Young Indian Cricketers: بھارت کے پانچ نوجوان کرکٹرز جنہوں نے 2025 میں شاندار کارکردگی کا کیا مظاہرہ

نئی دہلی: سال 2025 بھارتی کرکٹ کے لیے نوجوان ٹیلنٹ کے عروج کا سال ثابت ہوا ہے۔ اس برس کئی ابھرتے ہوئے کھلاڑیوں نے اپنی شاندار کارکردگی سے نہ صرف ملکی بلکہ بین الاقوامی سطح پر بھی سب کی توجہ حاصل کی۔ کسی نے کم عمری میں ریکارڈ توڑے تو کسی نے آئی پی ایل، ایشیا کپ اور ڈومیسٹک ٹورنامنٹس میں مسلسل عمدہ کھیل پیش کیا۔ آئیے نظر ڈالتے ہیں ایسے ہی پانچ نوجوان بھارتی کرکٹرز پر، جنہوں نے 2025 میں اپنی واضح چھاپ چھوڑی۔

ویبھَو سوریہ ونشی
محض 14 برس کی عمر میں آئی پی ایل میں ڈیبیو کرنے والے ویبھَو سوریہ ونشی اس سال سب سے زیادہ چرچا میں رہے۔ انہوں نے صرف 35 گیندوں میں شاندار سنچری بنا کر کرکٹ دنیا کو حیران کر دیا۔ ویبھو نے یوتھ ون ڈے اور یوتھ ٹیسٹ میں بھی سنچریاں اسکور کیں، جبکہ سید مشتاق علی ٹرافی میں بھی ان کا بلّا خوب چلا۔ اس سال یوتھ ٹیسٹ کے چار میچوں میں انہوں نے 31.85 کی اوسط سے 223 رنز بنائے، جبکہ 12 یوتھ ون ڈے میچوں میں 57.50 کی اوسط سے 690 رنز اسکور کیے، جن میں دو سنچریاں شامل تھیں۔

ابھیشیک شرما
25 سالہ سلامی بلے باز ابھیشیک شرما نے 2025 میں ٹی-20 فارمیٹ میں زبردست مظاہرہ کیا۔ انہوں نے 21 میچوں میں 42.95 کی اوسط سے 859 رنز بنائے، جن میں ایک سنچری اور پانچ نصف سنچریاں شامل ہیں۔ ایشیا کپ 2025 میں وہ بھارت کے سب سے بڑے ہیرو بن کر ابھرے۔ سات میچوں میں 314 رنز بنا کر وہ ٹورنامنٹ کے سب سے زیادہ رنز بنانے والے بلے باز رہے اور انہیں ‘پلیئر آف دی ٹورنامنٹ’ کا اعزاز بھی ملا۔

کمار کشاگر
جھارکھنڈ کے 21 سالہ بلے باز کمار کشاگر نے سید مشتاق علی ٹرافی میں اپنی بیٹنگ سے سب کو متاثر کیا۔ انہوں نے 10 میچوں میں 60.29 کی شاندار اوسط سے 422 رنز بنائے، جن میں 34 چوکے اور 22 چھکے شامل تھے۔ فائنل میں ان کی ناقابلِ شکست 81 رنز کی اننگز نے جھارکھنڈ کو خطاب جتوانے میں کلیدی کردار ادا کیا۔

سشانت مشرا
24 سالہ تیز گیندباز سشانت مشرا نے سید مشتاق علی ٹرافی 2025 میں 11 میچوں میں 17.18 کی اوسط سے 22 وکٹیں حاصل کیں۔ فائنل میچ میں انہوں نے 27 رنز دے کر تین اہم وکٹیں حاصل کر کے اپنی ٹیم کی جیت میں نمایاں حصہ ڈالا۔

انشُل کمبوج
25 سالہ فاسٹ بولر انشُل کمبوج نے بھی 2025 میں شاندار کارکردگی دکھائی۔ سید مشتاق علی ٹرافی میں انہوں نے 11 میچوں میں 21 وکٹیں حاصل کیں، جبکہ آئی پی ایل میں چنئی سپر کنگز کی جانب سے آٹھ میچ کھیلتے ہوئے آٹھ وکٹیں اپنے نام کیں۔ ان پانچ نوجوان کرکٹرز کی کارکردگی نے واضح کر دیا ہے کہ بھارتی کرکٹ کا مستقبل مضبوط اور روشن ہاتھوں میں ہے۔

بھارت ایکسپریس اردو۔