Eknath Shinde on Maratha Reservation: مہاراشٹر کے وزیر اعلی کا بڑا بیان، کہا -مراٹھا ریزرویشن پر جلد بازی میں کوئی فیصلہ نہیں لینا چاہتی حکومت

Eknath Shinde on Maratha Reservation: مہاراشٹر کے وزیر اعلی ایکناتھ شندے نے پیر کے روز کہا کہ ریاستی حکومت مراٹھا طبقے کو ٹھوس طریقے سے ریزرویشن دینا چاہتی ہے، جو قانون کی کسوٹی پر پورا اترے گا، لیکن جلد بازی میں فیصلہ نہیں کیا جائے گا۔ اس معاملے پر پیر کے روز آل پارٹی میٹنگ ہونے والی ہے۔ نائب وزیر اعلیٰ دیویندر فڑنویس نے کہا کہ حکومت اس میٹنگ میں وسیع اتفاق رائے پیدا کرنے کی کوشش کرے گی کہ مراٹھوں اور دیگر برادریوں کے ذریعہ اٹھائے گئے مسائل پر کیسے آگے بڑھنا ہے۔

شندے نے ممبئی میں نامہ نگاروں سے کہا، ”ریاستی حکومت مراٹھا طبقے کو ایسا ریزرویشن دینا چاہتی ہے جو ٹھوس ہو اور قانون کی کسوٹی پر کھرا اترے۔ ہم جلد بازی میں کوئی فیصلہ نہیں لے رہے ہیں۔ ریاستی حکومت کسی کو دھوکہ نہیں دینا چاہتی۔” انہوں نے کہا کہ حکومت کو یہ ثابت کرنا ہو گا کہ مراٹھا طبقہ سماجی اور اقتصادی طور پر پسماندہ ہے اور اسے دیگر برادریوں کو یقین دلانا ہو گا کہ ان کے ریزرویشن پر کسی بھی طرح کا اثر نہیں پڑے گا۔

آج شام ممبئی میں ہونے والی آل پارٹی میٹنگ سے توقعات کے سوال پر، چیف منسٹر نے کہا، ”مراٹھا ریزرویشن کا مطالبہ ایک سماجی مدعا ہے، سیاسی نہیں۔ مجھے امید ہے کہ اپوزیشن پارٹیاں بھی کچھ تجاویز پیش کریں گی اور اس معاملے کی سیاست کرنے سے گریز کریں گی۔” شندے نے کہا کہ ریاستی حکومت مراٹھا طبقے کے طلباء کو دیگر پسماندہ برادریوں کے برابر بہت سی سہولیات اور مالی امداد فراہم کر رہی ہے۔ فڈنویس نے کہا کہ حکومت ریزرویشن کے معاملے پر سیاست کیے بغیر مختلف برادریوں کے مطالبات پر توجہ دے گی اور ریاست کے مفاد میں فیصلہ کرنے کی کوشش کرے گی۔

پچھلے 14 دنوں سے بھوک ہڑتال پر بیٹھے ریزرویشن کارکن منوج جارنگے سے پانی پینا بند کرنے کے فیصلے کے بارے میں پوچھے جانے پر، فڈنویس نے کہا، “حکومت کو ایسا فیصلہ لینا پڑے گا جو قانون کی کسوٹی پر کھرا ہو، ورنہ کمیونٹی ہمیں انہیں گمراہ کرنے کے لیے ذمہ دار ٹھہرائے گی۔” انہوں نے کہا کہ ریاستی حکومت ایسا کوئی فیصلہ نہیں لے گی جس سے دو کمیونٹیز (او بی سی اور مراٹھا) آمنے سامنے ہوں۔

بھارت ایکسپریس۔