Dhanbad News: بدسلوکی سے ناراض سسر نے بہو کے ٹکڑے کر کے ندی میں بہا دی لاش، پولیس کو ایسے ملا سراغ

دھنباد: اپنی بہو کے مبینہ بدسلوکی سے ناراض ہو کر جھارکھنڈ کے دھنباد ضلع کے تحت نواڈیہ تھانہ علاقے میں ایک شخص نے اپنی بہو کا تیز دھار ہتھیار سے قتل کر دیا۔ اس نے خاتون کی لاش کے کئی ٹکڑے کیے اور پھر اسے ندی میں پھینک دیا۔ بدھ کے روز ملزم کے کہنے پر پولیس نے لاش کے کئی حصے ندی سے برآمد کیے۔ ملزم کو گرفتار کر لیا گیا ہے۔

جس خاتون کا قتل ہوا ہے، اس کا نام گیتا دیوی ہے اور وہ نواڈیہ تھانہ علاقہ کے دہیاری گاؤں کی رہنے والی تھی۔ اس کے شوہر سورج راجوار نے 19 اکتوبر کو تھانے میں گیتا دیوی کی گمشدگی کی رپورٹ درج کرائی تھی۔ اس دن وہ اپنے روزمرہ کے کام پر گیا تھا اور گھر واپس آنے کے بعد اسے اپنی بیوی گھر پر نہیں ملی۔ اس نے اپنے باپ ملن راجوار سے اپنی بیوی کے بارے میں پوچھا، لیکن اس نے لاعلمی کا اظہار کیا۔

تھانے میں رپورٹ درج کرانے کے بعد اس کی کئی جگہ تلاشی لی گئی، لیکن وہ نہیں مل سکی۔ اس معاملے میں پولیس نے جب جانچ شروع کی اور خاتون کے سسر ملن راجوار سے پوچھ گچھ شروع کی تو اس نے بہو گیتا دیوی کو قتل کرنے اور لاش کو ندی میں پھینکنے کا اعتراف کیا۔

ملن راجوار نے پولیس کو بتایا کہ اس نے اپنی بہو سے کھانا مانگا تھا۔ اس پر اس نے  کھانا لا کر اس کے منہ پر پھینک دیا۔ بہو کے اس رویے سے وہ ناراض ہو گیا اور اس نے کلہاڑی سے کاٹ کر اسے قتل کر دیا۔

بوکارو کے نواڈیہ پولیس اسٹیشن کے سب انسپکٹر محمد شمیم نے بتایا کہ ملان راجوار کے کہنے پر نواڈیہ تھانے کی پولیس نے دھنباد کے ہریہر پور تھانہ علاقے میں ایک ندی سے لاش کے کئی ٹکڑے برآمد کر لیے ہیں۔

بھارت ایکسپریس۔