India vs Sri Lanka: بھارت بمقابلہ سری لنکا: ہرش، تنوش، وپراج اور شِوانگ نیٹ بولرز کے طور پر ٹیم انڈیا سے منسلک

بھارتی کرکٹ کنٹرول بورڈ (بی سی سی آئی) نے بدھ کو جاری ایک سرکاری بیان میں کہا، ’’ہرش دوبے، شِوانگ کمار، تنوش کوٹیان اور وپراج نگم سری لنکا کے خلاف پہلے ٹیسٹ کی تیاری میں ٹیم کی مدد کے لیے نیٹ بولرز کے طور پر بھارتی اسکواڈ میں شامل ہوئے ہیں۔‘‘ یہ اعلان اس وقت کیا گیا جب شبھمن گل کی قیادت میں بھارتی ٹیم نے کولمبو کے نان ڈسکرپٹس کرکٹ کلب (این سی سی) گراؤنڈ میں اپنا پہلا پریکٹس سیشن شروع کیا۔ اگرچہ ان چاروں کھلاڑیوں کے مرکزی اسکواڈ یا پلیئنگ الیون میں جگہ بنانے کے امکانات کم ہیں، تاہم یہ موقع ان کے لیے سیکھنے، تجربہ حاصل کرنے اور مستقبل میں آگے بڑھنے کے لحاظ سے نہایت اہم سمجھا جا رہا ہے۔ ودربھ کی جانب سے گھریلو کرکٹ کھیلنے والے بائیں ہاتھ کے اسپن آل راؤنڈر ہرش دوبے رواں سال کے آغاز میں افغانستان کے خلاف ون ڈے ڈیبیو کر چکے ہیں۔ وہ افغانستان کے خلاف واحد ٹیسٹ، انگلینڈ کے خلاف تیسرے ون ڈے اور زمبابوے میں کھیلی گئی ٹی ٹوئنٹی انٹرنیشنل سیریز کے لیے بھی بھارتی اسکواڈ کا حصہ رہے تھے۔

تنوش کوٹیان نے گزشتہ دو گھریلو سیزن میں مسلسل شاندار کارکردگی کا مظاہرہ کیا

دوسری جانب ممبئی کے آف اسپنر تنوش کوٹیان نے گزشتہ دو گھریلو سیزن میں مسلسل شاندار کارکردگی کا مظاہرہ کیا ہے۔ انہیں 25-2024 بارڈر-گواسکر ٹرافی کے دوران روی چندرن اشون کی جگہ بھارتی ٹیم میں شامل کیا گیا تھا، جنہوں نے برسبین میں تیسرے ٹیسٹ کے بعد بین الاقوامی کرکٹ سے ریٹائرمنٹ کا اعلان کیا تھا۔ لیگ اسپنر وپراج نگم جون میں سری لنکا میں منعقدہ 50 اوورز کی سہ فریقی سیریز کے دوران انڈیا اے ٹیم کا حصہ تھے۔ وہ انڈین پریمیئر لیگ (آئی پی ایل) میں دہلی کیپیٹلز کی نمائندگی کرتے ہوئے بھی اپنی صلاحیتوں کا مظاہرہ کر چکے ہیں۔گھریلو کرکٹ میں مدھیہ پردیش کی نمائندگی کرنے والے اور آئی پی ایل 2026 میں سن رائزرس حیدرآباد کی جانب سے کھیلنے والے شِوانگ کمار جون میں نیو چنڈی گڑھ میں افغانستان کے خلاف واحد ٹیسٹ سے قبل بھی بھارتی ٹیم کے نیٹ بولر رہ چکے ہیں۔بھارتی ٹیم 7 سے 9 اگست تک کولمبو کے این سی سی گراؤنڈ میں تین روزہ پریکٹس میچ کھیلے گی، جس کے بعد اسکواڈ گال روانہ ہوگا، جہاں 15 اگست سے سیریز کا پہلا ٹیسٹ میچ شروع ہوگا۔ سیریز کا دوسرا اور آخری ٹیسٹ 23 سے 27 اگست تک سنگھالی اسپورٹس کلب، کولمبو میں کھیلا جائے گا۔

بھارت ایکسپریس اردو۔