Who will win Bihar Election 2025: بہار اسمبلی انتخابات 2025 کا اعلان، وزیراعظم کی مقبولیت کا بہار الیکشن پر کتنا ہوگا اثر؟ اوپینین پول میں NDA کو واضح اکثریت، سیاسی حلقوں میں ہلچل

نئی دہلی: الیکشن کمیشن آف انڈیا (ECI) نے پیر کے روز بہار اسمبلی انتخابات 2025 کی تاریخوں کا اعلان کر دیا۔ ریاست کی 243 نشستوں پر دو مرحلوں میں ووٹنگ ہوگی۔ پہلے مرحلے میں 6 نومبر کو 121 نشستوں پر ووٹ ڈالے جائیں گے، جبکہ دوسرے مرحلے میں 11 نومبر کو باقی 122 نشستوں پر۔ نتائج 14 نومبر کو سامنے آئیں گے۔ چیف الیکشن کمشنر گیانیش کمار نے بتایا کہ ریاست میں کل 7.43 کروڑ ووٹرز ہیں، جن میں 14 لاکھ نئے ووٹرز شامل ہیں جو پہلی بار ووٹ ڈالیں گے۔ کمیشن نے خصوصی نظر ثانی مہم  کے ذریعے ووٹر لسٹ کو درست اور شفاف بنایا ہے۔ سیاسی جماعتیں چھٹھ پوجا کے بعد ووٹنگ کی حامی تھیں تاکہ زیادہ سے زیادہ ایسے مزدور جو بہار سے دور رہتے ہیں اپنی ریاست میں آکر ووٹ ڈال سکیں۔ وزیراعظم کی مقبولیت کا بہار الیکشن پر کتنا ہوگا اثر یہ بھی دیکھنا اہم ہوگا۔ الیکشن اس بات کا بھی فیصلہ کرے گا کہ نیتیش کمار اپنی حکومت بچا پائیں گے یا مہاگٹھ بندھن دوبارہ اقتدار میں آئے گا۔

اوپینین پول میں NDA کو واضح برتری کی پیش گوئی

چناؤ کی تاریخوں کے اعلان کے ساتھ ہی آئی اے این ایس–میٹریز نیوز کمیونیکیشن کا تازہ اوپینین پول جاری ہوا ہے۔ 18 ستمبر سے 5 اکتوبر تک تمام 243 اسمبلی حلقوں میں 46,862 افراد سے گفتگو کی بنیاد پر تیار کیے گئے اس سروے کے مطابق این ڈی اے (NDA) مضبوط پوزیشن میں ہے۔ سروے کے مطابق، این ڈی اے کو 49 فیصد ووٹ شیئر حاصل ہونے کا امکان ہے، جو 2020 کے 37.3 فیصد سے کہیں زیادہ ہے۔ اس بنیاد پر این ڈی اے کو 150 سے 160 نشستیں مل سکتی ہیں، جو اکثریت کی حد (122 نشستیں) سے کافی زیادہ ہیں۔ دوسری طرف، مہاگٹھ بندھن (انڈیا اتحاد) کو 36 فیصد ووٹ شیئر کے ساتھ صرف 70 سے 85 نشستیں ملنے کا امکان ظاہر کیا گیا ہے۔ دیگر پارٹیوں کو 9 سے 12 نشستیں مل سکتی ہیں۔ سروے کا مارجن آف ایرر±3 فیصد ہے۔ اس رپورٹ کے مطابق عوامی رائے میں بے روزگاری، ہجرت اور نظم و نسق جیسے معاملات اہم ہیں جہاں این ڈی اے کو استحکام اور ترقی کا کریڈٹ دیا جا رہا ہے۔

این ڈی اے میں پارٹیوں کی کارکردگی

سروے کے مطابق، این ڈی اے میں سب سے زیادہ فائدے میں بھارتیہ جنتا پارٹی (بی جے پی) دکھائی دے رہی ہے۔

