Tamannaah Bhatia’s item song ‘Aaj Ki Raat’: تمنا بھاٹیاکے آئٹم سانگ “آج کی رات” نے  رقم کردی تاریخ، یوٹیوب پر 100 کروڑ ویوز ، اداکارہ نے مداحوں کا  ادا کیاشکریہ

فلم ’استری 2‘ کی ریلیز کے ساتھ ہی اگر کسی چیز نے سب سے زیادہ توجہ حاصل کی تو وہ تھا اس کا آئٹم نمبر ’آج کی رات‘۔ اس گانے میں تمنا بھاٹیا کی دلکش ادا اور زبردست ڈانس نے ناظرین کو مسحور کر دیا تھا۔ وقت گزرنے کے باوجود یہ گانا آج بھی لوگوں کی پلے لسٹس میں شامل ہے اور مسلسل سنا جا رہا ہے۔ اب اس مقبول گانے نے یوٹیوب پر ایک بڑا سنگِ میل عبور کرتے ہوئے 100 کروڑ ویوز مکمل کر لیے ہیں۔تمنا بھاٹیا کے اس گانے نے یوٹیوب پر ایک بلین یعنی 100 کروڑ ویوز حاصل کر کے نیا ریکارڈ قائم کیا ہے۔ اس خوشخبری کو خود تمنا نے اپنے مداحوں کے ساتھ شیئر کیا۔ انہوں نے انسٹاگرام پر ایک پوسٹ کے ذریعے شوٹنگ کے دوران کی ویڈیوز، گانے کے مناظر اور پروڈکشن سے جڑی جھلکیاں شیئر کیں۔ اس کے ساتھ انہوں نے کیپشن میں لکھا، ’’پہلے ویو سے لے کر ایک بلین ویوز تک، آپ سب کے پیار کا شکریہ۔‘‘ انہوں نے اس پوسٹ کے ساتھ دل کی علامت بھی بنائی۔

یہ گانا فلم کی ریلیز کے ساتھ ہی شائقین میں بے حد مقبول ہو گیا تھا۔ سنیما گھروں میں ناظرین کی سیٹیاں اور تالیاں تھمنے کا نام نہیں لے رہی تھیں۔ ایسے میں اس گانے کا اتنا بڑا ہٹ ہونا فطری ہی تھا۔ واضح رہے کہ ’آج کی رات‘ ایک آئٹم سانگ ہے جو فلم ’استری 2‘  کا حصہ ہے۔ اس فلم میں شردھا کپور، راجکمار راؤ، ابھیشیک بنرجی، پنکج ترپاٹھی اور اپارشکتی کھرانا نے اہم کردار ادا کیے ہیں۔

تمنا بھاٹیا کے اس سپر ہٹ گانے کو اپنی آواز مدھوبنتی باگچی، دیویہ کمار اور سچن-جگر نے دی ہے۔ گانے کی موسیقی سچن اور جگر نے ترتیب دی ہے جبکہ اس کے بول معروف نغمہ نگار امیتابھ بھٹاچاریہ نے لکھے ہیں۔ موسیقی، بول اور شاندار پرفارمنس کے امتزاج نے اس گانے کو یادگار بنا دیا۔تمنا بھاٹیا کی بات کی جائے تو انہوں نے اس سے قبل بھی کئی کامیاب آئٹم سانگز کیے ہیں، جنہیں ناظرین نے بے حد پسند کیا۔ چاہے اداکاری ہو یا رقص، ہر انداز میں تمنا نے اپنی ایک الگ پہچان بنائی ہے۔ ان کی خوبصورتی اور اسکرین پریزنس کے مداح دیوانہ وار ان کی ہر جھلک کو پسند کرتے ہیں، اور ’آج کی رات‘ کی کامیابی اس بات کا واضح ثبوت ہے۔

بھارت ایکسپریس اردو