Over 50 displaced people Killed in Haiti: ہیتی میں گینگ کا قہر، چرچ میں پناہ لیے 50 سے زائد بے گھر افراد کو چن چن کر کر دیا قتل

پورٹ او پرنس: کیریبین ملک ہیتی کے دارالحکومت پورٹ او پرنس کے قریب مسلح افراد نے اچانک حملہ کرکے 50 سے زائد افراد کو ہلاک کر دیا۔ مقامی انتظامیہ کے مطابق یہ واقعہ ہفتے کے آخر میں پیش آیا، جب پورٹ او پرنس کے قریب ایک چرچ میں پناہ لیے ہوئے بے گھر افراد کو نشانہ بنایا گیا۔ ہلاک ہونے والوں میں بعض افراد کو انتہائی بے رحمی سے قتل کیا گیا۔

گینگ نے کئی علاقوں میں کیا حملہ

میڈیا ادارے ’دی ہیتین نیوز‘ کے مطابق ہیتی کے میئر میسیلون جین نے بتایا کہ اتوار کی رات کینسکوف میں ایک گینگ کے حملے میں متعدد افراد مارے گئے۔ ’ویو انسانم‘ اتحاد سے وابستہ مسلح گروہوں نے دارالحکومت پورٹ او پرنس سے 10 میل سے بھی کم جنوب مشرق میں واقع پہاڑی علاقے کے کئی حصوں پر حملے کیے۔ جین کے مطابق خونریزی اتوار کی رات تقریباً ساڑھے 10 بجے شروع ہوئی اور پیر تک جاری رہی۔ مسلح افراد مختلف علاقوں میں گھومتے رہے، جن میں ٹاؤن سینٹر، میونسپل عمارت کے قریب ولیئر اسٹریٹ، ویارڈ 1، میڈلین، فرماتھ 52 اور تھوماسن 48 شامل ہیں۔

بے گھر افراد کے کیمپ کو بھی بنایا گیا نشانہ

یہ قصبہ کئی ماہ سے گینگ کی پرتشدد کارروائیوں اور اپنے اثر و رسوخ کو وسعت دینے کی کوشش کرنے والے مسلح گروہوں کے حملوں کی زد میں ہے۔ مقامی حکام کے مطابق، دارالحکومت پورٹ او پرنس کے قریب ایک چرچ میں پناہ لینے والے بے گھر افراد پر گینگ کے حملے کے بعد تقریباً 50 افراد ہلاک ہو چکے ہیں۔ حملے میں کئی دیگر افراد زخمی ہوئے، جبکہ کچھ لوگ اب بھی لاپتہ ہیں۔ حملہ ایسے وقت میں ہوا ہے جب دارالحکومت کے بڑے حصے پر مسلح گینگ کا قبضہ ہے اور حکومت کے لیے ان علاقوں میں اپنی عمل داری قائم کرنا ایک بڑا چیلنج بنا ہوا ہے۔

حکومت نے اضافی سکیورٹی فورس تعینات کی

حملے کے بعد جاری ایک بیان میں وزیر اعظم ایلکس دیدیے فِلس ایمے کے دفتر نے ہلاک ہونے والوں کے اہل خانہ اور دیگر متاثرین کے ساتھ گہری تعزیت کا اظہار کیا۔ حکومت نے علاقے میں امن و امان بحال کرنے کے لیے اضافی سکیورٹی فورسز تعینات کر دی ہیں۔ یہ حملہ اتوار کی رات کینسکوف میں ہوا، جو پورٹ او پرنس کے جنوب مشرق میں پہاڑیوں پر واقع ایک قصبہ ہے۔ جین نے پیر کے روز بتایا تھا کہ 40 لاشیں برآمد کی جا چکی ہیں، جبکہ متعدد افراد اب بھی لاپتہ ہیں۔

تشدد سے فرار ہونے والے بھی نہیں بچے

حملہ آوروں نے جن مقامات کو نشانہ بنایا، ان میں ایک ایسی جگہ بھی شامل تھی جہاں وہ لوگ پناہ لیے ہوئے تھے جو پہلے ہی ملک کے دیگر علاقوں میں ہونے والے تشدد سے فرار ہو کر یہاں پہنچے تھے۔ اس طرح تشدد سے بچنے کے لیے نقل مکانی کرنے والے افراد بھی گینگ کے حملے کا شکار ہو گئے۔ امریکی براعظم کے غریب ترین ممالک میں شمار ہونے والے ہیتی میں کئی برس سے سیاسی عدم استحکام، قدرتی آفات، بدعنوانی اور طاقتور مسلح گینگ کی پرتشدد کارروائیوں کا سلسلہ جاری ہے۔ یہ گینگ بڑے پیمانے پر قتل، عصمت دری، لوٹ مار اور اغوا جیسی کارروائیوں کے لیے ذمہ دار سمجھے جاتے ہیں۔ دارالحکومت پورٹ او پرنس کے بڑے حصے پر بھی گینگ کا قبضہ ہے۔

50 لاکھ سے زیادہ غذائی عدم تحفظ کا شکار

اقوام متحدہ کے اعداد و شمار کے مطابق تقریباً ایک کروڑ 10 لاکھ کی آبادی والے ہیتی میں تقریباً 15 لاکھ افراد بے گھر ہو چکے ہیں، جبکہ 50 لاکھ سے زیادہ افراد غذائی عدم تحفظ کی صورتحال سے دوچار ہیں۔ ہیتی میں 2016 کے بعد سے کوئی عام انتخابات نہیں ہوئے۔ ملک کے سابق صدر جووینیل موئز کو جولائی 2021 میں قتل کر دیا گیا تھا اور ان کی جگہ کسی دوسرے صدر کا تقرر نہیں کیا گیا۔ ملک میں دسمبر 2026 میں عام انتخابات ہونے کی توقع ہے۔

بھارت ایکسپریس۔