India Vs Afghanistan: بھارت کی شاندار فتح، افغانستان کو 300 رنز کے بھاری فرق سے شکست

ملّاں پور کے مہاراجہ یادویندر سنگھ بین الاقوامی کرکٹ اسٹیڈیم میں کھیلے گئے واحد ٹیسٹ میچ میں بھارت نے افغانستان کو ایک اننگز اور 300 رنز کے بڑے فرق سے شکست دے دی۔ یہ مقابلہ تیسرے ہی دن اختتام پذیر ہو گیا، جس میں بھارتی ٹیم نے بیٹنگ، باؤلنگ اور مجموعی کارکردگی میں مکمل برتری دکھائی۔

بھارت کی پہلی اننگز میں رنز کا پہاڑ

پہلے بیٹنگ کرتے ہوئے بھارت نے مضبوط آغاز کیا اور بڑا اسکور کھڑا کیا۔ کے ایل راہول نے شاندار 100 رنز بنائے، جبکہ شبمن گل نے 126 رنز کی عمدہ اننگز کھیلی۔ سائی سدرشن اور رشبھ پنت نے 81، 81 رنز کی اہم شراکتیں پیش کیں۔ اس کے علاوہ واشنگٹن سندر نے ناقابلِ شکست 52 رنز بنا کر ٹیم کی پوزیشن مزید مضبوط کر دی۔بھارت نے 8 وکٹوں کے نقصان پر 564 رنز بنا کر اپنی پہلی اننگز ڈکلیئر کر دی۔

افغانستان کی پہلی اننگز بری طرح ناکام

جواب میں افغانستان کی ٹیم بھارتی باؤلرز کے سامنے زیادہ دیر نہ ٹھہر سکی اور صرف 152 رنز پر ڈھیر ہو گئی۔ افغان ٹیم کی جانب سے رحمت شاہ نے سب سے زیادہ 60 رنز اسکور کیے، لیکن دیگر بلے باز خاطر خواہ مزاحمت نہ کر سکے۔

بھارت کی جانب سے ٹیسٹ ڈیبیو کرنے والے مانو سوتھار نے شاندار باؤلنگ کا مظاہرہ کرتے ہوئے 6 وکٹیں حاصل کیں، جبکہ پرسدھ کرشنا نے 3 کھلاڑیوں کو آؤٹ کیا۔

فالو آن کے بعد بھی افغانستان کی مزاحمت نہ چل سکی

پہلی اننگز میں بھاری خسارے کے باعث بھارت نے افغانستان کو فالو آن دیا۔ دوسری اننگز میں صدیق اللہ اتل اور عبدالمالک نے 42 رنز کی شراکت قائم کر کے کچھ مزاحمت دکھائی، لیکن اس کے بعد وکٹیں مسلسل گرتی رہیں۔صدیق اللہ اتل نے 42 رنز بنائے جبکہ رحمان اللہ گرباز 24 رنز تک محدود رہے۔ پہلی اننگز کے نصف سنچری ساز رحمت شاہ اس بار صرف 13 رنز بنا سکے۔ کپتان حشمت اللہ شاہدی اور عظمت اللہ عمرزئی بھی جلد پویلین لوٹ گئے۔ پوری افغان ٹیم 112 رنز پر آل آؤٹ ہو گئی۔

بھارتی باؤلرز کا مکمل غلبہ

افغانستان کی دوسری اننگز میں بھی بھارتی باؤلرز چھائے رہے۔ واشنگٹن سندر نے 4 وکٹیں حاصل کیں، جبکہ کلدیپ یادو نے 3 کھلاڑیوں کو آؤٹ کیا۔ محمد سراج اور مانو سوتھار نے ایک، ایک وکٹ اپنے نام کی۔اس طرح بھارت نے یکطرفہ انداز میں کھیلتے ہوئے افغانستان کو ایک اننگز اور 300 رنز سے شکست دے کر میچ اپنے نام کر لیا اور شاندار کارکردگی کے ساتھ سیریز کا اختتام کیا۔

بھارت ایکسپریس اردو۔