Afghanistan’s star spinner, Rashid Khan: راشد خان نے ٹی 20 انٹرنیشنل میں وکٹوں کی ڈبل سنچری مکمل کی، ایسا کرنے والے بن گئے دنیا کے پہلے بولر

نئی دہلی : افغانستان کے اسٹار لیگ اسپنر راشد خان نے جمعرات کو شارجہ میں زمبابوے کے خلاف کھیلے گئے ٹی 20 مقابلے میں تاریخ رقم کردی۔ انہوں نے ٹی 20 انٹرنیشنل کرکٹ میں اپنے 200 وکٹ مکمل کرلیے ہیں۔ اس طرح وہ یہ کارنامہ انجام دینے والے دنیا کے پہلے گیند باز بن گئے ہیں۔زمبابوے کے خلاف میچ سے پہلے راشد خان کے نام ٹی 20 انٹرنیشنل میں 199 وکٹ تھے۔ میچ کے دوران انہوں نے زمبابوے کے وکٹ کیپر بلے باز تادیواناشے مارومانی کو آؤٹ کرکے اپنی 200 ویں وکٹ حاصل کی۔ اس مقابلے میں راشد خان نے صرف ایک وکٹ حاصل کی۔دائیں ہاتھ کے لیگ اسپنر راشد خان نے اپنے 120 ویں ٹی 20 انٹرنیشنل میچ میں یہ تاریخی کامیابی حاصل کی۔ ٹی 20 انٹرنیشنل میں سب سے زیادہ وکٹ لینے والے گیند بازوں کی فہرست میں وہ اب سب سے آگے ہیں اور فی الحال ان کے آس پاس کوئی دوسرا گیند باز نہیں ہے۔

ٹی 20 انٹرنیشنل میں سب سے زیادہ وکٹ لینے والے 5 بولر

ٹی 20 انٹرنیشنل کرکٹ میں سب سے زیادہ وکٹ حاصل کرنے والے گیند بازوں کی فہرست میں انگلینڈ کے عادل رشید دوسرے نمبر پر ہیں۔ انہوں نے 153 میچوں میں 171 وکٹ حاصل کیے ہیں۔اس فہرست میں ہانگ کانگ کے احسان خان 119 میچوں میں 165 وکٹ کے ساتھ تیسرے نمبر پر ہیں، جبکہ نیوزی لینڈ کے ایش سوڈھی بھی 142 میچوں میں 165 وکٹ حاصل کرکے چوتھے مقام پر ہیں۔ نیوزی لینڈ ہی کے ٹم ساؤتھی 126 میچوں میں 164 وکٹ کے ساتھ پانچویں نمبر پر ہیں۔

مجموعی ٹی 20 کرکٹ میں بھی راشد خان سرفہرست

راشد خان صرف ٹی 20 انٹرنیشنل ہی نہیں بلکہ مجموعی ٹی 20 کرکٹ میں بھی سب سے زیادہ وکٹ لینے والے بولر ہیں۔ انہوں نے بین الاقوامی اور مختلف لیگز سمیت اب تک 551 میچ کھیلے ہیں، جن میں ان کے نام 741 وکٹ درج ہیں۔

ارشد دیپ سنگھ کے پاس بھی تاریخ رقم کرنے کا موقع

ہندوستان کی جانب سے ٹی 20 انٹرنیشنل میں سب سے زیادہ وکٹ حاصل کرنے کا ریکارڈ بائیں ہاتھ کے تیز گیند باز ارشد دیپ سنگھ کے نام ہے۔ انہوں نے اب تک 102 میچوں میں 149 وکٹ حاصل کیے ہیں۔جمعہ کو نیوزی لینڈ کے خلاف ہونے والے چوتھے ٹی 20 مقابلے میں ارشد دیپ سنگھ کے پاس 150 وکٹ مکمل کرنے کا موقع ہوگا۔ اس کے لیے انہیں صرف ایک وکٹ درکار ہے۔دوسری جانب نیوزی لینڈ کے کپتان مچل سینٹنر بھی اسی مقابلے میں ٹی 20 انٹرنیشنل میں اپنی 150 وکٹ مکمل کرسکتے ہیں۔ انہیں بھی یہ سنگ میل حاصل کرنے کے لیے صرف ایک وکٹ کی ضرورت ہے۔

بھارت ایکسپریس اردو