Ranji Trophy Winner: رنجی ٹرافی جیتنے والی جموں و کشمیر کرکٹ ٹیم مالا مال، وزیراعلیٰ عمرعبداللہ نے کیا 2 کروڑ روپے انعام کا اعلان

سری نگر: جموں و کشمیر کرکٹ ٹیم نے رنجی ٹرافی 2025-26 کا خطاب جیت کر تاریخ رقم کر دی۔ ٹیم نے پہلی مرتبہ یہ اعزاز حاصل کیا اور فائنل میں مضبوط حریف کرناٹک کو اس کے ہوم گراؤنڈ پر شکست دے کر چیمپئن بن گئی۔ ریاست بھر میں اس کامیابی پر جشن کا ماحول ہے۔ لیفٹیننٹ گورنر منوج سنہا اور وزیرِ اعلیٰ عمر عبداللہ نے ٹیم کو مبارکباد پیش کی۔

2 کروڑ روپے انعام اور سرکاری ملازمت کا اعلان

وزیرِ اعلیٰ عمر عبداللہ نے کھلاڑیوں اور معاون عملے کے لیے 2 کروڑ روپے انعام کا اعلان کیا۔ انہوں نے کہا: ’’اس تاریخی جیت نے پورے خطے کو فخر اور حوصلے سے بھر دیا ہے۔ کھلاڑی حال ہی میں شاندار کارکردگی دکھانے والوں کے لیے جاری کردہ ضابطوں کے تحت سرکاری ملازمت کے بھی حقدار ہوں گے۔‘‘ وزیراعلیٰ نے سوشل میڈیا پلیٹ فارم ایکس پر ایک ویڈیو بھی شیئر کی جس میں ٹیم کے کھلاڑی فتح کے بعد جشن مناتے دکھائی دے رہے ہیں۔ وہ خود بھی اس تاریخی لمحے کے گواہ بننے کے لیے اسٹیڈیم میں موجود تھے۔ لیفٹیننٹ گورنر منوج سنہا نے اپنے پیغام میں کہا: ’’جموں و کشمیر کا بہترین وقت آ گیا ہے۔ جب میں اپنی کرکٹ ٹیم کو رنجی ٹرافی جیتتے دیکھ رہا ہوں تو میرے جذبات الفاظ سے بالاتر ہیں۔ ہر اُس باہمت کھلاڑی کا شکریہ جس نے تاریخ رقم کی۔ آپ نے اس لمحے کو ہمیشہ کے لیے امر کر دیا ہے۔‘‘

کرناٹک کے خلاف فیصلہ کن برتری

فائنل مقابلہ ہبلی کے ڈی آر بیندرے کرکٹ اسٹیڈیم میں کھیلا گیا، جہاں جموں و کشمیر نے ٹاس جیت کر پہلے بیٹنگ کی۔ شبھم پنڈیر کے 121، یاور حسن خان کے 88، ساحل لوترا کے 72، کنہیا ودھاون کے 70 اور کپتان پارس ڈوگرا کے 70 رنز کی بدولت ٹیم نے پہلی اننگز میں 584 رنز کا بڑا اسکور کھڑا کیا۔ جواب میں کرناٹک کی ٹیم 293 رنز پر ڈھیر ہو گئی، جس کے باعث جموں و کشمیر کو پہلی اننگز کی بنیاد پر 291 رنز کی فیصلہ کن برتری حاصل ہوئی۔ پانچویں دن دوسرے سیشن میں جموں و کشمیر نے اپنی دوسری اننگز 4 وکٹوں پر 342 رنز بنا کر ڈکلیئر کر دی، جس کے بعد میچ ڈرا قرار پایا۔ تاہم پہلی اننگز میں برتری کی بنیاد پر جموں و کشمیر کو چیمپئن قرار دیا گیا۔ یہ فتح نہ صرف ٹیم بلکہ پورے جموں و کشمیر کے لیے ایک تاریخی اور یادگار لمحہ بن گئی ہے۔

بھارت ایکسپریس اردو۔