Firing in Patna: پٹنہ میں دن دیہاڑے فائرنگ، ماں بیٹی ہلاک، باپ زخمی

پٹنہ: بہار کی راجدھانی پٹنہ میں پیر کے روز بدمعاشوں نے دن دیہاڑے ایک فیملی پر فائرنگ کر دی۔ اس واقعہ میں ماں بیٹی ہلاک اور باپ زخمی ہوگیا۔ زخمی کا اسپتال میں علاج کیا جا رہا ہے۔

پولیس نے شروع کی واقعے کی تفتیش

پولیس نے واقعے کی تفتیش شروع کردی ہے۔ پولیس کے مطابق یہ واقعہ عالم گنج تھانے کے علاقے نیو جعفرآباد کالونی میں پیش آیا جہاں جرائم پیشہ افراد نے ایک ہی خاندان کے تین افراد کو گولی مار دی۔ اس واقعے میں دو افراد کی موت ہو گئی، جب کہ ایک شخص زخمی ہوا۔

گھر میں گھس کر اندھا دھند گولیاں چلائی گئیں

بتایا جاتا ہے کہ بدمعاشوں نے گھر میں گھس کر اندھا دھند گولیاں چلائیں۔ مرنے والوں کی شناخت مہالکشمی دیوی اور ان کی بیٹی سنتھالی کماری کے طور پر ہوئی ہے۔ مہالکشمی دیوی NMCH میں نرس تھیں اور حال ہی میں ریٹائر ہوئی تھیں۔ مہالکشمی کے شوہر کی ٹانگ میں گولی لگی ہے۔

واقعہ کی اطلاع ملتے ہی پولیس موقع پر پہنچی

واقعہ کی اطلاع ملتے ہی پولیس موقع پر پہنچ گئی اور پورے معاملے کی جانچ شروع کردی۔ ڈاگ اسکواڈ اور ایف ایس ایل ٹیم کو بھی موقع پر طلب کر لیا گیا۔ پولیس آس پاس کے علاقے کی سی سی ٹی وی فوٹیج کی بھی چھان بین کر رہی ہے۔

واقعے کے پیچھے کی وجہ معلوم نہیں سکی

ایک پولیس افسر نے بتایا کہ واقعے کے پیچھے کی وجہ ابھی تک معلوم نہیں ہوسکی ہے، فی الحال پولیس پورے معاملے کی تحقیقات کررہی ہے۔ مانا جا رہا ہے کہ اس علاقے میں کئی سی سی ٹی وی کیمرے لگے ہوئے ہیں، جس کی وجہ سے جلد ہی بدمعاشوں کی شناخت ہو سکتی ہے۔

ملزمان کی گرفتاری کے لیے چھاپہ ماری جاری

پولیس نے موقع سے کئی خول بھی برآمد کیے ہیں۔ واردات کے بعد فرار ہونے والے ملزمان کی گرفتاری کے لیے چھاپے مارے جا رہے ہیں۔ پولیس کا دعویٰ ہے کہ ملزمان کو جلد گرفتار کر لیا جائے گا۔

بھارت ایکسپریس۔