Tripura: پی ایم مودی نے تریپورہ کو 4,350 کروڑ روپے کے پروجیکٹوں کا تحفہ دیا، صفائی مہم کی تعریف کی

Tripura: وزیر اعظم نریندر مودی نے اگرتلہ میں 4,350 کروڑ روپے سے زیادہ کے کئی ترقیاتی منصوبوں کا افتتاح اور سنگ بنیاد رکھا۔ اس دوران تریپورہ کے وزیر اعلی مانک ساہا بھی موجود رہے۔

پی ایم مودی نے کہا کہ میں تریپورہ کے لوگوں کو مبارکباد دیتا ہوں، آپ سب کی کوششوں سے یہاں صفائی سے متعلق ایک بہت بڑی مہم شروع کی گئی ہے۔ پچھلے 5 سالوں میں آپ نے صفائی کو ایک عوامی تحریک بنا دیا ہے۔ اسی کا نتیجہ ہے کہ اس بار تریپورہ ملک کی چھوٹی ریاستوں میں سب سے صاف ستھری ریاست بن کر ابھراہے۔

وزیر اعظم نریندر مودی نے کہا کہ آج تریپورہ کو اپنا پہلا ڈینٹل کالج ملا ہے۔ اس سے تریپورہ کے نوجوانوں کو یہیں ڈاکٹر بننے کا موقع ملے گا۔ آج تریپورہ کے 2 لاکھ سے زیادہ غریب خاندان اپنے نئے پکے گھروں میں داخل ہو رہے ہیں۔

پی ایم مودی نے کہا کہ ڈبل انجن والی حکومت بننے سے قبل تریپورہ کے شمال مشرق میں صرف 2 بار ہی بات ہوتی تھی۔ ایک اس وقت جب انتخابات ہوتے تھے اور دوسرا جب تشدد کا کوئی واقعہ ہو جاتا تھا۔ آج تریپورہ میں بنیادی ڈھانچے کی ترقی کے لیے بات کی جاتی ہے۔ ڈبل انجن والی حکومت نہ صرف فزیکل اور ڈیجیٹل انفراسٹرکچر پر زور دے رہی ہے بلکہ سوشل انفراسٹرکچر پر بھی زور دے رہی ہے۔

یہ بھی پڑھیں- Vande Bharat Express: پی ایم مودی نے ناگپور-بلاسپور وندے بھارت ٹرین کو ہری جھنڈی دکھائی، ناگپور میٹرو میں کی سواری

انہوں نے کہا کہ اب تریپورہ کے ذریعے شمال مشرقی بین الاقوامی تجارت کا ایک گیٹ وے بھی بنایا جا رہا ہے۔ اگرتلہ-اکھورہ ریلوے لائن سے کاروبار کا ایک نیا راستہ کھلے گا۔ اسی طرح نارتھ ایسٹ بھی ہندوستان، تھائی لینڈ، میانمار ہائی وے روڈ انفراسٹرکچر کے ذریعے دوسرے ممالک کے ساتھ تعلقات کا گیٹ وے بن رہا ہے۔

وزیر اعظم نریندر مودی نے کہا کہ شمال مشرق میں 7000 سے زیادہ صحت اور تندرستی کے مراکز کو منظوری دی گئی ہے جبکہ صرف تریپورہ میں 1000 سے زیادہ مراکز قائم ہو رہے ہیں۔ یہ مراکز ذیابیطس اور کینسر جیسی بیماریوں میں مبتلا ہزاروں مریضوں کی اسکریننگ میں مدد کریں گے۔

-بھارت ایکسپریس