قومی

Women Reservation Bill 2026: خواتین ریزرویشن بل پر ووٹنگ کے وقت موجود رہیں گے ٹی ایم سی کے 20 اراکین پارلیمنٹ، کہا- ہم بی جے پی کے خلاف

نئی دہلی: اپوزیشن پارٹی کی میٹنگ کے بعد، ترنمول کانگریس ذرائع کا کہنا ہے کہ بنگال کے انتخابات ان کے لئے بہت اہم ہیں، اس لئے ان کے 7-5 اراکین پارلیمنٹ اس بل پرووٹنگ میں حصہ لینے جا رہے تھے۔ کیونکہ اتنے ہونے پر بھی اپوزیشن کی جیت طے تھی۔ ہم کسی قیمت پربی جے پی کی مدد نہیں کرنے والے ہیں۔ ٹی ایم سی نے کہا کہ اب وہ اس بات کویقینی بنانے کی کوشش کریں گے کہ ان کے کم ازکم 20 اراکین پارلیمنٹ ووٹنگ کے دوران موجود رہیں گے۔

انہوں نے مزید کہا کہ وہ اس تعداد کو بڑھانے کی بھی کوشش کریں گے۔ تاہم، سدیپ بندوپادھیائے کی طبیعت ناسازہے، ابھیشیک بنرجی ریاست بھرمیں اسٹارپرچارک ہیں اورانتخابات کی وجہ سے ان کے حلقوں میں کچھ اراکین پارلیمنٹ کی موجودگی ضروری ہے۔ لہذا، تمام 28 اراکین پارلیمنٹ شرکت نہیں کرسکیں گے۔ تاہم ہماری نیت صاف ہے کہ ہم اس معاملے میں حکومت کے خلاف اوراپوزیشن کے ساتھ ہیں۔

میٹنگ میں پہنچیں ساریکا گھوش

کانگریس صدرملیکا ارجن کھڑگے کی صدارت میں منعقدہ میٹنگ میں ٹی ایم سی لیڈرساگاریکا گھوش نے شرکت کی۔ انہوں نے کہا کہ تین ٹی ایم سی خواتین ممبران پارلیمنٹ – کاکولی گھوش دستیدار، پرتیما منڈل اورجون مالیا- لوک سبھا میں بات کریں گی۔ کچھ ممبران پارلیمنٹ، جیسے سدیپ بندوپادھیائے اورسوگتا رائے، جن کی طبیعت ٹھیک نہیں تھی، بل کے خلاف ووٹ دینے آرہے ہیں۔ ابھیشیک بنرجی اوردیگرجیسے کچھ ٹی ایم سی اراکین پارلیمنٹ، جو انتخابی تشہیرمیں مصروف ہیں، نہیں آئیں گے۔

خواتین ریزرویشن کی حمایت

وہیں کانگریس لیڈر کے سریش نے کہا کہ ان کی پارٹی خواتین ریزرویشن بل کی حمایت کرتی ہے، لیکن اس سے متعلق حد بندی کی تجویز کی مخالفت کرتی ہے۔ سماجوادی پارٹی کے سربراہ اکھلیش یادو نے کہا کہ ان کی پارٹی خواتین ریزرویشن کے خلاف نہیں ہے، لیکن جس طریقے سے حکومت اسے لا رہی ہے، سماجوادی پارٹی اس کی مخالفت کرتی ہے۔ انہوں نے کہا کہ 2011 کی مردم شماری کی بنیاد پرحد بندی کرنا مناسب نمائندگی کویقینی نہیں بنائے گا۔

دو-تہائی اکثریت کی ضرورت

شیوسینا (یوبی ٹی) کے رکن پارلیمنٹ اروند ساونت نے بھی اسی طرح کے خدشات کا اظہارکیا، جبکہ ڈی ایم کے کے رکن پارلیمنٹ ٹی آربالونے کہا کہ ان کے لیڈراوروزیراعلیٰ ایم کے اسٹالن نے اس کے خلاف احتجاج کرنے کے لئے سیلم میں ایک ریلی کے دوران بل کے مسودے کو جلا دیا۔ این ڈی اے کے پاس لوک سبھا میں کل 292 ممبران ہیں جبکہ اہم اپوزیشن پارٹیوں کے پاس 233 ممبران ہیں۔ آئینی ترمیمی بل کی منظوری کے لیے ایوان میں موجود اور ووٹنگ کرنے والے اراکین کی دوتہائی اکثریت کی ضرورت ہوتی ہے۔

بھارت ایکسپریس اردو-

Nisar Ahmad