National Film Awards Ceremony: صدر جمہوریہ دروپدی مرمو ایکتا نگر پہنچیں، منگل کو 72ویں نیشنل فلم ایوارڈز تقریب میں ہوں گی شریک

صدر جمہوریہ دروپدی مرمو پیر کی شام گجرات کے نرمدا ضلع میں واقع ایکتا نگر پہنچیں، جہاں وہ 22 ستمبر کو منعقد ہونے والی 72ویں نیشنل فلم ایوارڈز تقریب میں شرکت کریں گی۔ صدر جمہوریہ اس تقریب کی مہمانِ خصوصی ہوں گی اور مختلف زمروں میں ایوارڈ حاصل کرنے والے فاتحین کو قومی فلم ایوارڈ پیش کریں گی۔ صدر جمہوریہ کے گجرات پہنچنے پر ریاستی گورنر آچاریہ دیوورت، گجرات حکومت کے پروٹوکول وزیر پرفل پانشیریا، بھروچ کے رکن پارلیمنٹ منسکھ بھائی وساوا، ناندود کی رکن اسمبلی ڈاکٹر درشن بین دیش مکھ، ایس ایس این این ایل کے منیجنگ ڈائریکٹر مکیش پوری سمیت متعدد اعلیٰ حکام نے ہوائی اڈے پر ان کا استقبال کیا۔

پہلی بار ایکتا نگر میں قومی سطح کی تقریب

72ویں نیشنل فلم ایوارڈز کی تقریب پہلی مرتبہ ایکتا نگر میں منعقد کی جا رہی ہے۔ قومی سطح کی اس تقریب میں ملک کے مختلف شعبوں سے تعلق رکھنے والی معروف شخصیات، فلمی دنیا کے نامور اداکار اور دیگر مدعو مہمان شرکت کریں گے۔ تقریب میں صدر جمہوریہ دروپدی مرمو کے علاوہ گجرات کے وزیر اعلیٰ بھوپیندر پٹیل، مرکزی وزیر ریلوے اشونی ویشنو اور بالی ووڈ و جنوبی ہند کی فلمی صنعت سے وابستہ کئی معروف شخصیات بھی موجود رہیں گی۔

75 منٹ کی تقریب، مختلف زمروں میں دیے جائیں گے ایوارڈ

مرکزی تقریب تقریباً 75 منٹ جاری رہے گی۔ اس دوران مختلف زمروں کے فاتحین کو ایوارڈ اور اعزازی اسناد پیش کی جائیں گی۔ اس کے بعد صدر جمہوریہ فلمی دنیا سے وابستہ شخصیات سے خطاب کریں گی۔ شام کے وقت نرمدا ندی کے کنارے ثقافتی پروگرام کا انعقاد بھی کیا جائے گا۔ اس کے علاوہ اسٹیچو آف یونٹی پر خصوصی لیزر اور لائٹ اینڈ ساؤنڈ شو بھی مہمانوں کی توجہ کا مرکز ہوگا۔

’آرٹیکل 370‘ کو بہترین فیچر فلم کا ایوارڈ

اس مرتبہ ’آرٹیکل 370‘ کو بہترین فیچر فلم اور ’سری کانت‘ کو بہترین ہندی فلم کا ایوارڈ دیا جائے گا۔ اداکاری کے اہم زمروں میں یامی گوتم کو ’آرٹیکل 370‘، مموٹی کو ’بھرم یگم‘ اور کارتک آریان کو ’چندو چیمپئن‘ کے لیے اعزاز دیا جائے گا۔وہیں رندیپ ہڈا کو فلم ’سواتنتر ویر ساورکر‘ کے لیے بہترین نوآموز ہدایت کار کا ایوارڈ دیا جائے گا۔

ایک ہزار مہمانوں کے لیے تیار کیا گیا ڈوم

تقریب کے لیے اسٹیچو آف یونٹی کے قریب تقریباً 1,000 مہمانوں کی گنجائش والا ایک وسیع جرمن ایلومینیم ڈوم تیار کیا گیا ہے۔ مکمل طور پر واٹر پروف اور ایئر کنڈیشنڈ اس ڈوم میں جدید روشنی اور صوتی نظام کے ساتھ ایک شاندار اسٹیج بھی تیار کیا گیا ہے۔ تقریب میں آنے والے مہمانوں کے لیے گجرات کے روایتی کھانوں کا بھی انتظام کیا گیا ہے۔ قومی فلم ایوارڈز کی اس تقریب کے ذریعے ایکتا نگر میں ملک کی فلمی صنعت اور ثقافتی ورثے کو ایک بڑے پلیٹ فارم پر پیش کیا جائے گا۔

بھارت ایکسپریس اردو۔