Horrific Road Accident in Karnataka: کرناٹک میں بھیانک سڑک حادثہ، ٹرک کی ٹکر سے ایک ہی خاندان کے 5 افراد ہلاک

کلبورگی: کرناٹک کے ضلع کلبورگی میں ایک خوفناک سڑک حادثہ پیش آیا، جہاں ایک کروزر گاڑی اور ٹرک کے درمیان آمنے سامنے کی ٹکر میں ایک ہی خاندان کے پانچ افراد کی موت ہوگئی۔ یہ حادثہ کلبورگی ضلع کے چتاپور تعلقہ میں لاڈلاپور کے قریب پیش آیا۔

یادگیر سے واپس لوٹ رہا تھا خاندان

اطلاعات کے مطابق جمعہ کی دیر رات چتاپور تعلقہ کے انگلاگی گاؤں کے ایک ہی خاندان کے افراد کروزر گاڑی میں یادگیر سے واپس اپنے گاؤں جا رہے تھے۔ اسی دوران لڈلاپور کے قریب قومی شاہراہ پر سامنے سے آنے والے ایک ٹرک نے گاڑی کو ٹکر مار دی۔ ٹکر اتنی شدید تھی کہ کروزر میں سوار 27 سالہ تولوساب کیشور، 48 سالہ حسین شاہ، 45 سالہ محبوب علی، 42 سالہ رسول بی اور 38 سالہ فاطمہ علی کی موقع پر ہی موت ہوگئی۔

حادثے کے بعد علاقے میں کہرام

حادثے کی اطلاع ملتے ہی مقامی لوگوں کی بڑی تعداد موقع پر جمع ہوگئی۔ پولیس بھی فوری طور پر جائے حادثہ پر پہنچی اور لاشوں کو پوسٹ مارٹم کے لیے بھیج کر تحقیقات شروع کر دی۔ سینئر پولیس افسران نے بھی جائے وقوعہ کا معائنہ کیا۔

ذرائع کے مطابق انگلاگی گاؤں کے ایک بیمار شخص کو علاج کے لیے یادگیر اسپتال میں داخل کرایا گیا تھا۔ اسپتال میں داخل کرانے کے بعد خاندان کے پانچ افراد کروزر گاڑی کے ذریعے واپس اپنے گاؤں جا رہے تھے۔ رات کے وقت جب وہ لڈلاپور گاؤں کے قریب پہنچے تو سامنے سے آنے والے ٹرک سے ان کی گاڑی کی زوردار ٹکر ہوگئی۔

غم میں ڈوب گیا پورا گاؤں

حادثے کی آواز سن کر مقامی لوگ فوراً موقع پر پہنچے اور پولیس کو اطلاع دی گئی۔ لاشوں کو گاڑی سے نکال کر وادی سرکاری اسپتال پوسٹ مارٹم کے لیے منتقل کیا گیا۔ اس المناک حادثے کے بعد انگلاگی گاؤں میں سوگ کی فضا قائم ہے۔ ایک ہی خاندان کے پانچ افراد کی اچانک موت سے پورا گاؤں صدمے میں ہے۔ اہل خانہ، رشتہ داروں اور دوستوں میں غم کی لہر دوڑ گئی ہے، جبکہ لوگ تعزیت کے لیے اسپتال اور گاؤں پہنچ رہے ہیں۔ پولیس نے اس سلسلے میں وادی پولیس اسٹیشن میں مقدمہ درج کر لیا ہے اور حادثے کی اصل وجہ جاننے کے لیے تحقیقات جاری ہیں۔

بھارت ایکسپریس۔