Jammu Kashmir budgam bypoll: بڈگام ضمنی انتخاب میں امیدواروں نےپرچہ  نامزدگی داخل کیا، نیشنل کانفرنس کے گڑھ میں اس بار کیا ہوگا؟

جموں و کشمیر کی دو خالی اسمبلی نشستوں پر ہونے والے ضمنی انتخابات کے پیش نظر سرگرمیاں تیز ہو گئی ہیں۔ تمام سیاسی جماعتیں بڈگام اور نگروٹہ میں ہونے والے انتخابات کی تیاریوں میں مصروف ہیں۔ اسی دوران نیشنل کانفرنس، پیپلز ڈیموکریٹک پارٹی اور بھارتیہ جنتا پارٹی سمیت تمام اہم سیاسی جماعتوں کے امیدواروں نے پیر (20 اکتوبر) کو بڈگام سیٹ کے لیے نامزدگی کے کاغذات جمع کرائے۔ آج امیدواروں کے لیے نامزدگی داخل کرنے کا آخری دن تھا، اسی لیے آخری دن تمام جماعتوں کے امیدواروں نے اپنا پرچہ نامزدگی  داخل کیا۔ اس موقع پر ہر پارٹی کے حامی بھی بڑی تعداد میں موجود نظر آئے اور سب میں خاصا جوش و خروش دکھائی دیا۔

نیشنل کانفرنس کے امیدوار آغا سید محمود نے پرچہ نامزدگی داخل کیا

نیشنل کانفرنس کے امیدوار آغا سید محمود نے سابق وزیر اعلیٰ عمر عبداللہ کے ساتھ نامزدگی فارم داخل کیا، جبکہ پیپلز ڈیموکریٹک پارٹی کے امیدوار آغا سید منتظر مہدی کے ہمراہ ایم ایل اے وہید الرحمان پرا اور پارٹی کے دیگر سینئر لیڈر موجود تھے۔ دوسری جانب بی جے پی کے امیدوار آغا سید محسن نے بھی آج اپنا نامزدگی فارم جمع کرایا۔ ان کے ساتھ حزب اختلاف لیڈر سنیل شرما موجود تھے۔

عمر عبداللہ کو نیشنل کانفرنس کی جیت کا یقین ہے

نامزدگی داخل کرنے کے بعد وزیر اعلیٰ عمر عبداللہ نے میڈیا سے بات کرتے ہوئے کہا، ’’نیشنل کانفرنس کی جانب سے آغا محمود نے آج بڈگام ضمنی انتخاب کے لیے اپنا نامزدگی فارم داخل کیا۔ پوری پارٹی آغا محمود کے ساتھ کھڑی ہے۔ آج سے ہم بڈگام کے عوام تک اپنا پیغام پہنچائیں گے اور ہمیں امید ہے کہ جس دن نتائج کا اعلان ہوگا، آغا محمود جموں و کشمیر اسمبلی میں بڈگام کے عوام کی کامیابی سے نمائندگی کریں گے۔ ہم دوسروں کا (اپنے امیدواروں  کے ناموں کا اعلان کرنے کا) انتظار کر رہے تھے، ہمیں کوئی جلدی نہیں تھی۔ تقریباً تمام جماعتوں کے امیدواروں نے آج ہی اپنے نامزدگی فارم داخل کیے۔ لیکن ہر کوئی ایک دوسرے کا انتظار کر رہا تھا۔ یہ ہماری حکمت عملی کا ایک حصہ تھا۔‘‘

بھارت ایکسپریس اردو۔