Yusuf Pathan gets a setback from Gujarat HC: یوسف پٹھان کو گجرات ہائی کورٹ سے بڑا جھٹکا، وڈودرا میونسپل کارپوریشن کے حق میں آیا فیصلہ

وڈودرا: گجرات ہائی کورٹ نے بھارتی ٹیم کے سابق آل راؤنڈر یوسف پٹھان کے خلاف اراضی کیس میں فیصلہ سنا دیا ہے۔ ہائی کورٹ نے وڈودرا میونسپل کارپوریشن کے حق میں فیصلہ دیا ہے۔ فیصلے کے بعد یوسف پٹھان کے زیر قبضہ پلاٹ پر وڈودرا میونسپل کارپوریشن کا حق ہوگا۔

آئی اے این ایس سے بات کرتے ہوئے، وڈودرا میونسپل کارپوریشن کے اسسٹنٹ میونسپل کمشنر (لینڈ اسٹیٹ) سریش تُوَر نے کہا، ’’یوسف پٹھان جس زمین پر دعویٰ کر رہے تھے اسے کارپوریشن نے مسترد کر دیا تھا۔ اس کے خلاف انہوں نے ہائی کورٹ میں اپیل کی تھی۔ ان کی اپیل کو مسترد کرتے ہوئے ہائی کورٹ نے میونسپل کارپوریشن کے حق میں فیصلہ دیا ہے۔‘‘

یوسف پٹھان پر سرکاری پلاٹ پر قبضے کا الزام

یوسف پٹھان پر سرکاری پلاٹ پر قبضے کا الزام ہے۔ وڈودرا میونسپل کارپوریشن نے پٹھان کو نوٹس جاری کیا تھا۔ رپورٹ کے مطابق وڈودرا میونسپل کارپوریشن نے یوسف پٹھان کو پلاٹ دینے کا فیصلہ کیا تھا۔ اس کے لیے ریاستی حکومت کو تجویز بھیجا گیا تھا، لیکن ریاستی حکومت نے کارپوریشن کی سفارش کو مسترد کردیا۔ اس کے باوجود یوسف پٹھان نے پلاٹ پر قبضہ کر لیا۔ جب پٹھان نے پلاٹ مانگا تو اس وقت ڈاکٹر جیوتی پانڈیا میئر تھیں۔ تب کمشنر نے تجویز حکومت کو بھیج دی تھی۔ اس وقت پٹھان سیاست کا حصہ نہیں تھے۔

10 سال بعد 2024 میں سامنے آیا تنازعہ

یوسف پٹھان پر الزام ہے کہ انہوں نے وڈودرا کے تندلجا میں اپنی رہائش گاہ کے ساتھ والے پلاٹ پر قبضہ کیا تھا۔ یوسف پٹھان نے 2012 میں وڈودرا میونسپل کارپوریشن سے پلاٹ خریدنے کا مطالبہ کیا تھا، کارپوریشن نے اس تجویز کو منظور کیا اور 2014 میں ریاستی حکومت کو بھیج دیا، لیکن حکومت نے اس تجویز کو منظور نہیں کیا۔ یہ تنازعہ 10 سال بعد 2024 میں سامنے آیا۔

2024 میں بہرام پور لوک سبھا سیٹ سے لڑا الیکشن

کرکٹ سے ریٹائرمنٹ کے بعد یوسف پٹھان نے سیاست میں قدم رکھا ہے۔ 2024 میں، انہوں نے ترنمول کانگریس کے ٹکٹ پر مغربی بنگال کی بہرام پور لوک سبھا سیٹ سے الیکشن لڑا اور کانگریس کے بڑے لیڈر ادھیر رنجن چودھری کو شکست دے کر پارلیمنٹ پہنچے۔

بھارت ایکسپریس۔