ایک ایسے وقت میں آیا ہے، جب ایران نے جنگ بندی کی خلاف ورزی کا الزام لگاتے ہوئے آبنائے ہرمزکوکھولنے سے انکارکردیا ہے۔

امریکی صدرڈونلڈ ٹرمپ نے اپنے سوشل میڈیا پوسٹ پرلکھا کہ جنگ کے درمیان امریکی فوجیوں نے اپنے گولہ بارود کو پھرسے بھرلیا ہے۔ وہ حملے اورجیت کے انتظارمیں ہیں۔ سبھی فوجی تب تک ایران کے آس پاس رہیں گے، جب تک حقیقی معاہدہ نہیں ہوجاتا ہے۔ امریکہ واپس آگیا ہے۔

جنگ بندی میٹنگ سے پہلے ایران کو دھمکی

امریکی صدرنے یہ دھمکی سیزفائرمیٹنگ سے ٹھیک پہلے دی ہے۔ وہائٹ ہاوس کے ترجمان کیرولینا لیوٹ کے مطابق، ہفتہ کے روزپاکستان کے اسلام آباد میں ایران اورامریکہ کے درمیان سیز فائرکی میٹنگ مجوزہ ہے۔ امریکہ کی طرف سے نائب صدرجے ڈی وینس اس میٹنگ میں حصہ لیں گے۔ ایران کی طرف سے پارلیمنٹ کے اسپیکرغالباف اس میٹنگ کی قیادت کریں گے۔ پاکستان کے وزیراعظم شہبازشریف اورآرمی چیف عاصم منیرکی بھی شرکت کی اطلاعات ہیں۔

ایران نے جنگ بندی کی خلاف ورزی کا الزام لگایا

جمعرات کے روزایران نے امریکہ اوراسرائیل پرجنگ بندی کی خلاف ورزی کا الزام لگایا۔ پاکستانی وزیراعظم شہبازشریف کی ایک پوسٹ شیئرکرتے ہوئے ایرانی وزیرخارجہ عباس عراقچی نے لکھا کہ “جنگ بندی کی شرائط میں لبنان پرحملہ نہ کرنا شامل تھا، لیکن بدھ کے روزاسرائیل نے بیروت میں قتل عام کیا، پوری دنیا دیکھ رہی ہے۔” ایرانی پارلیمنٹ کے اسپیکرغالباف نے امریکہ پرجنگ بندی کی تین شرائط کی خلاف ورزی کا الزام عائد کیا۔ غالباف نے کہا کہ اگریہ سلسلہ جاری رہا تو ہم یورینیم کوختم نہیں کریں گے۔ دریں اثناء ایران نے آبنائے ہرمزکی ناکہ بندی جاری رکھی ہوئی ہے۔