Jharkhand Constable Race: جھارکھنڈ میں کانسٹیبل کی نوکری کی دوڑ میں اب تک سات نوجوانوں کی موت، قریب دو سو امیدوار بے ہوش

رانچی: جھارکھنڈ میں کانسٹیبل کی نوکری کی دوڑ میں نوجوانوں کی سانسیں ٹوٹ رہے ہیں۔ ریاست میں محکمہ ایکسائز میں کانسٹیبلوں کی تقرری کے لیے گزشتہ آٹھ دنوں سے مختلف اضلاع میں ریسنگ مقابلے ہو رہا ہے۔ اس میں اب تک سات امیدواروں کی موت ہو چکی ہے جبکہ تقریباً 200 امیدوار بے ہوش ہو چکے ہیں۔ نوجوانوں کی موت اور بے ہوش ہونے کے آئے روز کے واقعات کی وجہ سے تقرری کے عمل پر اب سنگین سوالات اٹھنے لگے ہیں۔

پلامو میں تین دنوں کے اندر چار نوجوانوں کی موت ہو گئی ہے۔ مرنے والوں میں بہار کے گیا کے رہنے والے امریش کمار، رانچی کے اجے مہتو، پلامو کے ارون کمار، اور گڈا پردیپ کمار شامل ہیں۔

ہزاری باغ کے پدما میں واقع پولیس ٹریننگ سنٹر میں بحالی کی جاری دوڑ میں اب تک دو نوجوانوں کی موت ہو چکی ہے۔ ان میں گرڈیہ کے دیوری کے رہنے والے سورج ورما کی ہفتہ کے روز ہزاری باغ کے میڈیکل کالج میں علاج کے دوران موت ہو گئی۔ ڈاکٹروں نے دل کا دورہ پڑنے کو موت کی وجہ قرار دیا ہے۔ سورج کے والد پربھو ورما اور ان کے خاندان کے افراد کی حالت خراب ہے اور وہ رو رہے ہیں۔ ایک ہفتہ قبل منڈو کے رہائشی مہیش کمار کی بھی دوڑ کے مقابلے میں حصہ لینے کے دوران موت ہو گئی تھی۔

گڈا ضلع کے کیروار گاؤں کے رہنے والے سمیت کمار، جنہیں گرڈیہ کی نئی پولیس لائن میں بھاگتے ہوئے بیہوش ہونے کے بعد علاج کے لیے دھنباد کے میڈیکل کالج میں داخل کرایا گیا تھا، جمعہ کے روز موت ہو گئی۔

ایک ہفتہ قبل گرڈیہ ضلع کے کیشوری کے رہنے والے ایک امیدوار پنٹو کمار کی مشرقی سنگھ بھوم ضلع کے جادو گوڑا میں ہوئی دوڑ کے دوران موت ہو گئی تھی۔ پلامو، گرڈیہ، رانچی، ہزاری باغ، مشرقی سنگھ بھوم اور صاحب گنج میں اب تک کم از کم دو سو امیدوار بے ہوش یا بیمار ہوچکے ہیں، جن کا مختلف اسپتالوں میں علاج کیا گیا ہے۔

جھارکھنڈ کے الگ ریاست بننے کے بعد پہلی بار محکمہ ایکسائز میں کانسٹیبل کی تقرری کے لیے امتحان ہو رہا ہے۔ اس سے پہلے متحدہ بہار میں سال 1980 میں اس محکمہ میں کانسٹیبل کی تقرری ہوئی تھی۔ جھارکھنڈ اسٹاف سلیکشن کمیشن کے ذریعہ کرائے جانے والے امتحان کے ذریعہ کل 583 آسامیوں پر تقرر کیا جانا ہے۔ اس کے لیے مختلف اضلاع میں جسمانی جانچ کا عمل جاری ہے۔ اس میں مرد امیدواروں کو ایک گھنٹے میں 10 کلومیٹر اور خواتین امیدواروں کو 40 منٹ میں پانچ کلومیٹر دوڑنا ہوگا۔

اس امتحان کے لیے تعلیمی قابلیت 10ویں پاس ہے لیکن امتحان میں شرکت کرنے والے ہزاروں امیدوار پوسٹ گریجویٹ اور گریجویٹ ہیں۔ اب تک ایک لاکھ سے زیادہ امیدوار جسمانی امتحان میں شریک ہو چکے ہیں۔

بھارت ایکسپریس۔