Is Ajay Devgn’s ‘Drishyam 3’: کیا اجے دیوگن کی ‘درشیم 3’ کا ہندی ورژن موہن لال کی ملیالم فلم سے مختلف ہوگا؟ میکرز نے کیا بڑا انکشاف

نئی دہلی : موہن لال کی مشہور سسپنس تھرلر فرنچائز ‘درشیم’ کے تیسرے حصے کو لے کر شائقین میں زبردست جوش پایا جا رہا ہے۔ ملیالم سپر اسٹار موہن لال کی آنے والی فلم ‘درشیم 3’ کی ریلیز کا انتظار کیا جا رہا ہے، جب کہ اجے دیوگن کے ہندی ورژن کو لے کر بھی مداح بے حد پُرجوش ہیں۔ اسی دوران فلم کے پروڈیوسرز کمار منگت پاٹھک اور ابھیشیک پاٹھک نے انکشاف کیا ہے کہ ہندی ورژن اصل ملیالم فلم سے کافی مختلف ہوگا۔

کب ریلیز ہوگی ‘درشیم 3’؟

خبر رساں ایجنسی اے این آئی سے گفتگو کرتے ہوئے ابھیشیک پاٹھک نے بتایا کہ ‘درشیم 3’ کے ہندی ورژن کی ریلیز کے لیے 2 اکتوبر کی تاریخ پر غور کیا جا رہا ہے، کیونکہ یہ تاریخ فلم کی کہانی سے خاص طور پر جڑی ہوئی ہے۔ انہوں نے کہا،“‘درشیم 3’ دو اکتوبر کو ریلیز ہوگی۔ یہ درشیم ڈے بن چکا ہے اور فلم کی پہچان کا حصہ ہے۔ ہمیں لگتا ہے کہ ہندی ورژن بھی اسی تاریخ پر ریلیز کیا جائے گا۔ اس وقت فلم پوسٹ پروڈکشن مرحلے میں ہے اور تیاری جاری ہے۔”

ہندی ورژن کیوں ہوگا مختلف؟

اگرچہ ملیالم اور ہندی دونوں ورژنز کی کہانی وہیں سے شروع ہوگی جہاں ‘درشیم 2’ ختم ہوئی تھی، لیکن ابھیشیک پاٹھک کے مطابق ہندی فلم میں اسکرین پلے اور اسٹوری ٹیلنگ کا انداز کافی حد تک بدلا گیا ہے۔انہوں نے کہا،“اصل فرق آپ کو ہندی ٹریلر دیکھنے کے بعد محسوس ہوگا۔ ملیالم ورژن ایک فیملی ڈراما ہے اور جیٹو جوزف نے بھی لانچ ایونٹ میں کہا تھا کہ یہ کہانی ملیالم ناظرین کے ذوق کے مطابق بنائی گئی ہے۔”ابھیشیک نے مزید بتایا کہ ہندی ناظرین ایک الگ طرح کا سنیما پسند کرتے ہیں، اسی لیے فلم میں تبدیلیاں کی گئی ہیں۔ انہوں نے کہا،“ہمارے ہندی ناظرین کی پسند مختلف ہے۔ ہم نے ‘درشیم 2’ میں بھی کئی تبدیلیاں کی تھیں اور لوگوں نے انہیں پسند کیا تھا۔ اس بار بھی کہانی اور اسکرین پلے میں خاص تبدیلیاں کی گئی ہیں تاکہ ناظرین کو نیا تجربہ مل سکے۔”

‘درشیم’ فرنچائز کی مقبولیت

‘درشیم’ فرنچائز کی کہانی جارج کُٹّی اور اس کے خاندان کے گرد گھومتی ہے، جن کی زندگی ایک سینئر پولیس افسر کے بیٹے کی گمشدگی کے بعد بدل جاتی ہے۔ پہلی ملیالم فلم 2013 میں ریلیز ہوئی تھی اور اپنی سنسنی خیز کہانی، زبردست سسپنس اور تہہ دار اسکرین پلے کی وجہ سے بڑی کامیابی ثابت ہوئی۔اس کے بعد 2021 میں ‘درشیم 2’ ریلیز کی گئی، جسے ناقدین اور شائقین دونوں نے بے حد سراہا۔ فلم کی مقبولیت کے بعد اس کے ہندی، تمل، تیلگو سمیت کئی زبانوں میں ریمیک بنائے گئے۔ ہندی ورژن میں اجے دیوگن مرکزی کردار ادا کر رہے ہیں، جبکہ اصل ملیالم فلم میں موہن لال نے اپنی اداکاری سے ناظرین کو متاثر کیا۔قابل ذکر بات یہ ہے کہ موہن لال کی ‘درشیم 3’ 21 مئی کو دنیا بھر کے سینما گھروں میں ریلیز ہونے جا رہی ہے، جس کا شائقین بے صبری سے انتظار کر رہے ہیں۔

بھارت ایکسپریس اردو