‘Ranabali’ promo song released: شادی کے بعد رشمیکا اور وجے دیوراکونڈا کی پہلی فلم ‘رانابالی’ کا پرومو سانگ ریلیز

ممبئی: جنوبی ہند کی فلم انڈسٹری کے سب سے زیادہ مقبول جوڑوں میں سے ایک رشمیکا مندانہ اور وجے دیوراکونڈا کی شادی کی تقریب 26 فروری کو ادے پور میں ایک نجی تقریب میں ہوئی۔ شادی کے بعد بھی یہ جوڑی مسلسل خبروں اور سوشل میڈیا پر چھائی ہوئی ہے۔ ہفتہ کے روز ٹی سیریز تیلگو کے یوٹیوب چینل پر “ایندھائیا سامی اسپیشل سرپرائز” کے عنوان سے ایک ویڈیو جاری کی گئی، جس میں تاریخی تیلگو فلم ‘رانابالی’ کا پرومو سانگ پیش کیا گیا۔

فلم کی ٹیم کی جانب سے اس خصوصی ویڈیو کو رانابالی اور جیمّا کی زندگی کے اہم لمحے کی خوشی میں شیئر کیا گیا ہے۔ پرومو سانگ ریلیز ہوتے ہی مداحوں میں زبردست جوش دیکھنے کو ملا، کیونکہ شادی کے بعد یہ دونوں ستاروں کی پہلی مشترکہ فلم ہے۔ آن اسکرین اور آف اسکرین دونوں ہی انداز میں اس جوڑی کو مداح بے حد پسند کرتے ہیں۔

ویڈیو ریلیز کے چند گھنٹوں میں ہی لاکھوں ویوز اور ہزاروں تبصرے سامنے آ چکے ہیں۔ پرومو میں فلم کے شادی کے مناظر اور دونوں اداکاروں کی رومانوی کیمسٹری کو خاص طور پر دکھایا گیا ہے، جسے شائقین کی جانب سے بھرپور پذیرائی مل رہی ہے۔

گانے کو شویتا موہن اور اجے گوگاولے نے آواز دی ہے، جبکہ موسیقی معروف جوڑی اجے-اتل نے ترتیب دی ہے۔ گیت کے بول سرسوتی پتر رام جوگیہ شاستری نے لکھے ہیں اور ریکارڈنگ و مکسنگ وجے دیال نے انجام دی۔

اداکارہ رشمیکا مندانہ اور وجے دیوراکونڈا نے فلم کا پوسٹر اپنی انسٹاگرام اسٹوری پر بھی شیئر کیا۔ رشمیکا نے پوسٹر کے ساتھ لکھا، “یہ ہمارے لیے ایک خوبصورت سرپرائز ہے اور اب آپ سب کے لیے بھی۔ رانابالی اور جیمّا — یہی ہم ہیں۔”

فلم ‘رانابالی’ میں رشمیکا جیمّا جبکہ وجے دیوراکونڈا رانابالی کے مرکزی کردار میں نظر آئیں گے۔ راہل سنکرتیان کی ہدایت کاری میں بننے والی یہ فلم 19ویں صدی کے برطانوی دورِ حکومت اور رائلسیما کی تاریخی پس منظر سے متاثر ہے، جو 11 ستمبر کو سینما گھروں میں ریلیز ہوگی۔

بھارت ایکسپریس۔