Rekha Birthday Special: ریکھا ہوئیں 71برس کی، لیکن ان کے آئیکونک رولز ہمیشہ جوان

بالی وُڈ کی سدا بہار  اداکارہ ریکھا 71 سال کی ہو گئی ہیں۔ عمر بڑھنے کے باوجود ان کی اداکاری اور انداز آج بھی نوجوان اداکاراؤں کو پیچھے چھوڑ دیتے ہیں۔ آج بھی جب وہ کسی ایونٹ میں نظر آتی ہیں تو تمام توجہ اپنی طرف مبذول کروا لیتی ہیں۔ اس خاص موقع پر آئیے جانتے ہیں ان کے چند آئیکونک کرداروں کے بارے میں، جو آج بھی مداحوں کے دلوں پر راج کرتے ہیں اور جنہیں کوئی اور اداکارہ اس انداز میں ادا نہیں کر سکتی۔

امراؤ جان (1981)

ریکھا کا یہ کردار ان کے فلمی کیریئر کا ایک سنگ میل مانا جاتا ہے۔ ’’امراؤ جان‘‘ میں انہوں نے لکھنؤ کی ایک مشہور طوائف کا کردار ادا کیا، جس میں ان کی نفیس اردو، اندازِ گفتگو، رقص اور جذباتی اداکاری نے فلم کو کلاسک بنا دیا۔ اس کردار نے نہ صرف انہیں نیشنل ایوارڈ دلایا بلکہ ریکھا کو ایک سنجیدہ اداکارہ کے طور پر بھی شناخت دی۔ آج بھی امراؤ جان کا ذکر ہو تو سب سے پہلے ریکھا کا چہرہ ذہن میں آتا ہے۔

خوبصورت (1980)

سال 1980 میں فلم ’’خوبصورت‘‘ میں ریکھا نے منجو دیال کا کردار نبھایا تھا، جو کہ مشہور ہدایتکار رشیکیش مکھرجی کی ڈائریکشن میں بنی تھی۔ اس فلم میں ریکھا کے چلبلی اور مزاحیہ انداز کو ناظرین نے بے حد پسند کیا۔ ان کی فطری اداکاری، دلکش مسکراہٹ اور زندگی سے بھرپور کردار نے فلم کو نہ صرف کامیاب بنایا بلکہ منجو دیال کو ریکھا کے سب سے یادگار کرداروں میں شامل کر دیا۔

کوئی مل گیا (2003)

سال 2003 میں ریلیز ہونے والی فلم  ’’کوئی مل گیا‘‘ میں ریکھا نے سونیا مہرا کا کردار ادا کیا تھا۔ اس فلم میں ریکھا کے ساتھ ہیرتک روشن اور پریتی زنٹا بھی مرکزی کرداروں میں شامل تھے۔ ریکھا کا یہ کردار بھی ناظرین کو بہت پسند آیا تھا، جس میں انہوں نے اپنی اداکاری سے سب کے دل جیت لیے۔

بھارت ایکسپریس اردو۔