IND vs NZ 2nd ODI Match: بھارت بمقابلہ نیوزی لینڈ: ڈیرل مچل کی ناقابلِ شکست سنچری، سات وکٹوں سے جیت کے ساتھ سیریز میں برابری پر مہمان ٹیم

راجکوٹ: نیوزی لینڈ نے بھارت کے خلاف نرنجن شاہ اسٹیڈیم میں کھیلے گئے دوسرے ایک روزہ بین الاقوامی میچ میں شاندار کارکردگی کا مظاہرہ کرتے ہوئے سات وکٹوں سے جیت حاصل کر لی۔ اس جیت کے ساتھ ہی مہمان ٹیم نے تین میچوں پر مشتمل سیریز میں ایک ایک سے برابری قائم کر لی ہے، جبکہ فیصلہ کن مقابلہ 18 جنوری کو اندور میں کھیلا جائے گا۔ ٹاس ہار کر پہلے بیٹنگ کرتے ہوئے بھارتی ٹیم نے مقررہ 50 اوورز میں سات وکٹوں کے نقصان پر 284 رنز بنائے۔ اوپنر روہت شرما اور کپتان شبمن گل نے محتاط آغاز کرتے ہوئے بارہ اعشاریہ دو اوورز میں 70 رنز کی شراکت قائم کی۔ روہت شرما 38 گیندوں پر 24 رنز بنا کر آؤٹ ہوئے۔

اس کے بعد شبمن گل نے وراٹ کوہلی کے ساتھ مل کر اننگز کو سنبھالا اور اسکور 99 تک پہنچایا۔ گل نے شاندار بیٹنگ کرتے ہوئے 53 گیندوں پر ایک چھکے اور نو چوکوں کی مدد سے 56 رنز اسکور کیے، تاہم وہ بڑی اننگز میں تبدیل نہ کر سکے۔ وراٹ کوہلی بھی 23 رنز بنا کر پویلین لوٹ گئے۔ بھارت نے تئیس اعشاریہ تین اوورز میں چار وکٹیں گنوا کر 118 رنز بنا لیے تھے۔ یہاں سے کے ایل راہل اور رویندر جڈیجہ نے پانچویں وکٹ کے لیے 73 رنز کی اہم شراکت قائم کی۔ جڈیجہ 27 رنز بنا کر آؤٹ ہوئے۔

راہل نے بعد ازاں نتیش ریڈی کے ساتھ چھٹی وکٹ کے لیے 57 رنز جوڑ کر ٹیم کو مضبوط اسکور تک پہنچایا۔ کے ایل راہل نے شاندار بلے بازی کرتے ہوئے 92 گیندوں پر ایک چھکا اور 11 چوکوں کی مدد سے ناقابلِ شکست 112 رنز بنائے، جبکہ نتیش ریڈی نے 20 رنز کا اضافہ کیا۔ نیوزی لینڈ کی جانب سے کرسچین کلارک نے بہترین بولنگ کرتے ہوئے تین وکٹیں حاصل کیں، جبکہ کائل جیمیسن، جیک فاؤلکیس، جیڈن لینوکس اور کپتان مائیکل بریسویل نے ایک ایک کھلاڑی کو آؤٹ کیا۔

ہدف کے تعاقب میں نیوزی لینڈ کی شروعات محتاط رہی اور ٹیم نے 46 رنز پر دو وکٹیں گنوا دیں۔ ڈیون کانوے اور ول ینگ جلد آؤٹ ہو گئے، مگر اس کے بعد ول ینگ اور ڈیرل مچل نے میچ کا رخ بدل دیا۔ دونوں بلے بازوں کے درمیان 162 رنز کی شراکت قائم ہوئی۔ ول ینگ نے 98گیندوں پر 87 رنز بنائے۔ بعد میں ڈیرل مچل نے گلین فلپس کے ساتھ مل کر ٹیم کو ہدف تک پہنچایا۔ مچل نے 117 گیندوں پر دو چھکوں اور 11 چوکوں کی مدد سے 131 رنز کی ناقابلِ شکست اننگز کھیلی، جبکہ فلپس 32 رنز بنا کر ناٹ آؤٹ رہے۔ بھارت کی جانب سے ہرشت رانا، پرسدھ کرشنا اور کلدیپ یادو نے ایک ایک وکٹ حاصل کی۔ تماشائیوں نے میچ سے بھرپور لطف حاصل کیا۔

بھارت ایکسپریس اردو۔