World Cup: ورلڈ کپ کے آغاز سے قبل بنگلہ دیش کو بڑا دھچکا، شکیب الحسن فٹبال کھیلتے ہوئے زخمی ہوگئے

2023 ون ڈے ورلڈ کپ 5 اکتوبر سے ہندوستان میں شروع ہوگا۔ اس سے قبل وارم اپ میچز آج یعنی جمعہ 29 ستمبر سے کھیلے جا رہے ہیں۔ کرکٹ کے سب سے بڑےمقابلہ کے آغاز سے قبل بنگلہ دیش کرکٹ ٹیم کو بڑا جھٹکا لگا ہے۔

دراصل ٹیم کے کپتان شکیب الحسن فٹبال کھیلتے ہوئے زخمی ہو گئے ہیں۔ رپورٹ کے مطابق شکیب ورلڈ کپ کے وارم اپ میچ اور پہلے میچ دونوں سے باہر ہو چکے ہیں۔ میڈیا رپورٹس کے مطابق بنگلہ دیش کے کپتان شکیب الحسن ورلڈ کپ کے دونوں وارم اپ میچز میں شرکت نہیں کریں گے۔ اس کے ساتھ وہ ورلڈ کپ کے پہلے میچ سے بھی باہر ہو سکتے ہیں۔

سری لنکا کے خلاف وارم اپ میچ میں مہدی حسن معراج کپتان ہیں

آپ کو بتاتے چلیں کہ بنگلہ دیش کی ٹیم اپنا پہلا وارم اپ میچ سری لنکا کے خلاف کھیل رہی ہے۔ اس میچ کی کپتانی اسپن آل راؤنڈر مہدی حسن معراج کر رہے ہیں۔ شکیب کی انجری کو بنگلہ دیش کے لیے بڑا دھچکا قرار دیا جا رہا ہے۔ شکیب الحسن اکیلے بلے بازی کے ساتھ ساتھ باؤلنگ سے بھی ٹیم کو فتح سے ہمکنار کر سکتے ہیں۔ ان کی چوٹ ٹیم کے لیے بڑا مسئلہ بن سکتی ہے۔

نیوزی لینڈ کے کپتان کین ولیمسن بھی پہلے میچ سے باہر ہو گئے

قابل ذکر ہے کہ نیوزی لینڈ کو بھی ورلڈ کپ شروع ہونے سے پہلے ہی بڑا جھٹکا لگا ہے۔ کیوی ٹیم کے کپتان کین ولیمسن مکمل فٹ نہ ہونے کے باعث ورلڈ کپ کے پہلے میچ سے باہر ہو گئے ہیں۔ کین ولیمسن انگلینڈ کے خلاف میچ میں نہیں کھیلیں گے۔ ولیمسن آئی پی ایل کے پہلے میچ میں زخمی ہو گئے تھے۔ ورلڈ کپ کا پہلا میچ دفاعی چیمپئن انگلینڈ اور نیوزی لینڈ کے درمیان احمد آباد کے نریندر مودی اسٹیڈیم میں کھیلا جائے گا۔