Uproar in Bhojpur: بھوجپور میں حوالدار کے بیٹے کے قتل کے بعد ہنگامہ، مشتعل لوگوں نے آتش زنی کرکے ہائی وے کیا جام، بدمعاشوں کے انکاؤنٹر کا مطالبہ

پٹنہ: بہار کے ضلع بھوجپور میں گجراج گنج او پی کے بامپالی کے قریب حوالدار ہرندر سنگھ کے بیٹے رتک سنگھ کو شام کے وقت گولی مار کر قتل کیے جانے کے بعد لوگوں کا غصہ پھوٹ پڑا۔ واقعے سے ناراض اہل خانہ اور مقامی لوگ لاش لے کر سڑک پر اتر آئے اور احتجاج شروع کر دیا۔ مظاہرین نے نوادہ تھانہ علاقے کے چندوا موڑ کے قریب آرا-بکسر ہائی وے کو جام کرکے جم کر ہنگامہ کیا۔ اس دوران مظاہرین نے سڑک کے درمیان ٹائر جلا کر آتش زنی بھی کی، جس کے باعث ہائی وے پر گاڑیوں کی آمد و رفت مکمل طور پر ٹھپ ہوگئی اور سڑک کے دونوں جانب گاڑیوں کی لمبی قطاریں لگ گئیں۔

ملزمین کے انکاؤنٹر اور ایس پی کو موقع پر بلانے کا مطالبہ

سڑک جام اور ہنگامے کی اطلاع ملتے ہی نوادہ تھانہ انچارج رجنی کانت، سب انسپکٹر اویناش، چندیشور سمیت دیگر پولیس افسران موقع پر پہنچے۔ پولیس اہلکاروں نے مشتعل لوگوں کو سمجھانے اور جام ختم کرانے کی کوشش کی، تاہم مظاہرین اپنے مطالبات پر بضد رہے۔ ان کا مطالبہ تھا کہ قتل کی واردات میں ملوث ملزمین کا انکاؤنٹر کیا جائے اور موقع پر ایس پی کو بلایا جائے۔ پولیس افسران مسلسل لوگوں کو سمجھانے بجھانے میں مصروف رہے۔ اس دوران کافی دیر تک افراتفری کا ماحول برقرار رہا اور تقریباً چار گھنٹے تک مظاہرین نے شدید نعرے بازی کی۔

دو نوجوانوں کو ماری گئی تھی گولی، ایک کی موت

واضح رہے کہ جمعرات کی شام گجراج گنج او پی علاقے کے بامپالی کے قریب مسلح بدمعاشوں نے حوالدار کے بیٹے سمیت دو نوجوانوں کو گولی مار دی تھی۔ اس واقعے میں رتک سنگھ کی موقع پر ہی موت ہوگئی، جبکہ اس کا دوست شدید زخمی ہوگیا۔ رتک فی الحال ٹاؤن تھانہ علاقے کے مجاوا جے نگر محلے میں واقع اپنے مکان میں رہتا تھا، جبکہ زخمی نوجوان کی شناخت ددھوبہا تھانہ علاقے کے دیوڑی گاؤں کے رہنے والے رام اوتار سنگھ کے 22 سالہ بیٹے یووراج سنگھ کے طور پر ہوئی ہے۔ رتک کے سر میں چار گولیاں اور پیٹھ میں ایک گولی لگی تھی، جبکہ یووراج کو دو گولیاں ماری گئی تھیں۔

ملزمین کی گرفتاری کے لیے کوشش جاری: پولیس

انسپکٹر رجنی کانت نے کہا کہ ملزم کو جلد از جلد گرفتار کرنے کے لیے ہر ممکن کوشش کی جا رہی ہے۔ انہوں نے بتایا کہ اہل خانہ کو یقین دہانی کرائی گئی ہے کہ ملزم کی جلد گرفتاری کے لیے تمام ضروری اقدامات کیے جائیں گے۔

بھارت ایکسپریس۔