Will Not Accept Veer Savarkar Award—Shashi Tharoor: ’ویر ساورکر ایوارڈ‘ قبول نہیں کروں گا: ششی تھرور کا صاف انکار، نام کے اعلان کو ’غیر ذمہ دارانہ‘ قرار دیا

کانگریس کے سینئر لیڈر اور ترواننت پورم سے رکنِ پارلیمنٹ ششی تھرور نے بدھ کے روز واضح طور پر کہا کہ وہ ویر ساورکر کے نام پر دیا جانے والا کوئی ایوارڈ قبول نہیں کریں گے اور نہ ہی اس سے متعلق کسی تقریب میں شریک ہوں گے۔ انہوں نے کہا کہ ایوارڈ کے پس منظر اور اسے دینے والے ادارے کے بارے میں مکمل وضاحت کے بغیر کسی تقریب میں جانا سوال ہی پیدا نہیں کرتا۔ تھرور نے اس بات پر ناراضگی ظاہر کی کہ تقریب کے منتظمین نے ان کی رضامندی کے بغیر اُن کا نام ایوارڈ کے امیدوار کے طور پر اعلان کر دیا۔ ان کا کہنا تھا کہ ”آرگنائزر کی جانب سے میرا نام اعلان کرنا غیر ذمہ دارانہ ہے، یہ سب کچھ میری اجازت کے بغیر کیا گیا‘‘۔

کانگریس لیڈروں کا ردعمل
اس معاملے سے قبل کانگریس کے لیڈر کے مرلی دھرن نے ترواننت پورم میں کہا تھا کہ تھرور سمیت پارٹی کے کسی بھی ممبر کو ویر ساورکر کے نام پر کوئی ایوارڈ نہیں لینا چاہیے، کیونکہ ان کے مطابق ”ساورکر نے انگریزوں کے سامنے سر جھکایا تھا‘‘۔ مرلی دھرن نے یہ بھی کہا کہ اگر تھرور یہ ایوارڈ قبول کرتے ہیں تو اس سے کانگریس کی بے عزتی اور شرمندگی ہوگی۔ انہوں نے امید ظاہر کی تھی کہ تھرور ایسا قدم نہیں اٹھائیں گے۔

تھرور کا وضاحتی بیان
بعد ازاں دہلی میں صحافیوں سے بات کرتے ہوئے تھرور نے کہا کہ انہیں منگل کے روز میڈیا سے اس ایوارڈ کا پتہ چلا اور وہ اس تقریب میں شرکت نہیں کریں گے۔ انہوں نے کہا کہ ”میں نے اس بارے میں کل ہی سنا ہے۔ میں نہیں جا رہا۔ میں یہاں نہیں ہوں‘‘۔ انہوں نے سوشل میڈیا پلیٹ فارم ایکس پر بھی ایک پوسٹ میں لکھا کہ ایوارڈ کے بارے میں مکمل وضاحت کے بغیر اسے قبول کرنے یا تقریب میں شرکت کا کوئی سوال پیدا نہیں ہوتا۔ تھرور نے کہا کہ انہیں یہ بھی معلوم نہیں تھا کہ ان کا نام ایوارڈ لسٹ میں کیوں شامل کیا گیا ہے۔ تھرور کے مطابق جب وہ لوکل باڈی انتخابات میں ووٹ ڈالنے کے لیے کیرالہ گئے تھے تب میڈیا کے ذریعے انہیں معلوم ہوا کہ انہیں ایوارڈ دیا جا رہا ہے، جس پر انہوں نے فوراً کہا تھا کہ نہ انہیں اس کی کوئی اطلاع ہے اور نہ اس کی منظوری دی گئی تھی۔ اس کے باوجود میڈیا میں سوالات کیے جا رہے تھے جس پر انہوں نے باضابطہ بیان جاری کیا۔

ایچ آر ڈی ایس انڈیا کا ردعمل
تھرور کے بیان کے بعد ایوارڈ دینے والی تنظیم ایچ آر ڈی ایس انڈیا کے سیکریٹری اَجی کرشنن نے دعویٰ کیا کہ تھرور کو اس سلسلے میں پہلے ہی بتا دیا گیا تھا اور ان کے نمائندے انہیں گھر پر دعوت دینے بھی گئے تھے۔ کرشنن نے کہا کہ تھرور نے ایوارڈ حاصل کرنے والوں کی پوری لسٹ بھی مانگی تھی جو انہیں فراہم کر دی گئی تھی۔ انہوں نے کہا کہ تھرور نے اب تک تنظیم کو یہ اطلاع نہیں دی تھی کہ وہ تقریب میں شامل نہیں ہوں گے اور یہ کہ ’’شاید وہ ڈرے ہوئے ہیں، کیونکہ کانگریس نے اسے مسئلہ بنا دیا ہے‘‘۔

پس منظر
ششی تھرور کو ایچ آر ڈی ایس انڈیا کی جانب سے شروع کیے گئے ’پہلے ویر ساورکر انٹرنیشنل امپیکٹ ایوارڈ 2025‘ کے لیے منتخب کیا گیا تھا۔ منگل کو انہوں نے کہا کہ انہیں اس ایوارڈ کے بارے میں کچھ معلوم نہیں اور نہ ہی وہ جانتے ہیں کہ اسے کون دے رہا ہے۔ انہوں نے کہا تھا کہ ”مجھے ایوارڈ سے متعلق کسی بھی بات کی اطلاع نہیں ہے۔ میں معلوم کروں گا کہ یہ معاملہ کیا ہے‘‘۔

بھارت ایکسپریس اردو