Vijay CM Oath: وجے نے وزیر اعلیٰ کے طور پر لیا حلف، تمل ناڈو میں سیاسی تاریخ کی رقم، TVKکے 9ایم ایل اے بنے وزیر

نئی دہلی :تمل ناڈو کی سیاست میں ایک تاریخی موڑ اُس وقت آیا جب تملگا ویٹری کڑگم (TVK) کے سربراہ اور مشہور اداکار سے سیاستدان بننے والے سی جوزف وجے نے ریاست کے نویں وزیر اعلیٰ کے طور پر حلف لے لیا۔ چنئی کے جواہر لعل نہرو اسٹیڈیم میں منعقد شاندار تقریب میں گورنر راجیندر وشوناتھ آرلیکر نے انہیں عہدے اور رازداری کا حلف دلایا۔ اس موقع پر کانگریس رہنما راہل گاندھی سمیت کئی اہم سیاسی شخصیات بھی موجود رہیں۔وجے کے ساتھ ان کی پارٹی کے 9 اراکین اسمبلی نے بھی وزیر کے طور پر حلف لیا اور نئی کابینہ کا حصہ بنے۔ ان میں این آنند، آدھو ارجن، ڈاکٹر کے جی ارون راج، کے اے سینگوٹٹئین، پی وینکٹ رمنن، آر نرمل کمار، راج موہن، ڈاکٹر ٹی کے پربھو اور سیلوی ایس کیرتنا شامل ہیں۔ دلچسپ بات یہ رہی کہ فی الحال اتحادی جماعتوں کے کسی رکن کو کابینہ میں شامل نہیں کیا گیا۔حکومت سازی سے قبل وجے نے گورنر کو کانگریس، سی پی آئی، سی پی ایم، وی سی کے اور آئی یو ایم ایل سمیت مجموعی طور پر 121 اراکین اسمبلی کی حمایت کے خطوط پیش کیے تھے۔ اس کے بعد گورنر نے انہیں حکومت بنانے کی دعوت دی۔

تمل ناڈو اسمبلی انتخابات میں ٹی وی کے نے پہلی ہی بار شاندار کارکردگی دکھاتے ہوئے 234 میں سے 108 نشستوں پر کامیابی حاصل کی تھی۔ بعد ازاں مختلف جماعتوں کی حمایت کے بعد وجے کو 121 ارکان کی تائید حاصل ہوئی، جبکہ حکومت بنانے کے لیے 118 نشستوں کی ضرورت تھی۔ اس طرح انہوں نے واضح اکثریت ثابت کرتے ہوئے وزارت اعلیٰ کا عہدہ سنبھال لیا۔سیاسی مبصرین اس پیش رفت کو تمل ناڈو کی سیاست میں ایک بڑی تبدیلی قرار دے رہے ہیں۔ 1967 کے بعد یہ پہلا موقع ہے جب کسی غیر دراوڑی جماعت کے رہنما نے ریاست کے وزیر اعلیٰ کی کرسی سنبھالی ہے۔ اس سے قبل 1963 سے 1967 تک کانگریس کے ایم بھکت وتسلم وزیر اعلیٰ رہے تھے۔

حلف برداری تقریب میں معروف اداکارہ ترشا کرشنن کی موجودگی نے بھی سب کی توجہ اپنی جانب مبذول کر لی۔ ترشا کو وجے کی سیاسی زندگی میں اکثر ان کی “لیڈی لک” کہا جاتا ہے۔ وہ اس تاریخی موقع پر خصوصی طور پر اسٹیڈیم پہنچیں اور تقریب میں شریک ہوئیں۔گھر سے روانہ ہوتے وقت میڈیا نے جب ترشا سے بات کی اور کہا کہ آج تمل ناڈو کے لیے بڑا دن ہے، تو انہوں نے مسکراتے ہوئے جواب دیا کہ وہ اس لمحے کا طویل عرصے سے انتظار کر رہی تھیں۔ ترشا کے اس بیان نے سوشل میڈیا پر بھی کافی توجہ حاصل کی۔

بھارت ایکسپریس اردو