FIFA World Cup 2026: فیفا ورلڈ کپ 2026 کے ہندوستانی براڈکاسٹ حقوق تقریباً طے، جلد باضابطہ اعلان متوقع، ورلڈ کپ کی نشریات مکمل طور پر ہوں گی دستیاب

نئی دہلی: آل انڈیا فٹبال فیڈریشن (اے آئی ایف ایف) کے سابق جنرل سکریٹری شاجی پربھاکرن نے کہا ہے کہ فیفا ورلڈ کپ 2026 کے ہندوستانی براڈکاسٹ حقوق سے متعلق مذاکرات مکمل ہو چکے ہیں اور اس کا باضابطہ اعلان آئندہ ہفتے متوقع ہے۔ انہوں نے بھارتی فٹبال شائقین کو یقین دلایا کہ ٹورنامنٹ کی نشریات ملک بھر میں آسانی سے دستیاب ہوں گی۔ شاجی پربھاکرن نے سوشل میڈیا پلیٹ فارم ایکس پر لکھا: ’’بھارتی فٹبال شائقین کے لیے بڑی خبر! انتظار اب ختم ہونے والا ہے۔ مذاکرات مکمل ہو چکے ہیں اور فیفا ورلڈ کپ 2026 کے براڈکاسٹنگ پارٹنر کا سرکاری اعلان اگلے ہفتے متوقع ہے۔‘‘ انہوں نے مزید کہا کہ کئی ماہ کی غیر یقینی صورتحال کے بعد اب شائقین مطمئن ہو سکتے ہیں کہ ورلڈ کپ بھارت میں مکمل طور پر دستیاب ہوگا۔

ورلڈ کپ نشریات کو لے کر جاری تھی غیر یقینی صورتحال

گزشتہ کچھ عرصے سے بھارت میں فیفا ورلڈ کپ 2026 کی نشریات کے حوالے سے غیر یقینی صورتحال برقرار تھی۔ اسی ماہ دہلی ہائی کورٹ نے مرکزی حکومت اور پراسار بھارتی کو ایک عرضی پر نوٹس جاری کیا تھا، جس میں مطالبہ کیا گیا تھا کہ ورلڈ کپ کی نشریات دوردرشن اور ڈی ڈی اسپورٹس جیسے مفت عوامی پلیٹ فارمز پر یقینی بنائی جائیں۔ عرضی میں کہا گیا تھا کہ اگر نشریاتی حقوق حاصل نہ کیے گئے تو کروڑوں بھارتی فٹبال شائقین دنیا کے سب سے بڑے کھیل مقابلوں میں سے ایک کو دیکھنے سے محروم رہ سکتے ہیں۔

براڈکاسٹ حقوق کی قیمت میں بھی کمی

درخواست کے مطابق فیفا نے ابتدا میں 2026 اور 2030 ورلڈ کپ کے بھارتی براڈکاسٹ حقوق کی قیمت تقریباً 100 ملین امریکی ڈالر مقرر کی تھی، لیکن براڈکاسٹرز کی کم دلچسپی کے باعث اسے گھٹا کر تقریباً 35 ملین ڈالر کر دیا گیا تھا۔ اس کے باوجود کافی عرصے تک کوئی حتمی معاہدہ سامنے نہیں آیا تھا۔ عرضی میں یہ بھی کہا گیا تھا کہ فیفا ورلڈ کپ کو پہلے ہی ’’قومی اہمیت کا کھیل ایونٹ‘‘ قرار دیا جا چکا ہے، لہٰذا حکومت اور پراسار بھارتی کی ذمہ داری بنتی ہے کہ اس کی نشریات عوام تک پہنچائی جائیں۔ شاجی پربھاکرن کے تازہ بیان کو بھارتی فٹبال شائقین کے لیے ایک بڑی راحت کے طور پر دیکھا جا رہا ہے، کیونکہ اب امید ظاہر کی جا رہی ہے کہ فیفا ورلڈ کپ 2026 کی نشریات بغیر کسی رکاوٹ کے ملک بھر میں دستیاب ہوں گی۔

بھارت ایکسپریس اردو۔