Kiara Advani on Salman: سلمان خان کے مشورے پر کیارا اڈوانی نے بدلا اپنا اصل نام، اداکارہ نے کیا دلچسپ انکشاف

نئی دہلی: بالی ووڈ کی معروف اداکارہ کیارا اڈوانی نے انکشاف کیا ہے کہ فلمی کیریئر کے آغاز میں انہیں سپر اسٹار سلمان خان نے ایک ایسی اہم نصیحت دی تھی، جس نے ان کی پیشہ ورانہ زندگی کی سمت بدل دی۔ کیارا نے بتایا کہ سلمان خان کے مشورے پر ہی انہوں نے اپنا اصل نام تبدیل کیا تھا۔کیارا اڈوانی نے سال 2014 میں فلم “فگلی” سے بالی ووڈ میں قدم رکھا۔ اس کے بعد وہ “ایم ایس دھونی: دی اَن ٹولڈ اسٹوری”، “کبیر سنگھ”، “گڈ نیوز”، “گلٹی” اور “اندو کی جوانی” جیسی کامیاب فلموں میں اپنی اداکاری کا لوہا منوا چکی ہیں۔ اداکارہ کا کہنا ہے کہ کامیابی کے اس سفر میں سخت محنت کے ساتھ سلمان خان کی ایک نصیحت نے بھی اہم کردار ادا کیا۔فلم فیئر کو دیے گئے ایک انٹرویو میں کیارا نے کہا کہ انہیں زندگی کی سب سے قیمتی نصیحت سلمان خان سے ملی۔ ان کے مطابق سلمان نے کہا تھا، “محنت کرو اور اپنی محنت کو ہی اپنی پہچان بننے دو۔” کیارا نے بتایا کہ وہ آج بھی اس مشورے کو اپنی زندگی کا اصول مانتی ہیں۔

اداکارہ نے یہ بھی بتایا کہ ان کا اصل نام عالیہ تھا، لیکن سلمان خان نے انہیں مشورہ دیا کہ چونکہ بالی ووڈ میں پہلے ہی ایک کامیاب اداکارہ عالیہ بھٹ موجود ہیں، اس لیے بہتر ہوگا کہ وہ اپنا اسکرین نیم تبدیل کر لیں۔ سلمان کے مشورے پر انہوں نے “کیارا اڈوانی” نام اختیار کیا، جو بعد میں ان کی شناخت بن گیا۔ذاتی زندگی کے حوالے سے بھی کیارا نے اسی انٹرویو میں دلچسپ اشارہ دیا تھا۔ میڈیا رپورٹس کے مطابق وہ اداکار سدھارتھ ملہوترا کو ڈیٹ کر رہی تھیں۔ اس بارے میں سوال کیے جانے پر کیارا نے مسکراتے ہوئے کہا تھا کہ وہ اسی سال چند ماہ پہلے ایک ڈیٹ پر گئی تھیں اور اتنا اشارہ کافی ہے کہ لوگ خود اندازہ لگا لیں کہ وہ کس کی بات کر رہی ہیں۔حال ہی میں کیارا اڈوانی نے سوشل میڈیا پر اپنی نئی تصاویر شیئر کیں، جن میں ایک تصویر میں وہ سیاہ جبکہ دوسری میں سفید لباس میں نظر آئیں۔ ان تصاویر کو مداحوں کی جانب سے زبردست پذیرائی ملی اور صرف ایک گھنٹے کے اندر 6 لاکھ سے زائد لائکس حاصل ہوئے۔ یہ تصاویر فلم فیئر کور شوٹ کا حصہ تھیں، جن میں کیارا کا اسٹائل اور دلکش انداز مداحوں کو بے حد پسند آیا۔

بھارت ایکسپریس اردو