ICC T20 World Cup 2026: ’’ہر کسی کو انڈر ڈاگ کہانی پسند ہوتی ہے…‘‘، سپر 8 میں پہنچنے پر زمبابوے کے کپتان سکندر رضا کا نے کیا خوشی اظہار

پالے کیلے: زمبابوے نے ٹی20 ورلڈ کپ 2026 کے سپر 8 مرحلے کے لیے کوالیفائی کر لیا ہے۔ ٹیم کے کپتان سکندر رضا نے کہا ہے کہ سپر 8 میں جگہ بنانا ٹیم کے بڑے مشن کا صرف ایک حصہ ہے اور اصل ہدف ابھی باقی ہے۔

منگل کے روز پالے کیلے انٹرنیشنل اسٹیڈیم میں آئرلینڈ کے خلاف کھیلا جانے والا میچ بارش کے باعث منسوخ کر دیا گیا۔ دونوں ٹیموں کو ایک ایک پوائنٹ ملا، جس کے بعد زمبابوے گروپ بی کی پوائنٹس ٹیبل پر 5 پوائنٹس کے ساتھ اگلے مرحلے میں پہنچ گیا۔ اس نتیجے کے ساتھ ہی آسٹریلیا کی سپر 8 میں رسائی کی امیدیں ختم ہو گئیں۔

سکندر رضا نے اس کامیابی پر ردعمل دیتے ہوئے کہا، ’’ہم نے سپر 8 کے لیے کوالیفائی کر لیا ہے، لیکن ہمارا آخری ہدف تبدیل نہیں ہوا۔ جیسا کہ میں نے کہا، یہ صرف ایک سنگِ میل ہے۔ ہمارے پاس حاصل کرنے کے لیے اور بھی بہت کچھ ہے، اور ہر کسی کو انڈر ڈاگ کہانی پسند ہوتی ہے، ہے نا؟‘‘

انہوں نے کوالیفکیشن کے سفر کو یاد کرتے ہوئے سب ریجنل کوالیفائرز کا ذکر کیا، جہاں زمبابوے کا مقابلہ کینیا، روانڈا اور تنزانیہ جیسی ٹیموں سے ہوا تھا۔ رضا نے کہا، ’’مجھے یاد ہے جب ہم نے سب ریجنل کوالیفائرز بی کھیلے تھے تو میں نے ٹیم سے کہا تھا کہ ہم جس صورتحال میں ہیں اس کے ذمہ دار صرف ہم خود ہیں۔ ہم کسی اور کو موردِ الزام نہیں ٹھہرا سکتے۔ ہمیں خود ہی اس سے نکلنا ہوگا۔ پھر ہم نے سب ریجنل کوالیفائرز جیتے، اس کے بعد مین کوالیفائرز اپنے نام کیے اور اب یہاں تک پہنچے ہیں۔‘‘

زمبابوے کو سپر 8 میں ایک سخت گروپ میں رکھا گیا ہے، جہاں اسے دفاعی چیمپئن بھارت، 2024 کے رنر اپ جنوبی افریقہ اور دو بار کی عالمی چیمپئن ویسٹ انڈیز کا سامنا کرنا ہوگا۔ سیمی فائنل میں جگہ بنانے کے لیے ٹیم کو پوائنٹس ٹیبل میں ٹاپ ٹو میں رہنا ضروری ہوگا۔ سپر 8 سے قبل زمبابوے جمعرات کو آر۔ پریماداسا اسٹیڈیم میں اپنے آخری گروپ میچ میں سری لنکا کے خلاف میدان میں اترے گا۔

مشکل مرحلے کی تیاری کے حوالے سے رضا نے کہا کہ ٹیم مینجمنٹ حالات اور حریف ٹیموں کا باریک بینی سے تجزیہ کرے گی۔ میں اور کوچ بیٹھ کر حکمتِ عملی بنائیں گے۔ ہم نے سری لنکا کے پچھلے تین میچ دیکھے ہیں، ہمارے پاس ڈیٹا موجود ہوگا اور ہم بہترین کارکردگی دکھانے کی کوشش کریں گے۔ ہمارا یہاں آنے کا مقصد ہی یہی ہے کہ ہم مقابلہ کریں اور جیتیں۔

انہوں نے مزید کہا کہ بدلتی ہوئی کنڈیشنز کے مطابق خود کو ڈھالنا بے حد ضروری ہوگا، خاص طور پر جب سپر 8 کے میچ بھارت میں کھیلے جائیں گے۔ اگر ہمیں کسی بھی مقام پر ایک یا دو دن کی ٹریننگ مل جائے تو ہم حالات کو بہتر طور پر سمجھ سکتے ہیں اور اسی کے مطابق پلان بنا سکتے ہیں۔ موسم اور حالات سے آپ لڑ نہیں سکتے، اس لیے ہم انہیں سمجھنے اور خود کو ان کے مطابق ڈھالنے کی کوشش کرتے ہیں۔

بھارت ایکسپریس۔