Milkipur Bypolls 2025: ملکی پور ضمنی انتخاب کے بعد اکھلیش یادو ہوئے برہم کہا- الیکشن کمیشن مر چکا ہے، ہمیں سفید کپڑا بطور تحفہ دینا پڑے گا

نئی دہلی: اتر پردیش کے ایودھیا میں ملکی پور اسمبلی سیٹ پر ضمنی انتخاب کے لیے ووٹنگ ختم ہو گئی ہے اور اب نتائج کا انتظار ہے۔ اس نشست کے نتائج کا اعلان 8 فروری کو کیا جائے گا۔ اس سے قبل سماج وادی پارٹی کے سربراہ اور یوپی کے سابق وزیر اعلی اکھلیش یادو نے الیکشن کمیشن آف انڈیا کے تعلق سے ایک متنازعہ تبصرہ کیا ہے ۔

سماج وادی پارٹی کے سربراہ اکھلیش یادو نے ملکی پور اسمبلی ضمنی انتخاب کے تناظر میں الزامات پر کہا، “یہ الیکشن لڑنے کا بی جے پی کا طریقہ ہے، الیکشن کمیشن مر چکا ہے، ہمیں سفید کپڑا پیش کرنا پڑے گا”۔

نگینہ کے رکن پارلیمنٹ چندر شیکھر آزاد نے بھی ملکی پور کے معاملے پر ردعمل ظاہر کرتے ہوئے بی جے پی کو تنقید کا نشانہ بنایا ۔ انہوں نے کہا کہ بی جے پی نے ملکی پور میں جمہوریت کا گلا گھونٹ دیا ہے۔ حکومتی مشینری نے جس طرح اقتدار کے آگے گھٹنے ٹیک دیئے ہیں، ووٹوں کو متاثر کرنے کا گناہ، ووٹنگ میں تاخیر کرنا، لوگوں کو دھمکیاں دینا، ووٹ نہ دینے دینا، جو اتر پردیش حکومت نے کیا ہے، وہ جرم ہے۔ اقتدار میں رہ کر یہ سمجھتے ہیں کہ وہ کبھی اقتدار سے بے دخل نہیں ہوں گے  لیکن جس طرح وہ جمہوریت کا قتل کر رہے ہیں، عوام ان کو آنے والے وقت میں جواب دے گی۔

بھارت ایکسپریس۔