*   بی جے پی کو 21 فیصد ووٹ اور 80 سے 85 نشستیں ملنے کا امکان ہے۔

*   جنتا دل (یونائیٹڈ) کو 18 فیصد ووٹ کے ساتھ 60 سے 65 نشستیں مل سکتی ہیں۔

*   لوک جن شکتی پارٹی (رام ولاس) کو 6 فیصد ووٹ کے ساتھ 4 سے 6 نشستیں۔

*   ہندوستانی عوام مورچہ (سیکولر) کو 3 سے 6 نشستیں۔

*   آر ایل ایم کو 2 فیصد ووٹ کے ساتھ 1 یا 2 نشستیں ملنے کی پیش گوئی کی گئی ہے۔

مجموعی طور پر، نیتیش کمار کی قیادت میں این ڈی اے کی یکجہتی کو مضبوط مانا جا رہا ہے۔ سروے میں 42 فیصد ووٹرز نے نیتیش کمار کو اپنا پسندیدہ وزیر اعلیٰ قرار دیا، جبکہ تیجسوی یادو کو صرف 15 فیصد حمایت ملی۔

مہاگٹھ بندھن اور دیگر جماعتوں کی حالت

سروے کے مطابق، مہاگٹھ بندھن کی حالت پچھلے انتخابات کے مقابلے کمزور نظر آتی ہے۔ آر جے ڈی (راشٹریہ جنتا دل) کو 21 فیصد ووٹ کے ساتھ 60 سے 65 نشستیں ملنے کا امکان ہے۔ جو 2020 میں حاصل شدہ 75 نشستوں سے کم ہے۔ کانگریس کو 8 فیصد ووٹ سے 7 سے 10 نشستیں، سی پی آئی (ایم ایل) کو 4 فیصد ووٹ سے 6 سے 9 نشستیں، سی پی آئی اور سی پی ایم کو 1 فیصد ووٹ سے 0 یا 1 نشست، اور وی آئی پی (وِکاس شیل انسان پارٹی) کو 2 سے 4 نشستیں مل سکتی ہیں۔ دیگر جماعتوں میں پرسنٹ کشور کی جن سوراج پارٹی کو 7 فیصد ووٹ کے ساتھ 2 سے 5 نشستیں، اے آئی ایم آئی ایم کو 1 فیصد ووٹ کے ساتھ 1 سے 3 نشستیں، اور بی ایس پی–جے ایم ایم اتحاد کو 7 سے 10 نشستیں ملنے کی پیش گوئی ہے۔ یہ سروے اپوزیشن اتحاد کی یکجہتی پر بھی سوال اٹھاتا ہے، خاص طور پر ووٹرس لسٹ تنازعہ کے بعد۔

سیاسی اثرات اور ماہرین کی رائے

یہ سروے بہار کی سیاست کو واضح کرتا ہے۔ 2020 میں این ڈی اے کو 125 نشستیں ملی تھیں، جبکہ مہاگٹھ بندھن کو 110۔ اب این ڈی اے کی برتری ترقیاتی منصوبوں اور نیتیش کمار کی مستحکم قیادت پر مبنی دکھائی دیتی ہے۔ تاہم، ناقدین کے مطابق گٹھ بندیوں میں بار بار تبدیلیاں عوام میں غیر یقینی پیدا کرتی ہیں۔ قومی سطح پر وزیر اعظم نریندر مودی اور راہل گاندھی کی ریلیوں کا بھی پروگرام طے کیا جا رہا ہے۔ ماہرین کا کہنا ہے کہ یہ سروے محض ایک رائے شماری کی جھلک ہے، حتمی نتیجہ نہیں۔ بہار میں نوجوان ووٹرز (14 لاکھ نئے ووٹ دینے والے) اور مہاجر مزدوروں کا رجحان فیصلہ کن ثابت ہوگا۔ الیکشن کمیشن نے 250 بوتھوں پر گھڑ سوار گشت اور 197 بوتھوں تک کشتی سے رسائی کے انتظامات کیے ہیں۔ یہ انتخابات صرف بہار ہی نہیں، بلکہ ملک کی سیاسی سمت کا تعین بھی کریں گے۔

بھارت ایکسپریس اردو۔