South Indian cinema: نین تارا نے ٹاکسک کی ہدایت کار گیتو موہن داس کی جم کر تعریف کی، بولیں- وہ ہر فنکار کو اپنا بنا لیتی ہیں

نئی دہلی : جنوبی سنیما کی انتہائی متوقع فلموں میں شامل ’ٹاکسک: اے فیری ٹیل فار گرون اپس‘ کی ریلیز کو لے کر ناظرین میں کافی جوش پایا جا رہا ہے۔ فلم میں کنڑ سپر اسٹار یش مرکزی کردار میں نظر آئیں گے، جب کہ نین تارا، کیارا اڈوانی، تارا سوتاریا، رکمنی وسنت اور ہما قریشی بھی اہم کردار ادا کر رہی ہیں۔ فلم کی اسٹار کاسٹ اور کہانی کے علاوہ اس کی ہدایت کار گیتو موہن داس کے کام کرنے کا انداز بھی توجہ حاصل کر رہا ہے۔حال ہی میں فلم کے ٹریلر لانچ ایونٹ کے دوران نین تارا نے گیتو موہن داس کے ساتھ کام کرنے کا تجربہ شیئر کیا اور ان کی شخصیت کے ایک ایسے پہلو کا ذکر کیا جو عام طور پر پردے کے پیچھے رہتا ہے۔ نین تارا نے کہا کہ اب تک سبھی لوگ گیتو کی بطور ہدایت کار تعریف کر چکے ہیں، لیکن وہ ان کی شخصیت کے اس پہلو کے بارے میں بات کرنا چاہتی ہیں جو شاید عام طور پر نظر نہیں آتا۔

نین تارا کے مطابق گیتو صرف فنکاروں سے ان کا کام نہیں کرواتیں بلکہ ان کے جذبات کو بھی سمجھتی ہیں اور مشکل وقت میں ان کے ساتھ کھڑی رہتی ہیں۔ انہوں نے کہا کہ فلم کی شوٹنگ کے دوران فنکاروں کو مختلف حالات سے گزرنا پڑا۔ کبھی کسی کا دن اچھا رہا تو کبھی کسی کو مشکل سین کا سامنا کرنا پڑا۔ ایسے وقت میں گیتو نے ہدایت کار کے ساتھ ساتھ ایک مضبوط سہارے کا کردار بھی ادا کیا۔اداکارہ نے کہا کہ گیتو ہر صورتحال میں اپنے فنکاروں کے ساتھ موجود رہیں۔ یہی خوبی انہیں ایک مختلف اور خاص ہدایت کار بناتی ہے۔ وہ اپنے فنکاروں کو محض فلم کا حصہ نہیں سمجھتیں بلکہ ان کے ساتھ جذباتی رشتہ بھی قائم کرتی ہیں۔

اس موقع پر نین تارا نے فلم کی شوٹنگ سے جڑا ایک جذباتی واقعہ بھی سنایا۔ انہوں نے بتایا کہ ایک مرتبہ شوٹنگ کے دوران گیتو ایک فنکار کو لے کر بہت جذباتی ہوگئی تھیں اور اپنے جذبات پر قابو نہیں رکھ سکیں۔ اس کے بعد وہ کچھ دیر تک اس فنکار کے ساتھ رہیں تاکہ اسے تنہا محسوس نہ ہو۔نین تارا نے بتایا کہ جب گیتو واپس آئیں تو انہوں نے ان سے پوچھا کہ آخر وہاں کیا ہوا تھا۔ نین تارا کو خدشہ تھا کہ شاید جذبات میں آکر گیتو نے ایسی کوئی بات کہہ دی ہو جو انہیں نہیں کہنی چاہیے تھی۔ انہوں نے گیتو سے پوچھا، ’’کیا ہوا؟ کیا آپ اپنا آپا کھو بیٹھی تھیں؟ کیا آپ نے کوئی ایسی بات کہہ دی جو نہیں کہنی چاہیے تھی؟‘‘

نین تارا کے مطابق گیتو نے انتہائی سادگی سے جواب دیا، ’’نہیں، میں نے بس پیار دیا۔‘‘ اس جواب نے نین تارا کو بہت متاثر کیا۔ انہوں نے کہا کہ گیتو جس بھی فنکار کے ساتھ کام کرتی ہیں، اس کے ساتھ ایک خاص رشتہ قائم کر لیتی ہیں۔واضح رہے کہ ’ٹاکسک: اے فیری ٹیل فار گرون اپس‘ کی ہدایت کاری گیتو موہن داس نے کی ہے، جبکہ فلم کی کہانی یش اور گیتو موہن داس نے مشترکہ طور پر لکھی ہے۔ فلم میں یش کے ساتھ نین تارا، کیارا اڈوانی، تارا سوتاریا، رکمنی وسنت اور ہما قریشی اہم کرداروں میں نظر آئیں گی۔فلم کی شوٹنگ کنڑ اور انگریزی زبان میں کی گئی ہے، جب کہ اسے ہندی، تمل، تیلگو، ملیالم سمیت کئی زبانوں میں ڈب کیا گیا ہے۔ کے وی این پروڈکشنز اور مونسٹر مائنڈ کریئیشنز کے بینر تلے بننے والی یہ فلم 26 اگست کو سینما گھروں میں ریلیز ہونے والی ہے۔

بھارت ایکسپریس اردو