Massive Fire in Malviya Nagar High-Rise: دہلی کے مالویہ نگر آتشزدگی میں ہلاکتوں کی تعداد بڑھ کر 21 ہوئی، مرنے والوں میں زیادہ تر غیر ملکی شہری

نئی دہلی: قومی دارالحکومت دہلی کے مالویہ نگر علاقے میں واقع ایک ریسٹورنٹ میں لگنے والی ہولناک آگ نے بڑے سانحے کی شکل اختیار کر لی ہے۔ اس افسوسناک واقعے میں ہلاک ہونے والوں کی تعداد بڑھ کر 21 ہو گئی ہے۔ پولیس کے مطابق جاں بحق افراد میں اکثریت غیر ملکی شہریوں کی ہے۔

صبح آتشزدگی کی اطلاع موصول ہوئی

دہلی پولیس کی جانب سے جاری پریس نوٹ کے مطابق بدھ کی صبح 8 بج کر 48 منٹ پر مالویہ نگر میں واقع ’فلورش اسٹے بی اینڈ بی‘ میں آگ لگنے کی اطلاع موصول ہوئی تھی۔ اطلاع ملتے ہی مقامی پولیس ٹیم موقع پر پہنچ گئی اور امدادی و بچاؤ کارروائیاں شروع کر دی گئیں۔ آگ پر قابو پانے کے لیے فائر بریگیڈ کی آٹھ گاڑیوں کو فوری طور پر جائے حادثہ پر تعینات کیا گیا۔

40 سے زائد افراد کو نکالا گیا محفوظ

پولیس، فائر بریگیڈ اور دیگر ہنگامی خدمات کے مشترکہ آپریشن کے نتیجے میں 40 سے زائد افراد کو بحفاظت عمارت سے نکال کر قریبی اسپتالوں میں منتقل کیا گیا، جہاں ان کا علاج جاری ہے۔ دہلی پولیس نے بتایا کہ اب تک 21 افراد کی موت کی تصدیق ہو چکی ہے۔ حکام کے مطابق مہلوکین میں زیادہ تر غیر ملکی شہری شامل ہیں۔ حالانکہ، ان کی شناخت اور شہریت کی سرکاری تصدیق کا عمل ابھی جاری ہے۔

موقع پر امدادی کارروائیاں جاری

پولیس کا کہنا ہے کہ امدادی اور ریسکیو آپریشن اب بھی جاری ہے اور تمام متعلقہ ادارے موقع پر موجود ہیں تاکہ متاثرین کو ہر ممکن مدد فراہم کی جا سکے۔ اس کے ساتھ ہی آگ لگنے کی وجوہات جاننے کے لیے باضابطہ تحقیقات بھی شروع کر دی گئی ہیں۔

پی ایم نریندر مودی کا اظہارِ افسوس

اس سانحے پر نریندر مودی نے گہرے رنج و غم کا اظہار کیا ہے۔ وزیر اعظم کے دفتر کے مطابق، نریندر مودی نے مہلوک افراد کے اہلِ خانہ کے لیے دو، دو لاکھ روپے کی مالی امداد کا اعلان کیا ہے، جبکہ زخمیوں کو پچاس ہزار روپے دیئے جائیں گے۔

وزیر اعظم کا تعزیتی پیغام

وزیر اعظم کے دفتر کے مطابق نریندر مودی نے اپنے بیان میں کہا، ’’دہلی کے مالویہ نگر میں آتشزدگی کے واقعے میں لوگوں کی جانوں کا ضیاع انتہائی افسوسناک ہے۔ جن خاندانوں نے اپنے عزیزوں کو کھویا ہے، ان کے ساتھ میری گہری ہمدردیاں ہیں۔ میں زخمیوں کی جلد صحت یابی کے لیے دعا گو ہوں۔ انتظامیہ متاثرین کو ہر ممکن مدد فراہم کر رہی ہے۔‘‘ انہوں نے مزید کہا کہ وزیر اعظم قومی امدادی فنڈ کی جانب سے ہر مہلوک شخص کے لواحقین کو دو لاکھ روپے اور زخمیوں کو پچاس ہزار روپے کی امداد دی جائے گی۔

سانحے کی وجوہات جاننے کی کوشش

حکام کے مطابق آگ لگنے کی اصل وجہ ابھی سامنے نہیں آئی ہے۔ تفتیشی ادارے عمارت کے حفاظتی انتظامات، آگ سے بچاؤ کے نظام اور دیگر تکنیکی پہلوؤں کا جائزہ لے رہے ہیں تاکہ حادثے کی وجوہات کا تعین کیا جا سکے۔

بھارت ایکسپریس۔