Vijay’s Swearing-in Ceremony Delayed: تمل ناڈو میں ہوتے ہوتے ٹلی وجے کی حلف برداری! پہلے ایک، اب 2 سیٹوں پر پھنس گیا TVK کا پیچ

تمل ناڈو کی سیاست میں ان دنوں مسلسل گھمسان دیکھنے کو مل رہا ہے۔ سپر اسٹار سے سیاستداں بنے وجے (تھلاپتی وجے) کے مداح ان کی تاجپوشی کا بے صبری سے انتظار کر رہے ہیں، لیکن عین موقع پر بازی پلٹ گئی۔ سنیچر کو ہونے والی حلف برداری کی تقریب فی الحال منسوخ کر دی گئی ہے۔ راج بھون کی دہلیز تک پہنچنے کے باوجود ‘تھلاپتی’ کی حکومت کا معاملہ صرف 2 سیٹوں کے عدد پر آ کر اٹک گیا ہے۔

نمبر گیم میں پھر الجھے ‘تھلاپتی’

جمعہ کو جب وجے گورنر راجیندر وشوناتھ آرلیکر سے ملاقات کے لیے پہنچے تو ہر کسی کو امید تھی کہ اب سسپنس ختم ہو جائے گا۔ وجے نے گورنر کو 116 اراکین اسمبلی کی حمایت کا خط سونپ کر حکومت بنانے کا دعویٰ پیش کیا، لیکن تمل ناڈو کی 234 رکنی اسمبلی میں اکثریت کا جادوئی ہندسہ 118 ہے۔وجے کی پارٹی TVK نے خود 108 سیٹیں جیتی ہیں، جن میں سے دو سیٹوں پر خود وجے کامیاب ہوئے ہیں۔ حمایت کرنے والوں کی فہرست میں کانگریس، سی پی آئی اور سی پی آئی (ایم) کے اراکین اسمبلی شامل ہیں، لیکن معاملہ IUML اور VCK پر آ کر پھنس گیا ہے۔ ان دونوں پارٹیوں کے پاس 2-2 اراکین اسمبلی ہیں اور انہوں نے اب تک اپنی حمایت کا خط جمع نہیں کرایا ہے۔ گورنر نے صاف کر دیا ہے کہ جب تک 118 اراکین اسمبلی کی تحریری حمایت نہیں ملتی، وہ حکومت بنانے کی دعوت نہیں دے سکتے۔

سڑکوں پر ہنگامہ

جیسے ہی حلف برداری منسوخ ہونے کی خبر پھیلی، چنئی کی سڑکوں پر سناٹا اور مایوسی چھا گئی۔ TVK کے ہزاروں حامی جمعہ کی صبح گورنر ہاؤس (لوک بھون) کے سامنے جمع ہو گئے اور نعرے بازی شروع کر دی۔ بھیڑ کو قابو میں کرنے کے لیے پولیس کو ہلکا لاٹھی چارج کرنا پڑا اور کئی حامیوں کو حراست میں بھی لیا گیا۔

دوسری طرف سیاسی گلیاروں میں نئی سیاسی کھچڑی پکنے کی چہ مگوئیاں بھی تیز ہو گئی ہیں۔ کہا جا رہا ہے کہ اگر وجے اکثریت ثابت نہیں کر پاتے تو DMK اور AIADMK ہاتھ ملا سکتے ہیں۔ تاہم، TVK نے بھی سخت رخ اپناتے ہوئے دھمکی دی ہے کہ اگر اپوزیشن نے اس طرح حکومت بنانے کی کوشش کی تو ان کے تمام اراکین اسمبلی اجتماعی استعفیٰ دے دیں گے۔

دہلی تک پہنچی سیاسی گرمی

اس سیاسی ہلچل کا اثر اب دہلی کی پارلیمنٹ تک پہنچ گیا ہے۔ کانگریس کے ساتھ اتحاد ٹوٹنے کے بعد DMK نے لوک سبھا میں اپنے اراکین پارلیمنٹ کی نشستیں تبدیل کرنے کا مطالبہ کر دیا ہے۔ پارٹی کا کہنا ہے کہ اب کانگریس کے ساتھ بیٹھنا ان کے لیے ممکن نہیں رہا۔

بھارت ایکسپریس اردو۔