RLD Chief Jayant Chaudhary remarks :بی جے پی کے ساتھ جانے کی قیاس آرائیوں پر آر ایل ڈی چیف جینت چودھری نے دیا بڑا بیان

راشٹریہ لوک دل یعنی آر ایل ڈی کے رہنما جینت چودھری نے کہا کہ وہ اپوزیشن اتحادیعنی انڈیا اتحاد کے اجلاس میں شرکت کریں گے۔ دراصل، جینت چودھری نے حال ہی میں دہلی سروس بل پر راجیہ سبھا میں ووٹنگ میں حصہ نہیں لیا تھا۔ اس کے بعد قیاس آرائیوں کا بازار گرم ہو گیا تھا۔ یہی نہیں، وزیر اعلیٰ یوگی کے ساتھ آر ایل ڈی کے تمام ایم ایل ایز کی ملاقات کی تصویر نے بھی ان قیاس آرائیوں کو ہوا دی تھی کہ کیا واقعی آر ایل ڈی اور بی جے پی کے درمیان قربت بڑھ رہی ہے؟

تاہم، جینت چودھری کے قریبی ذرائع نے بتایا کہ وہ اپنی بیوی کی صحت کی وجہ سے راجیہ سبھا میں دہلی سروسز بل پر ووٹنگ کے دوران موجود نہیں ہوسکےتھے۔ جب کہ جینت چودھری نے کہا کہ ممبئی میں ہونے والے انڈیا اتحاد کے اجلاس میں ضرور شرکت کروں گا۔ اس سے پہلے جاٹ لیڈر جینت نے پٹنہ میں منعقدہ اپوزیشن جماعتوں کی پہلی میٹنگ میں شرکت نہیں کی تھی۔ لیکن انہوں نے اتحاد کی دوسری میٹنگ میں حصہ لیاتھا۔ جب اس اتحاد کا نام ‘انڈیا’رکھا گیا تھا۔

آپ کو بتا دیں کہ جینت چودھری کے ووٹنگ سے دوری کے بعد یہ بحث شروع ہو گئی تھی کہ آر ایل ڈی اور ایس پی کے تعلقات میں اتنی گرمجوشی نہیں ہے۔ ایسے میں دہلی بل پر ووٹنگ سے جینت کی دوری نےایس پی کےساتھ  تعلقات خراب ہونے کی قیاس آرائیوں کو مضبوط کرنے میں مدد کی ، وہیں کچھ لوگوں کا کہنا تھاکہ بھارتیہ جنتا پارٹی (بی جے پی) کے ساتھ جانے کے لیے آر ایل ڈی کی طرف سے یہ  کھڑکی کھلی رکھنے کی حکمت عملی ہے۔ دریں اثنا، آر ایل ڈی کے ایم ایل اے نے بدھ کی شام وزیر اعلی یوگی آدتیہ ناتھ سے ملاقات کی۔ تصویر بھی منظر عام پر آئی لیکن آر ایل ڈی کی طرف سے  بتایا گیا کہ یہ میٹنگ گنے کی قیمتوں میں اضافے اور سیلاب سے متاثر کسانوں کو راحت فراہم کرنے کے مطالبے کے لیے منعقد کی گئی تھی۔

آر ایل ڈی کی جانب سے بتایا گیا کہ یہ ملاقات سیاسی نہیں تھی، بلکہ خالصتاً کسانوں کے مفادات کے مطالبے کے لیے تھی۔ لیکن جیسے ہی یوگی آدتیہ ناتھ سے ملاقات کی تصویریں سامنے آئیں، بحثوں کا بازار گرم ہوگیا۔ لیکن جینت چودھری نے ان تمام قیاس آرائیوں کو ختم کرتے ہوئے کہا کہ وہ ممبئی میں اپوزیشن کی میٹنگ میں شرکت کریں گے۔بیوی کی طبیعت خراب ہونے کی وجہ سے وہ راجیہ سبھا میں ووٹنگ کے  دوران موجود نہیں تھے۔

بھارت ایکسپریس۔