Shashi Tharoor Controversy: کوئی تلخی، کوئی سیاست نہیں، ششی تھرور کو ٹرول کرنے کے بعد اب کانگریس نے اپنا موقف واضح کیا، جانئے کیوںبرپا ہے ہنگامہ

کانگریس لیڈر ششی تھرور نے پاناما میں آپریشن سندورکے آل پارٹی وفد میں سرجیکل اسٹرائیک سے متعلق بیان دیا تھا۔ اس بیان کے بعد کانگریس میں ایک تنازعہ کھڑا ہوگیا ہے۔ کئی لیڈر ششی تھرور کو نشانہ بنا رہے ہیں۔ کانگریس جنرل سکریٹری رندیپ سرجے والا نے بھی اس معاملے پر بیان دیا ہے۔ انہوں نے کہا کہ ششی تھرور ایک سینئر لیڈر ہیں، لیکن ان کا بیان حقیقتاً غلط ہے۔ پارٹی نے صرف ریکارڈ کوصحیح کیا ہے۔ انہوں نے واضح کیا کہ یو پی اے کے دور حکومت میں بھی پاکستان کے خلاف سرجیکل سٹرائیکس کی گئیں۔ انہوں نے کہا کہ یہ کارروائیاں مسلح افواج کے ذریعے کی گئیں اور کانگریس حکومت نے ہمیشہ دہشت گردوں کو منہ توڑ جواب دیا ہے۔

کانگریس جنرل سکریٹری رندیپ سرجے والا نے کہا کہ اس میں کوئی تلخی نہیں ہے۔ پارٹی کا مقصد تھرور کی توہین کرنا نہیں ہے بلکہ صحیح حقائق کو پیش کرنا ہے۔ تھرور نے پاناما میں کہا تھا کہ بی جے پی پہلی پارٹی تھی جس نے 2016 میں پہلی بار پاکستان پر سرجیکل اسٹرائیک کی تھی، اس کے بعد 2019 میں بھی سرجیکل اسٹرائیک کرکے پاکستان کو منہ توڑ جواب دیا گیا تھا۔ انہوں نے سابقہ ​​حکومتوں کے کسی فوجی اقدام کا ذکر نہیں کیا۔ اس پر کانگریس ناراض ہوگئی اور اس کے لیڈروں نے ششی تھرور کو نشانہ بنایا۔ اس پر کانگریس لیڈر ادت راج نے پہلے کہا کہ تھرور بی جے پی کے سپر ترجمان ہیں۔ وہ کانگریس کو تباہ کرنے کی سازش کر رہے ہیں۔ انہوں نے یہ بھی کہا کہ تھرور کا بیان جھوٹ پر مبنی ہے اور انہیں بی جے پی کا مہم جو قرار دیا جانا چاہئے۔

ششی تھرور کی وضاحت

کانگریس کے ترجمان پون کھیرا نے تو  اپنی ہی پارٹی کے ایک ایم پی کو ان کی  کتاب ‘دی پیراڈوکسیکل پرائم منسٹر’ کی مثال دی۔ انہوں نے ایکس (سابقہ ​​ٹویٹر) پر پوسٹ کیا اور لکھا کہ تھرور نے خود یو پی اے حکومت کی سرجیکل اسٹرائیک کا ذکر کیا تھا۔ اس طرح کی تنقید سے پتہ چلتا ہے کہ تھرور کے تبصرے سے کانگریس کے ایک بڑے طبقے میں عدم اطمینان پیدا ہوا ہے۔قابل ذکر بات یہ ہے کہ  اس معاملے پر ششی تھرور کی وضاحت بھی سامنے آگئی۔ انہوں نے کہا کہ میرا بیان جنگوں پر نہیں  تھا، بلکہ حالیہ اقدامات پر تھا۔ تھرور نے ایکس (سابقہ ​​ٹویٹر) پر واضح کیا کہ میں واضح طور پر صرف حالیہ دہشت گردی کے واقعات اور ان کے ردعمل کے بارے میں بات کر رہا تھا، جنگوں یا تاریخ پر نہیں۔ انہوں نے ناقدین کو ’’ٹرول اور بنیاد پرست‘‘ قرار دیا۔ انہوں نے کہا کہ ان کے الفاظ کو توڑ مروڑ کر پیش کیا جا رہا ہے اوران کے پاس اس سے  مزید اہم کام کرہیں۔

بھارت ایکسپریس اردو