Congress Gift to Jagadish Shettar: بی جے پی کو الوداع کہ کر کانگریس کا دامن تھامنے والے جگدیش شیٹر کو ملا بڑا تحفہ،کانگریس نے بنایا امیدوار

 کانگریس نے سابق وزیر اعلی جگدیش شیٹر کو کرناٹک قانون ساز کونسل کے ضمنی انتخاب کے لیے اپنا امیدوار بنایا ہے۔ لنگایت طبقہ کے لیڈر جگدیش شیٹر کرناٹک اسمبلی انتخابات سے قبل بی جے پی چھوڑ کر کانگریس میں شامل ہو گئے تھے ۔ وہ کرناٹک  ہبلی دھارواڑ سیٹ سے کانگریس کی جانب سے رکن اسمبلی کے امید وار کے طور انتخابی میدان میں تھے، تاہم انہیں کامیابی نہیں ملی۔ کرناٹک کے سابق وزیر اعلی شیٹر کے علاوہ، کانگریس نے کابینی وزراء این ایس بوساراجو اور ٹپنپا کماکانور کو بھی امیدوار کے طورپر میدان میں اتارا ہے۔ ۔

ضمنی انتخابات 30 جون کو ہوں گے

کرناٹک قانون ساز کونسل کی تین نشستوں کے لیے 30 جون کو ضمنی انتخابات ہونے ہیں۔ یہ نشستیں حالیہ اسمبلی انتخابات میں حصہ لینے والے ممبران بابو راؤ چنچنسور، آر شنکر اور لکشمن ساوادی کے استعفیٰ کے بعد خالی ہوئی تھیں۔ ان میں سے صرف ساوادی نے انتخابات میں جیت حاصل کی تھی، بقیہ دونوں امیدواروں کو شکست ہوئی۔ کانگریس نے پیر (19 جون) کو ایک بیان جاری کرتے ہوئے کہا کہ پارٹی کے صدر ملکارجن کھرگے نے جگدیش شیٹر، ٹپنپا کماکانور اور این ایس کو نامزد کیا ہے۔ بوسیراجو کی امیدواری کی تجویز کو منظوری دے دی گئی ہے۔

کرناٹک اسمبلی انتخابات کے نتائج میں کانگریس نے 224 میں سے 135 سیٹوں پر کامیابی حاصل کی تھی۔ جب کہ بی جے پی کو صرف 66 سیٹیں ملی ہیں۔ وہیں ایچ ڈی کمارسوامی کی جے ڈی ایس کو 19 سیٹیں ملی ہیں۔کرناٹک قانون ساز کونسل کے ضمنی انتخاب کے لیے ووٹنگ 30 جون کو صبح 9 بجے سے شام 4 بجے تک ہوگی اور ووٹوں کی گنتی اسی دن شام 5 بجے ہوگی۔ جس میں اراکین اسمبلی شرکت کریں گے۔

بھارت ایکسپریس۔